ភ្នំពេញ៖ យុវជន២នាក់ត្រូវបានសមត្ថកិច្ចនគរបាលនៃកម្លាំងអន្តរាគមន៍ខណ្ឌឫស្សីកែវឃាត់ខ្លួន បន្ទាប់ពីសមត្ថកិច្ចបានប្រទះឃើញពួកគេជិះម៉ូតូពេលយប់អត់ស្លាកលេខ ហើយហៅឈប់ដើម្បីត្រួតពិនិត្យ ក៏រកឃើញមានកាំបិតប៉័ងតោ និងកន្ត្រៃមួយ ។
ការឃាត់ខ្លួនយុវជនទាំង២នាក់ខាងលើ បានធ្វើឡើងកាលពីវេលាម៉ោង១២ និង៤៥នាទីយប់ រំឡងអធ្រាត្រ ឈានចូលថ្ងៃទី១០ ខែវិច្ឆិកា ឆ្នាំ២០១៥ នៅលើកំណាត់ផ្លូវជាតិលេខ៥ ស្ថិតក្នុងសង្កាត់ទួលសង្កែ ខណ្ឌឫស្សីកែវ ។
យុវជនដែលត្រូវឃាត់ខ្លួនទាំង២នាក់ទី១ ឈ្មោះ សុខ សុផៃ ហៅអាម៉ៅ ភេទប្រុស អាយុ២២ឆ្នាំ មានមុខរបរជាងដែកស្នាក់នៅភូមិទេពប្រណម ឃុំកំពង់លួង ស្រុកពញាឮ ខេត្តកណ្តាល និងម្នាក់ទៀតឈ្មោះ លុយ ជីអា័ងំ ភេទប្រុស អាយុ២១ឆ្នាំ មានមុខរបរអ៊ុតម៉ូតូ ស្នាក់នៅភូមិឧតង្គ ឃុំវាំងចាស់ ស្រុកពញាឮ ខេត្តកណ្តាល ។
ប្រភពពត័មមានពីសមត្ថកិច្ចបានឲ្យដឹងថា ខណៈពេលល្បាត មកដល់ចំណុចគល់ស្ពានលីយ៉ុងផាត់ ស្រាប់តែប្រទះឃើញយុវជន២នាក់ជិះម៉ូតូមួយគ្រឿងម៉ាកនិច ពណ៌សលាយត្រួយចេក អត់ស្លាកលេខ ទិសដៅពីជើងទៅត្បូង។ ពេលនោះកម្លាំងក៏បានឃាត់សួរនាំ តែជនសង្ស័យមិនព្រមឈប់ ទើបសមត្ថកិច្ចដេញតាមរហូតដល់ផ្លូវទាល់មុខផ្សារទួលសង្កែ ទើបសមត្ថកិច្ចឃាត់បានយកទៅសួរនាំ ក៏ឆែកឆេករកឃើញមានកាំបិតបុ័ងតោមួយនិងកន្ត្រៃមួយ ទើបឃាត់ខ្លួនតែម្ដង ។
ក្រោយពីត្រូវសមត្ថកិច្ចឃាត់ខ្លួនយុវជនទាំង២នាក់បានឲ្យដឹងថា មុនពេលកើតហេតុពួកគេបានជិះម៉ូតូ បំណងទៅក្លឹប។ ខណៈពេលជិះមកដល់ចំណុចខាងលើ ក៏ត្រូវសមត្ថកិច្ចដេញចាប់បានត្រង់ចំណុចផ្លូវទាល់ម្តុំផ្សារទួលសង្កែឆែកឆេររកឃើញកាំបិតបុ័ងតោ ជារបស់បងគេផ្ញើ ។
បច្ចុប្បន្នជនសង្ស័យទាំង២នាក់សមត្ថកិច្ចយកទៅសាកសួរធ្វើសវតារ និងថតរូបភាពទុកជាឯកសារ រួចហើយបានដោះលែងឲ្យត្រឡប់ទៅវិញ ដោយសមត្ថកិច្ចអះអាងថាមិនមានជាប់ពាក់ព័ន្ធ នឹងបទល្មើស ទោះបីជាមានកាំបិតនិងកន្ត្រៃក៏ដោយ ៕
ដោយ៖ អារុណរះ
