ខេត្តកំពង់ធំ៖ នៅវេលាម៉ោង១០ និង២០នាទីអគ្គីភ័យបានលេបត្របាក់ផ្ទះឈើប្រកស័ង្ខសីមួយចំហៀង ទំហំ៤គុណ៦ម ស្ថិតនៅភូមិតាអាំ ឃុំព្រៃគុយ ស្រុកកំពង់ស្វាយ ខេត្តកំពង់ធំ ខណៈពេលដែលម្ចាស់មិននៅផ្ទះ ហើយពុំបានពន្លត់ភ្លើងចង្ក្រាន បណ្តាលឲ្យភ្លើងឆាបឆេះយ៉ាងសន្ធរសន្ធៅ ស្របពេលដែលកងកម្លាំងប៉ូលិសទាហាន និងប្រជាពលរដ្ឋបាននាំគ្នាជួយពន្លត់និងទប់ស្កាត់បានទាន់ពេលវេលា ។
តាមប្រភពព័ត៌មាន ពីអ្នកភូមិដែលបានឃើញហេតុការណ៍បានឲ្យដឹងថា មុនពេលកើតហេតុ អុំស្រីម្នាក់ឈ្មោះ គុម ញឹប អាយុ៦៨ បន្ទាប់ពីកូនៗមានគ្រួសារអស់ទៅ គាត់រស់នៅជាមួយតា យាយ ពីរនាក់ នៅថ្ងៃកើតហេតុ លោកតា បានទៅសុំសិល្ប៍នៅវត្ត ចំណែកលោកយាយនៅផ្ទះ ក្រោយពីលោកយាយដាំបាយឆ្អិន លោកយាយបានផ្ងុមទុក ហើយពុំបានពន្លតភ្លើងចង្ក្រាន ហើយបានចុះទៅប្រកបកិច្ចការផ្ទាល់ខ្លួន លុះក្រោយមកក៏ឃើញផ្សែងហុយចេញពីទីតាំងកន្លែងចង្រ្កាន ហើយមានអណ្តាតភ្លើងឆេះខ្មួលខ្មាញ់ ទើបប្រជាពលរដ្ឋ ប្រុសស្រី រួមជាកងកម្លាំងបានជួយគ្នាពន្លត់បានទាន់ពេលវេលានៅព្រឹកថ្ងៃទី១០ ខែវិច្ឆិកា ឆ្នាំ ២០១៥ ។
សូមបញ្ជាក់ផងដែរថា ករណីគ្រោះអគ្គីភ័យលេបត្របាក់នេះ ពុំបានធ្វើឲ្យមានការគ្រោះថ្នាក់ដល់បុគ្គលណាម្នាក់នោះទេ ចំណែកការខូចខាតគឺភ្លើងបានឆេះជញ្ជាំងមួយចំហៀងផ្នែកចង្ក្រានបាយ តែភ្លើងពុំអាចឆេះរាលដាលខ្លាំងក្លានោះទេ ដោយសារតែផ្ទះនេះប្រកស័ង្ខសី ទើបការឆេះមានកាយឺតយ៉ាវ ។
ខណៈពេលភ្លើងកំពុងតែឆេះ ឯកឧត្តម អ៊ុត សំអន អភិបាលខេត្តកំពង់ធំ បានជួយធ្វើសកម្មភាពពន្លត់អគ្គីភ័យយ៉ាងសស្រាក់សស្រាំ ទីបំផុតភ្លើងរលត់ដោយសុវត្តិភាព ឯកឧត្តម បានផ្តាំផ្ញើបន្ថែមលើលោកយាយ និងប្រជាពលរដ្ឋទាំងអស់ឲ្យមានការប្រុងប្រយ័ត្នខ្ពស់ដោយសារតែឈានចូលរដូវរំហើយ អាចនិងបង្កឲ្យមានការឆាបឆេះផ្ទះសំបែងបាន ករណីដែលយើងមានការធ្វេសប្រហែស ជាចុងក្រោយឯកឧត្តម បានផ្តល់ទឹកក្រូច មី និងថវិកា ២០ម៉ឺនរៀលដល់លោកយាយ ទុកគ្រាន់ទិញសម្ភារៈជួសជុលផ្ទះឡើងវិញ នៃឳកាសនោះ ឯកឧត្តមបានឈ្លៀតពេលនាំយក ទឹកក្រូច និងទឹកសុទ្ធ រួមទាំងថវិកា១០ម៉ឺនរៀល ប្រគេនដល់ព្រះចៅអធិការវត្តតាប៉ោងផងដែរ ៕
ដោយ៖ ប៊ុន រិទ្ធី
