ភ្នំពេញ៖ កាលពីវេលាម៉ោង៩ព្រឹកថ្ងៃទី១០ ខែវិច្ឆិកា ឆ្នាំ២០១៥កម្លាំងគយចល័តរាជធានីភ្នំពេញ និងមានការចូលរួមដោយលោកមាស ចាន់ពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ សហការជាមួយកម្លាំងកងរាជអាវុធហត្ថលើផ្ទៃប្រទេសបានចុះឆែកឆេរ និងត្រួតពិនិត្យនៅលំនៅឋានមួយកន្លែងនិងបានរកឃើញរថយន្តស៊េរីទំនើប២គ្រឿងអត់បង់ពន្ធ ។
រថយន្ត២គ្រឿងដែលគេចពន្ធនេះគឺបាន ពួនសំងំនៅក្នុងផ្ទះលេខ៦២ ផ្លូវលេង៤៤០ នៅក្រោយផ្សារទួលទំពូង ស្ថិតក្នុងសង្កាត់ទួលទំពូងទី២ ខណ្ឌចំការមន រាជធានីភ្នំពេញ ដែលរថយន្តទី១-ម៉ាកឡិចស៊ីស RX350 ពណ៌ខ្មៅ ពាក់ស្លាកលេខនគរបាល 2-8171 និងរថយន្តទី២ ម៉ាកអូឌី ពណ៌ស ពាក់ស្លាកលេខនគរបាល 2-7181 ។
រថយន្តស៊េរីទំនើបទាំង២គ្រឿងខាងលើនេះ ត្រូវបានសមត្ថកិច្ចដកហូតយកទៅរក្សាទុកនៅមណ្ឌលឃ្លាំងរបស់គយចល័តរាជធានីភ្នំពេញ និងរដ្ឋាករផ្នែកបង្ការ និងបង្ក្រាបបទល្មើសគេចពន្ធរួចរាល់ហើយ ដើម្បីឱ្យម្ចាស់ទៅបង់ពន្ធ និងផាកពិន័យតាមផ្លូវច្បាប់ ។
ក្រោយពេលចុះឆែកឆេរ និងត្រួតពិនិត្យនៅលំនៅឋានខាងលើនេះក្រុមអ្នកកាសែតត្រូវបានអង្គរក្សមួយក្រុមរបស់មន្ត្រីជាន់ខ្ពស់ដែលគេជឿថា មានអំណាចម្នាក់នៅពីក្រោយ បានមកចោមរោមជុំជិតរារាំងមិនអោយថត ៕
...
ដោយ៖ ស រស្មី
