ភ្នំពេញ៖ ជនសង្ស័យជានារីមានផ្ទៃពោះ៧ខែម្នាក់ រួមនិងបុរសម្នាក់ទៀត ត្រូវបានសមត្ថកិច្ចនគរបាលប៉ុស្តិ៍ស្ទឹងមានជ័យ១ ធ្វើការស្រាវជ្រាវឃាត់ខ្លួនបានជាបន្តបន្ទាប់នៅចំណុច២ទីតាំងផ្សេងគ្នា ដកហូតបានថ្នាំញៀនសរុបចំនួន២១កញ្ចប់។
ប្រតិបត្តិការនេះបានធ្វើឡើងកាលពីវេលាម៉ោង១០ព្រឹក ថ្ងៃទី៣ ខែឧសភា ឆ្នាំ២០១៨ ស្ថិតនៅចំណុច តាមបណ្តោយផ្លូវលំ ក្នុងភូមិមានជ័យ១ សង្កាត់ស្ទឹងមាន ជ័យទី១ ខណ្ឌមានជ័យ រាជធានីភ្នំពេញ។
សមត្ថកិច្ចប៉ុស្តិ៍ស្ទឹងមានជ័យទី១ បានឲ្យដឹងថា ជនសង្ស័យទាំង២នាក់ ដែលឃាត់ខ្លួននេះមានឈ្មោះ ទី១មានឈ្មោះ ថាច់ សុអារិយ៉ា ភេទស្រី អាយុ១៦ឆ្នាំ មានស្រុកកំណើតនៅស្រុកព្រះព្រណាំង កម្ពុជាក្រោម ដកហូតបានថ្នាំញៀន១៦កញ្ចប់។ ចំណែកជនសង្ស័យទី២ឈ្មោះ សឿន ច្រឹម ភេទប្រុស អាយុ១៨ឆ្នាំ មានស្រុកកំណើតនៅភូមិដំរីស្លាប់ ឃុំបន្ទាយចក្រី ស្រុកព្រះស្តេច ខេត្តព្រៃវែង បច្ចុប្បន្នស្នាក់នៅផ្ទះជួល ភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ ដកហូតបានថ្នាំញៀនចំនួន៥កញ្ចប់។
សមត្ថកិច្ចបានឲ្យដឹងថា មុននឹងឈានដល់ការឃាត់ខ្លួនបានជនសង្ស័យខាងលើ ដោយមានការបញ្ជាយ៉ាងម៉ឺងម៉ាត់ ពីសំណាក់នាយឧត្តមសេនីយ៍អគ្គស្នងការរងនគរបាល និងជាស្នងការនគរបាលរាជធានីភ្នំពេញ ក៏ដូចជាលោកវរសេនីយ៍ឯក តេង ស៊ីណូ អធិការនគរបាលខណ្ឌមានជ័យ ទើបលោក ម៉ៅ សាវឿន នាយនគរបាលប៉ុស្តិ៍ស្ទឹងមានជ័យ បានណែនាំឲ្យនគរបាលប៉ុស្តិ៍ចុះដើរល្បាតក្នុងមូលដ្ឋានដើម្បីការពារសន្តិសុខ ជូនបងប្អូនប្រជាពលរដ្ឋ ទើបប្រទះឃើញជនសង្ស័យដែលជាយុវជនខាងលើ ដោយមានការសង្ស័យ សមត្ថកិច្ចបានឃាត់ឲ្យឈប់ដើម្បីធ្វើការត្រួតពិនិត្យ ស្រាប់តែរកឃើញថ្នាំញៀនចំនួន៦កញ្ចប់ នៅក្នុងខោប៉ៅ ទើបឃាត់ខ្លួនជនសង្ស័យយកមកសាកសួរ។
ក្រោយពីសាកសួរចប់ហើយនោះ សមត្ថកិច្ចបានបន្តធ្វើការឃាត់ខ្លួនបាននារីមានផ្ទៃពោះ៧ខែម្នាក់ ដោយដកហូតបានថ្នាំញៀន១៥កញ្ចប់ បន្ថែមទៀត ហើយនារីរូបនេះបានសារភាពថា ខ្លួនប្រកបមុខរបរបែបនេះ គឺដោយសារតែខ្លាចគ្មានលុយទិញទឹកដោះគោឲ្យកូន ព្រោះនាងមានផ្ទៃពោះជិតគ្រប់ខែទៅហើយ។
បច្ចុប្បន្នជនសង្ស័យខាងលើ រួមនិងវត្ថុតាង ត្រូវបានសមត្ថកិច្ចនគរបាលប៉ុស្តិ៍ស្ទឹងមានជ័យទី១ ធ្វើការសាកសួរនិងបញ្ជូនខ្លួនទៅកាន់ អធិការដ្ឋាននគរបាលខណ្ឌមានជ័យ ដើម្បីឃាត់ខ្លួនបណ្តោះអាសន្ន និងកសាងសំណុំរឿងបញ្ជូនខ្លួនទៅកាន់សាលាដំបូងរាជធានីភ្នំពេញ ដើម្បីចាត់ការបន្តទៀត៕
