ខេត្តកំពង់ស្ពឺ៖ ប្រសាសន៍ជាកិច្ចស្វាគមន៍នៅចំពោះមុខកម្មករ កម្មការិនីជិត ២ម៉ឺននាក់នៅក្នុងខេត្តកំពង់ស្ពឺ សម្តេចតេជោ ហ៊ុន សែន បានថ្លែង ថា សម្តេចរីករាយខ្លាំងណាស់ ដែលបានអញ្ជើញ មកជួបបងប្អូនកម្មករ កម្មការិនីតាមការគ្រោងទុក។
-សម្តេចតេជោ ហ៊ុន សែន បានបញ្ជាក់ថា ប្រាក់ឈ្នួលអប្បបរមាមិនមែននៅទ្រឹងត្រឹម ១៧០ដុល្លារនោះទេ ពោលនឹងមានការឡើងជាបន្តបន្ទាប់ទៀត តែត្រូវធានាថាក្រុមហ៊ុននៅអាចទទួលបានប្រាក់ចំណេញ ហើយអាចបន្តដំណើរការបាន។
-សម្តេចនាយករដ្ឋមន្ត្រី បានថ្លែងថា អ្នកជេរសម្តេចច្រើនពេកអាចត្រូវរន្ទះបាញ់ ក្រឡាប់រថយន្ត និងឆក់ខ្សែភ្លើងស្លាប់ជាដើម។
-សម្តេចតេជោ ហ៊ុន សែន បានថ្លែងថា លោក សម រង្ស៊ី នឹងចាញ់លើសមរភូមិនយោបាយក្នុងការធ្វើប្រជាមតិលើចំនួនប្រជាពលរដ្ឋទៅបោះឆ្នោត។
-សម្តេចនាយករដ្ឋមន្ត្រីបានថ្លែងថា ដើម្បីបុព្វហេតុជាតិ និងប្រជាជន ទោះសម្តេចត្រូវការជេរប្រមាថពីក្រុមអ្នកចង់បំផ្លាញជាតិយ៉ាងក៏សម្តេចស៊ូទ្រាំដែរ។ សម្តេចតេជោថា មិនមាននរណាជេរសម្តេចជាង ប៉ុល ពត និងខៀវ សំផន នោះទេ។ តែទីបំផុត ប៉ុល ពត ស្លាប់អត់កន្លែងកប់ ខៀវ សំផន បាននាំទាំងភរិយាមកជួបសម្តេចទៀតផង។
-សម្តេចតេជោ ហ៊ុន សែន ប្រាប់កម្មករបោះឆ្នោតជូនគណបក្សប្រជាជនកម្ពុជា ដើម្បីទទួលបានតំណាងរាស្ត្រវ័យក្មេងជាកូនសម្តេច (លោក ហ៊ុន ម៉ានី) ជួយមើលការខុសត្រូវ និងអភិវឌ្ឍន៍ខេត្តកំពង់ស្ពឺ។
-សម្តេចតេជោ ហ៊ុន សែន បានថ្លែងថា ខេត្តកំពង់ស្ពឺមានភ័ព្វសំណាងមានផ្លូវ និងបណ្តាញអគ្គិសនីច្រើនសម្រាប់ប្រជាពលរដ្ឋធ្វើដំណើរ និងប្រើប្រាស់។
-សម្តេចនាយករដ្ឋមន្ត្រី បានថ្លែងថា គ្មាននរណានឹកស្មានដល់ថា ខេត្តកំពុងស្ពឺដែលញាប់ញីដោយភ្លើងសង្គ្រាម ហើយទើបរំលត់បានទាំងស្រុងនៅចុងទសវត្សរ៍ឆ្នាំ៩០ បានប្រែក្លាយជាតំបន់ឧស្សាហកម្មមានរោងចក្រសហគ្រារហូតដល់ទៅ ២៥ មានកម្មករ និយោជិត ៩៨,២១៣នាក់ ដែលជាមានប្រាក់ឈ្នួលសរុបជាង ២២០លានដុល្លារក្នុងមួយឆ្នាំ។
-សម្តេចតេជោ ហ៊ុន សែន បានថ្លែងថា បន្ទាប់ពីនយោបាយពង្រាយសាលារៀនទៅតាមភូមិឋានប្រជាពលរដ្ឋហើយនោះ នយោបាយពង្រាយរោងចក្រទៅតាមបណ្តាខេត្តជិតកន្លែងរស់នៅរបស់ប្រជាពលរដ្ឋជាចក្ខុវិស័យអាទិភាពរបស់រាជរដ្ឋាភិបាល។ សម្តេចនាយករដ្ឋមន្ត្រីថា នៅសល់តែប៉ុន្មានខែទៀត ឈានចូលដល់ខួបលើកទី២០ នៃនយោបាយពង្រាយរោងចក្រទៅតាមបណ្តាខេត្ត។
-សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានថ្លែងថា មិនមានការកំណត់ថាចំនួនអ្នកបោះឆ្នោតប៉ុណ្ណេះ ឬប៉ុណ្ណោះទើបទទួលបាននោះទេ ប៉ុន្តែគ្រាន់តែសមាជិក សមាជិការបស់គណបក្សប្រជាជនកម្ពុជាមានរហូតដល់ទៅ ៥លាននាក់ទៅហើយ។
-សម្តេចតេជោ ហ៊ុន សែន បានថ្លែងរំលឹកថា អតីតព្រះមហាក្សត្រ សម្តេចព្រះបរមរតនកោដ្ឋ នរោត្តម សីហនុ ធ្លាប់បានមានព្រះរាជបន្ទូលថា ព្រហ្មលិខិតបានចារឲ្យសម្តេចធ្វើជានាយករដ្ឋមន្ត្រី ដូចដែលព្រះអង្គដែរត្រូវបានចារមកឲ្យធ្វើជាព្រះមហាក្សត្រ។
-សម្តេចនាយករដ្ឋមន្ត្រី បានរំលឹកថា អ្វីដែលកម្ពុជាកំពុងមាននាពេលបច្ចុប្បន្ននេះ មិនមែនជារឿងងាយស្រួលនោះទេ គឺបានមកពីរួមគ្នាខិតខំរវាងប្រជាពលរដ្ឋ ជាពិសេសគឺសម្តេចដើម្បីជាតិកម្ពុជានេះ គឺសម្តេចបានផ្សារភ្ជាប់ជាមួយជាតិ និងប្រជាជនគ្រប់កាលៈទេសៈទាំងអស់ចាប់តាំងពីឆ្នាំ១៩៧៩មក។
-សម្តេចតេជោ ហ៊ុន សែន បានថ្លែងថា ការឆ្លងជំងឺអេដស៍ហាក់កម្រើកឡើងវិញបន្តិច។ ដូច្នេះសម្តេចតេជោ បានអំពាវនាវឲ្យមានការប្រើប្រាស់ស្រោមអនាម័យជាមួយដៃគូនៅពេលរួមភេទ ដើម្បីការពារការរីករាលដាលជំងឺអេដស៍ និងអំពាវនាវឲ្យមានការពិនិត្យឈាមមុនពេលរៀបការ។
-សម្តេចតេជោ ហ៊ុន សែន បានថ្លែងថា កម្មករ កម្មការិនី បានចាត់ទុកសម្តេចត្រឹមតែជាមេដឹកនាំនោះទេ គឺបានចាត់ទុកសម្តេចដូចជាសាច់ញាតិផងដែរ។ សម្តេចបានថ្លែងអំណរគុណចំពោះទឹកចិត្តរបស់កម្មករ កម្មការិនី ហើយសង្ឃឹមថា ទឹកចិត្តនេះ នឹងបន្តកើតមានសម្រាប់ការបោះឆ្នោតនៅថ្ងៃទី២៩ ខែកក្កដា ខាងមុខនេះ។
-សម្តេចនាយករដ្ឋមន្ត្រី បានបញ្ជាក់ថា បើអ្នកគាំទ្របក្សសង្គ្រោះជាតិមិនទៅបោះឆ្នោត គឺលទ្ធផលឆ្នោតកាន់តែល្អ ព្រោះគណបក្សប្រជាជនកម្ពុជានឹងទទួលបានសំឡេងឆ្នោតកាន់តែប្រសើរ។ តែសម្តេចចង់ឲ្យប្រជាពលរដ្ឋចេះប្រើប្រាស់សិទ្ធិរបស់ខ្លួន ទើបអំពាវនាវឲ្យពលរដ្ឋទៅបោះឆ្នោតឲ្យបានគ្រប់គ្នា។
-សម្តេចតេជោ ហ៊ុន សែន អំពាវនាវប្រជាពលរដ្ឋឲ្យទៅបោះឆ្នោតឲ្យបានគ្រប់គ្នានៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ដើម្បីប្រើប្រាស់សិទ្ធិ៥ឆ្នាំម្តងក្នុងការជ្រើសមេដឹកនាំរបស់ខ្លួន៕
ដោយ៖ សុខ ខេមរា