ខេត្តកណ្ដាល៖ មហាជនប្រតិកម្មខ្លាំងៗ ក្រោយលោកលាវ ស្រេង ព្រះរាជអាជ្ញានៃអយ្យការអមសាលាដំបូងខេត្តកណ្ដាល ឯកភាពអនុញ្ញាតឱ្យមនុស្ស៤នាក់ត្រឡប់ទៅវិញ ពាក់ព័ន្ធករណីគ្រោះថ្នាក់ចរាចរស្លាប់ប្តីប្រពន្ធពីរនាក់និងកូនក្នុងផ្ទៃជិតគ្រប់ខែឱ្យមានសេរីភាពឡើងវិញ នៅស្រុកពញាឮ ។
ពុំទាន់អាចសុំការបញ្ជាក់ពីលោកទិន សុចិត្រា អ្នកនាំពាក្យអយ្យការអមសាលាដំបូងខេត្តកណ្ដាល បានទេ នៅព្រឹកថ្ងៃទី២៣ ខែឧសភា ឆ្នាំ២០១៨ នេះ ដោយសារទូរស័ព្ទចូលគ្មានអ្នកទទួល ។ ប៉ុន្តែនាយផ្នែកចរាចរណ៍ស្រុកពញាឮ បញ្ជាក់ថា ការអនុញ្ញាតឱ្យត្រឡប់ទៅវិញនេះ គឺ ការសម្រេចរបស់ព្រះរាជអាជ្ញា ដោយសំអាងថា ម៉ូតូជនរងគ្រោះជាអ្នកខុស ។
គ្រោះថ្នាក់ចរាចរដ៏រន្ធត់នេះ បានកើតឡើងកាលពីថ្ងៃទី១៨ ខែឧសភា ឆ្នាំ២០១៨ ស្ថិតនៅចំណុចភូមិអំពិលដាំទឹក ឃុំវិហារហ្លួង ស្រុកពញាឮ ខេត្តកណ្តាលលើកំណាត់ផ្លូវជាតិលេខ៥ ចន្លោះគីឡូម៉ែត្រ៣៦-៣៧។
សាច់ញាតិជនរងគ្រោះ បានទទូចស្នើសុំឱ្យសមត្ថកិច្ច និងស្ថាប័នតុលាការ ធ្វើការស្រាវជ្រាវឡើងវិញ នូវសោកនាដកម្មមួយនេះ ដើម្បីឱ្យជនរងគ្រោះស្លាប់ទៅ ដោយស្ងប់ចិត្ត
ប្រជាពលរដ្ឋរស់នៅក្បែរកន្លែងកើតហេតុ និងបានឃើញទិដ្ឋភាពគ្រោះថ្នាក់ចរាចរនេះផ្ទាល់ភ្នែក បាននិយាយថា មុនពេលកើតហេតុ ជនរងគ្រោះជាប្តី បានឌុបកូន និងប្រពន្ធដោយបើកយឺតៗ ធ្វើដំណើរខាងស្តាំដៃរបស់ខ្លួន ស្រាប់តែពេលនោះ ក៏មានម៉ូតូមួយគ្រឿង បើកដោយយុវជនម្នាក់ និងអ្នករួមដំណើរពីរនាក់ បើកឆ្លងផ្លូវពីជើងទៅត្បូងទៅរកស្តាំរបស់គាត់ ក៏បានប៉ះដៃចង្កូតម៉ូតូជនរងគ្រោះ បណ្តាលឱ្យដួលទាំងសងខាង។
ស្របពេលនោះក៏មានរថយន្តធំមួយគ្រឿង ធុនភ្លៅ៥ បើកបរមកក្នុងល្បឿនលឿន ពីក្រោយម៉ូតូជនរងគ្រោះ រួចក៏ជ្រុលទៅកិនជនរងគ្រោះទាំងបីនាក់ បណ្តាលឱ្យស្លាប់ភ្លាមៗនៅនិងកន្លែងកើតហេតុ ខណៈកូនស្រីតូចម្នាក់ទៀត រងរបួសបែកប្រអប់ជើងខ្ទេច។ តែអ្វីដែលគួរឱ្យសង្វេគបំផុតនោះ គឺស្ត្រីជាប្រពន្ធមានផ្ទៃពោះជិតគ្រប់ខែ បណ្តាលឱ្យបែកពោះចេញទារកមកខាងក្រៅផ្ទៃស្លាប់ទាំងអស់គ្នាតែម្តងទៅ។
តាមការបំភ្លឺពីអ្នករស់នៅជិតកន្លែងកើតហេតុនោះ យុវជនដែលបើកម៉ូតូឆ្លងផ្លូវក៏ជាជនបង្ក ចំណែកអ្នកបើកបររថយន្តបើករថយន្តដឹកទំនិញធុនធំលឿនហួសល្បឿន ទៅកិនជនរងគ្រោះ ស្លាប់ ក៏ជាជនបង្កផងដែរ ។ ប៉ុន្តែសមត្ថកិច្ចបានឱ្យអ្នកទាំងនេះវិលត្រឡប់ទៅលំនៅដ្ឋានវិញ មិនឃាត់ខ្លួនឱ្យទទួលខុសត្រូវចំពោះមុខច្បាប់ឡើយ ដោយពួកគាត់បាននិយាយថា ការដោះលែងអ្នកបង្កទាំងនេះ ឲ្យមានសេរីភាពនោះ សង្ស័យមានពាក់ព័ន្ធលាភសការៈអ្វីមួយហើយមើលទៅ។
ក្រុមគ្រួសារសព បានបន្តថា ភ្លាមៗនោះ ពួកគាត់សួរនាំសមត្ថកិច្ចដែរ តែសមត្ថកិច្ចអះអាងថា វត្ថុតាងត្រូវយកទៅរក្សាទុក ចំណែកអ្នកបើកបរត្រូវបញ្ជូនចាត់ការទៅតាមផ្លូវច្បាប់ ប៉ុន្តែក្រោយមកទើបទទួលព័ត៌មានថា អ្នកបើកបរត្រូវបានគេដោះលែងហើយ ដោយមានការឯកភាពពីអយ្យការអមសាលាដំបូងខេត្តកណ្តាលផងដែរ។ ចំណែកឯយុវជន៣នាក់ជាអ្នកបើកម៉ូតូបង្ក ក៏ត្រូវបានផ្តិតមេដៃឱ្យរួចខ្លួនដូចគ្នា។
ក្រុមគ្រួសារជនរងគ្រោះ បានបញ្ជាក់ថា ប្រសិនបើសមត្ថកិច្ច ឬតុលាការមិនធ្វើការស្រាវជ្រាវម្តងទៀតឲ្យបានសមរម្យនោះទេ ពួកគាត់នឹងដាក់ពាក្យបណ្តឹងបន្តបន្ទាប់ ហើយនឹងដាក់ពាក្យបណ្តឹងទៅអង្គភាព ប្រឆាំងអំពើពុករលួយ ដើម្បីឲ្យអង្គភាពមួយនេះ ជួយរកយុត្តិធម៌ជូនក្រុមគ្រួសាររងគ្រោះ។
ជនរងគ្រោះជិះម៉ូតូម៉ាកស៊ុយហ្សុយគីវីវ៉ា ពណ៌ខ្មៅ ពាក់ស្លាកលេភ្នំពេញ 1CW-9392 បើកបរក្នុងទិសដៅពីកើតទៅលិចមានឈ្មោះ ធ្លក សុផល អាយុ៤៦ឆ្នាំ ទីលំនៅភូមិ ស្រែចិន្ដា ឃុំព្រះស្រែ ស្រុកឧដុង្គ ខេត្តកំពង់ស្ពឺ និងប្រពន្ធឈ្មោះ ចាន់ សុខឃីម (ស្លាប់ទាំងកូនក្នុងផ្ទៃ) និងកូនស្រីម្នាក់រួមដំណើរ មិនទាន់ស្គាល់ឈ្មោះរងរបួសធ្ងន់ត្រូវបញ្ជូទៅសង្គ្រោះនៅមន្ទីរពេទ្យគន្ធបុប្ផា។
អ្នកបើកម៉ូតូបង្កមានឈ្មោះ ឆួ ឆាងឈុន អាយុ១៧ឆ្នាំ ទីលំនៅភូមិកំពង់ចុះវា ឃុំវិហារហ្លួង ស្រុកពញាឮ ខេត្តកណ្តាល ដោយមានអ្នករួមដំណើ២នាក់ទី១៖ ឈ្មោះ ណែម សុខាវីត ភេទប្រុស អាយុ១៧ឆ្នាំ ទីលំនៅភូមិប្រក់ក្តា ឃុំវិហារហ្លួង ស្រុកពញាឮ ខេត្តកណ្តាល និងទី២ឈ្មោះ ប៉ាន កុសល អាយុ១៩ឆ្នាំ ទីលំនៅភូមិចេតីយ៍ថ្មី ឃុំវិហារហ្លួង ស្រុកពញាឮ ខេត្តកណ្តាល។ ដោយឡែកអ្នកបើករថយន្ត Hyundai ពណ៌ស ពាក់ស្លាកលេខភ្នំពេញ 3B-9354 ឈ្មោះ ព្រាប ធា អាយុ៣២ឆ្នាំ ទីលំនៅភូមិ កំពង់ត្រាច ឃុំកំពង់ត្រាច ស្រុករមាសហែក ខេត្តស្វាយរៀង។
លោកទឹម វុត្ថា នាយផ្នែកចរាចរណ៍ស្រុកពញាឮ បញ្ជាក់ថា ទោះបីមានការដោះលែងក៏ដោយ តែសំណុំរឿងបានបញ្ជូនបន្តទៅថ្នាក់លើ ដើម្បីបន្តនីតិវិធី ៕
ដោយ៖ សុខ ខេមរា
