ភ្នំពេញ៖ ទីតាំងសិប្បកម្មឈើចំនួន ៤ គោលដៅស្ថិតនៅក្នុងភូមិ ចំរើនផល សង្កាត់ បឹងទំពុន ខណ្ឌមានជ័យត្រូវបានក្រុមប្រតិបត្តិការចម្រុះរបស់ អគ្គនាយកដ្ឋាននគរបាលអន្តោប្រវេសន៍ ក្រសួងមហាផ្ទៃចុះទៅឆែកឆេរនិងត្រួតពិនិត្យ បន្ទាប់ពីដឹងថា ទីតាំងទាំងនេះមានជនជាតិបរទេស(វៀតណាម)ច្រើននាក់កំពុងមកស្នាក់នៅខុសច្បាប់ ។
កិច្ចប្រតិបត្តិការនេះបានប្រព្រឹត្តទៅនៅវេលាម៉ោង២រសៀលថ្ងៃទី១២ ខែវិច្ឆិកា ឆ្នាំ២០១៥ នៅចំណុចខាងលើដោយបានឃាត់ខ្លួនជនជាតិវៀតណាម ចំនួន ១៥ នាក់ក្នុងនោះមានស្រីចំនួន ៥នាក់ ដែលមកស្នាក់នៅគ្មានលិខិតស្នាម និងឯកសារពាក់ពន្ធ័ បង្ហាញសមត្ថកិច្ច ។
មន្រី្តនគរបាលអន្តោប្រវេសន៍ក្រសួងមហាផ្ទៃបានឲ្យដឹងថា ជនជាតិវៀតណាមទាំង១៥នាក់នេះបានចូលមកស្នាក់នៅទីតាំងសិប្បកម្មឈើផលិតតុ ទូ និងគ្រឿងសង្ហារឹមផ្សេងៗយូរខែមកហើយ ។ ការស្នាក់នៅនេះ ពួកគេគ្មានលិខិតស្នាក់នៅ លិខិតឆ្លងដែន និងសៀវភៅការងារស្របតាមគោលការណ៍របស់រាជរដ្ឋាភិបាលនោះទេ ម្ល៉ោះហើយទើបអគ្គនាយកដ្ឋានអន្តោប្រវេសន៍ក្រសួងមហាផ្ទៃមានចំណាត់ការតាមច្បាប់ចុះមកត្រួតពិនិត្យដល់សិប្បកម្មមួយនេះតែម្តង ហើយប្រសិនណានាំពួកគេយកទៅសាកសួរនៅអគ្គនាយកដ្ឋានឃើញថា គ្មានលិខិតស្នាមត្រឹមត្រូវទេ យើងនិងសុំគោលការណ៍ពីថ្នាក់ដឹកនាំក្រសួងមហាផ្ទៃដើម្បី បណ្តេញពួកគេចេញពីកម្ពុជាទៅប្រទេសវៀតណាមវិញ ៕
ដោយ៖ ប្រាថ្នា
