ភ្នំពេញ៖ អ្នកយាមម៉ូតូ(សន្តិសុខ)នៅហាងផឹកសុីមួយកន្លែងយីហោម្ហូបស្រស់លើភ្នំ បានលួចម៉ូតូរបស់ភ្ញៀវ ដែលចូលមកញុាំអីក្នុងហាងហើយភ្លេចដកសោរចេញពីម៉ូតូជិះយកទៅបាត់បង្កការភ្ញាក់ផ្អើកដល់សមត្ថកិច្ចនិងភ្ញៀវនៅក្នុងហាង។កាលពីថ្ងៃពុធ ៨រោច ខែជេស្ឋ ឆ្នាំច សំរឹទ្ធិស័ក្រ ពុទ្ធសករាជ ២៥៦២ ត្រូវនឹងថ្ងៃទី៦ ខែមិថុនា ឆ្នាំ២០១៨ វេលាម៉ោង១១និង៣០នាទីយប់នៅកន្លែងផ្ញើរម៉ូតូមុខហាងផឹកស៊ីយីហោ «ហាងម្ហូបស្រស់លើភ្នំ» ដែលស្ថិតនៅតាមបណ្ដោយផ្លូវ២០០៤ សង្កាត់អូរបែកក្អម ខណ្ឌសែនសុខ រាជធានីភ្នំពេញ (ជិតស្តុប NOKIA)។
ម្ចាស់ម៉ូតូឈ្មោះ ងួន រដ្ឋា អាយុ២១ឆ្នាំ មុខរបរធ្វើការក្រុមហ៊ុនឯកជន ស្នាក់នៅម្ដុំអូរបែកក្អម ខណ្ឌសែនសុខ រាជធានីភ្នំពេញ។ ចំណែកជនសង្ស័យដែលសន្តិសុខ(អ្នកយាមម៉ូតូ)ឈ្មោះ អូន នាង អាយុប្រហែល២៧ឆ្នាំ ស្នាក់នៅហាងកើតហេតុខាងលើ។
ប្រភពព័ត៌មានពីម្ចាស់ហាងបានរៀបរាប់ប្រាប់ឲ្យដឹងថា នៅមុនពេលកើតហេតុបុរសរងគ្រោះបានចូលមកជួបជុំមិត្តភក្តិផឹកស៊ីក្នុងហាង «ហាងម្ហូបស្រស់លើភ្នំ» ដោយបានយកម៉ូតូរបស់ខ្លួន ដែលទើបនឹងទិញ ម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ មួយគ្រឿង ពាក់ស្លាកលេខភ្នំពេញ 1GW-2968 ទៅផ្ញើរនៅកន្លែងផ្ញើរម៉ូតូមុខហាងខាងលើនោះ បន្ទាប់មកបុរសរងគ្រោះក៏បានចូលទៅអង្គុយជួបជុំមិត្តភក្តិក្នុងហាង រហូតដល់ម៉ោងជិត១១យប់ ទើបនាំគ្នាគិតលុយចេញមកវិញ ហើយគាត់ក៏បានដើរមកយកម៉ូតូ ដែលផ្ញើរនោះ ទើបដឹងថាបាត់ម៉ូតូបង្កឲ្យមានការភ្ញាក់ផ្អើលតែម្តង ។
បន្ទាប់ពីមានការភ្ញាក់ផ្អើលថាមានភ្ញៀវបាត់ម៉ូតូពេលនោះ បុរសដែលជាម្ចាស់ហាងកើតហេតុ បានបើកមើលក្នុងកាមេរ៉ាសុវត្ថិភាព ដែលបំពាក់នៅខាងមុខហាង ពេលនោះក៏បានឃើញពីសកម្មភាពរបស់សន្តិសុខដែលទើបចូលធ្វើការបានជិត៣ខែ ដែលយាមម៉ូតូនោះ បានធ្វើសកម្មភាពលួចយកម៉ូតូម៉ាកឌ្រីមរបស់បុរសរងគ្រោះ ។
ដោយពីដំបូងឡើយម៉ូតូឌ្រីម របស់បុរសរងគ្រោះដែលយកទៅផ្ញើរនោះបានភ្លេចដកកូនសោចេញពីម៉ូតូ ឃើញដូចនោះសន្តិសុខដែលជាជនសង្ស័យ បានដើរទៅដកសោទុក ហើយពេលមានឱកាសល្អ ក៏យកសោចាក់.កម៉ូតូជិះចេញទៅបាត់ដោយសុវត្ថិភាព។
ក្រោយពេលកើតហេតុម្ចាស់ហាងទាំងប្រុសស្រីបាននាំបុរសរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលអូរបែកក្អម។
ប្រភពពីសមត្ថកិច្ចនគរបាលប៉ុស្តិ៍អូបែកក្អមបានអោយដឹងថាក្រោយពីទទួលពាក្យបណ្តឹងពីជនរងគ្រោះហើយនោះកម្លាំងប៉ុស្តិ៍កំពង់តែធ្វើការស្រាវជ្រាវតាមចាប់មុខសញ្ញាជនសង្ស័យខាងលើដោយឡែកជនរងគ្រោះជាម្ចាស់ម៉ូតូក៍ត្រូវខាងម្ចាស់ហាង«យីហោ ហាងម្ហូបស្រស់លើភ្នំ»
ធ្វើការសម្របសម្រួលដោយគាត់ជាអ្នកចេញសងថ្លៃម៉ូតូអោយទៅជនរងគ្រោះវិញព្រោះថាជនសង្ស័យដែលលួចម៉ូតូភ្ញៀវយកទៅបាត់នោះគឺគាត់ជាអ្នកយកមកអោយធ្វើការតាមរយះចុងភៅរបស់គាត់ដូច្នេះគាត់សុខចិត្តទទួលខុសត្រូវដើម្បីបញ្ចប់រឿង៕
ដោយ៖ តុង សីហា
