ភ្នំពេញ ៖ កម្លាំងនគរបាលនាយកដ្ឋានប្រឆាំងបទល្មើសជួញដូរមនុស្ស និងការពារអនិតិជន នៃអគ្គស្នងការដ្ឋាននគរបាលជាតិ បានដឹកនាំកម្លាំងជាច្រើននាក់ ចុះបង្ក្រាបទីតាំងហាងធ្វើសរសៃបែបខ្មែរបុរាណ បាតដៃលាភសំណាង និងឃាត់ខ្លួនមនុស្សប្រុសស្រីចំនួន១០នាក់ ពាក់ព័ន្ធករណីបង្កប់បម្រើសេវាផ្លូវភេទកាលពីវេលាម៉ោង៧យប់ថ្ងៃ៥ ខែកក្កដា ឆ្នាំ២០១៨ ស្តិតនៅផ្ទះលេខ៥៦A តាមបណ្ដោយផ្លូវ១៤៦ ក្នុងសង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ។

ការបង្ក្រាបខាងលើនេះដែរមានការសម្របសម្រួលដោយលោក កុល ប៊ុន ព្រះរាជអាជ្ញារងអមសាលាដំបូងរាជធានីភ្នំពេញដឹកនាំដោយ លោកឧត្តមសេនីយ៍ទោ សំបូរ ម៉ាណ្ណារិទ្ធ អនុប្រធាននាយកដ្ឋានប្រឆាំងការជួញដូរមនុស្សនិងការពារអនិតិជន រួមទាំងកម្លាំងមានសមត្ថកិច្ចមូលដ្នានបានឃាត់ខ្លួនមេការ២នាក់និង មនុស្សប្រុសស្រី ពាក់ព័ន្ធករណីបង្កប់បម្រើសេវាផ្លូវភេទ។

ក្នុងនោះដែរជាលទ្ធផល កម្លាំងសមត្ថកិច្ចឃាត់ខ្លួនម្ចាស់ទីតាំងខាងលើ ដកហូតបានស្រោមអនាម័យមួយចំនួនធំ និងងបានរំដោះជួយ សង្គ្រោះដល់ក្មេងស្រី៤នាក់ ជាបន្តបន្ទាប់ផងដែរ។

បច្ចុប្បន្នជនសង្ស័យជាម្ចាស់ទីតាំងខាងលើ រួមនិងជនរងគ្រោះ សរុបទាំងអស់១០នាក់ ត្រូវបានសមត្ថកិច្ចនាំខ្លួនមកកាន់នាយកដ្ឋានប្រឆាំងបទល្មើសជួញដូរមនុស្ស និងការពារអនិតិជន នៃអគ្គស្នងការដ្ឋាននគរបាលជាតិ ដើម្បីកសាងសំណុំរឿងបញ្ជូនខ្លួនតុលាការចាត់ការតាមផ្លូវច្បាប់៕ ស រស្មី