ភ្នំពេញ៖ អង្គជំនុំជម្រះតុលាការកំពូលនៃសាលាក្តីខ្មែរក្រហមបានបើកសវនាការលើបណ្តឹងសាទុក្ខនៅថ្ងៃទី១៧ ខែ វិច្ឆិកា ឆ្នាំ ២០១៥ នេះ ប៉ុន្តែសវនាការនេះត្រូវបានផ្អាកទៅវិញនៅរសៀលថ្ងៃដដែល ដោយសារតែក្រុមមេធាវីការពារក្តីជនជាប់ចោទ នួន ជា មិនចូលរួម ក្នុងដំណើរការសវនាការតាមការបញ្ជារបស់ជនជាប់ចោទ។
ជនជាប់ចោទ នួន ជា ដែល ត្រូវបានអនុញ្ញាតឱ្យធ្វើសេចក្តីថ្លែងការណ៍នៅអំឡុងសវនាការ បានលើកឡើងថាលោកមិនពេញចិត្តនឹងចំណាត់ការនីតិវិធីរួមមានសេចក្តីសម្រេចនានារបស់អង្គជំនុំជម្រះតុលាការកំពូលដែលសម្រេចមិនកោះហៅសាក្សីបន្ថែមនិងបានចោទប្រកាន់ក្រុមចៅក្រមនៃអង្គជំនុំជម្រះតុលាការកំពូលថាមានភាពលម្អៀងដូចចៅក្រមនៃអង្គជំនុំជម្រះសាលាដំបូងដែរដោយមិនបានកោះហៅសាក្សីថ្មីៗបន្ថែមទៀតមកសាកសួរតាមសំណើរបស់គាត់និងបានបញ្ជាឱ្យមេធាវីកុំឆ្លើយទៅនឹងរាល់សំណួររបស់ភាគីពាក់ពន្ធនានានិងបញ្ជាមិនឱ្យចូលរួមនៅក្នុងដំណើរការសវនាការលើបណ្តឹងសាទុក្ខ។
លោក នេត្រ ភក្ត្រា មន្ត្រីនាំពាក្យសាលាក្តីខ្មែរក្រហមបានថ្លែងថា ក្រោយពីបានពិភាក្សាគ្នាមួយរយៈរួចមកក្នុងចំណោមចៅក្រមជាតិនិងអន្តរជាតិទាំង៧រូបរបស់អង្គជំនុំជម្រះតុលាការកំពូលលោកគង់ស្រ៊ីមប្រធានអង្គជំនុំជម្រះតុលាការកំពូលបានចេញនូវសេចក្តីសម្រេចផ្ទាល់មាត់មួយដោយផ្អាកដំណើរការសវនាការលើបណ្តឹងសាទុក្ខដែលគ្រោងធ្វើរយៈពេលបីថ្ងៃពីថ្ងៃទី១៧ ដល់ថ្ងៃទី១៩ ខែវិច្ឆិកានេះ និងរង់ចាំការសម្រេចលើកាលបរិច្ឆេទថ្មីនៃថ្ងៃសវនាការនាពេលសមស្របនិងបានបញ្ជាឱ្យអង្គភាពគាំពារការពារក្តីត្រូវធ្វើការស្វែងរកមេធាវីបម្រុងសម្រាប់ការពារក្តីឱ្យលោក នួន ជា។ចំណែកការអវត្តមានរបស់មេធាវីការពារក្តី នួន ជាទាំងពីររូប គឺលោក សុន អារុណ និងលោកវ៉ិកទ័រ កូប៉េ ត្រូវបានអង្គជំនុំជម្រះតុលាការកំពូល យល់ឃើញថាគឺជាការប្រព្រឹត្តកំហុសវិជ្ជាជីវៈដែលនាំឱ្យមានវិធានការខាងវិន័យ ហើយអង្គជំនុំជម្រះនឹងចេញសេចក្តីសម្រេចនេះក្នុងពេលវេលាសមស្រប។
គួរបញ្ជាក់ថានៅព្រឹកថ្ងៃទី១៧ ខែវិច្ឆិកា ដែលជាថ្ងៃទី១ នៃការបើកសវនាការលើបណ្តឹងសាទុក្ខក្នុងសំណុំរឿង០០២/០១ សហមេធាវីអន្តរជាតិការពារក្តីលោក នួន ជា គឺលោកវិកទ័រកូប៉េបានអវត្តមានពីបន្ទប់សវនាការ។
លោកនួនជាបានថ្លែងប្រាប់អង្គជំនុំជម្រះតុលាការកំពូលថាលោកបានណែនាំមេធាវីវិកទ័រកូប៉េមិនឱ្យមានវត្តមាននៅក្នុងសវនាការនិងគាត់ចង់ចាកចេញពីបន្ទប់សវនាការបន្ទាប់ពីការថ្លែងរបស់គាត់និងថាគាត់បានណែនាំមេធាវីសុនអារុណឱ្យចាកចេញផងដែរ។បន្ទាប់ពីការបញ្ចប់ការថ្លែងរបស់នួនជាអង្គជំនុំជម្រះតុលាការកំពូលបានសម្រេចថាពុំមែនអាស្រ័យលើជនជាប់ចោទទេដែលសម្រេចថាមេធាវីតើត្រូវមានវត្តមាននៅក្នុងបន្ទប់សវនាការដែរឬយ៉ាងណានោះ។ ជនជាប់ចោទ មិនត្រឹមតែមានសិទ្ធិមានវត្តមានព្រមទាំងមានកាតព្វកិច្ចមានវត្តមានអាស្រ័យដោយមានការអនុញ្ញាតរបស់អង្គជំនុំជម្រះ។មេធាវីការពារក្តីសុនអារុណត្រូវបានតម្រូវឱ្យមានវត្តមាននៅក្នុងបន្ទប់សវនាការបើទោះបីជាខ្លួនមិនមានបំណងធ្វើសារណាលើបញ្ហានេះទៀតក៏ដោយហើយប្រសិនបើគាត់ជ្រើសរើសយកការអវត្តមានត្រូវចាត់ទុកថាជាការមាក់ងាយតុលាការ។
ចំពោះការផ្អាកដំណើរការសវនាការលើបណ្តឹងសាទុក្ខ នៅពេលនេះ មន្ត្រីនាំពាក្យសាលាក្តីខ្មែរក្រហម លោក នេត្រ ភក្ត្រា បានថ្លែងថា វានឹងមិនធ្វើឱ្យប៉ះពាល់ដល់កាលបរិច្ឆេទនៃការរំពឹងទុករបស់អង្គជំនុំជម្រះតុលាការ កំពូលក្នុងការប្រកាសសាលដីកាស្ថាពរលើសំណុំរឿង ០០២/០១ នេះដែលគ្រោងនឹងធ្វើឡើងនៅអំឡុងត្រីមាស
ទី២ ឆ្នាំ ២០១៦ នោះទេ ហើយលោកថ្លែងថាទោះបីជាពេលនេះមិនមានសវនាការ តែអង្គជំនុំជម្រះតុលាការកំពូល បាននិងកំពុងពិនិត្យទៅលើឯកសារជាច្រើនទាក់ទងនឹងបណ្តឹងសាទុក្ខនេះ។ បណ្ដឹងសាទុក្ខប្រឆាំងនឹងសាលក្រម របស់អង្គជំនុំជម្រះសាលាដំបូងប្រកាលកាលពីថ្ងៃទី៧ ខែសីហា ឆ្នាំ ២០១៤មានទំហំធំធេង និងស្មុគស្មាញ ប្រសិនបើប្រៀបធៀបនឹងកិច្ចដំណើរការនីតិវិធីដទៃទៀតដែលពាក់ព័ន្ធទៅនឹងអំពើឃោរឃៅដ៏ធ្ងន់ធ្ងរដែលរងការចោទប្រកាន់នោះ។
សារណា ប្រតិចារិកសវនាការ និងភស្ដុតាងជាឯកសារនៃសំណុំរឿងដែលជាមូលដ្ឋានសម្រាប់កិច្ចដំណើរការនីតិវិធីមានចំនួនរាប់រយពាន់ទំព័រ។ បន្ថែមលើនេះទៀត ម្ចាស់បណ្ដឹងសាទុក្ខ បានលើកឡើងនូវទឡ្ហីករណ៍ជាង ៣៧០ នៅក្នុងបណ្ដឹងសាទុក្ខ ដោយរួមបញ្ចូលទាំងបញ្ហាដែលពុំបានកើតឡើងនៅក្នុងសាលក្រមខ្លួនឯងផងដែរ ប៉ុន្ដែបានកើតឡើង នៅក្នុងពេលកិច្ចដំណើរការនីតិវិធីជំនុំជម្រះ។ នួន ជា និង ខៀវ សំផន បានធ្វើបណ្ដឹងសាទុក្ខប្រឆាំងនឹងសាលក្រមរបស់អង្គជំនុំជម្រះសាលាដំបូង ដោយម្នាក់ៗបានលើកទឡ្ហិករណ៍បណ្ដឹងសាទុក្ខចំនួន២២៣ និង១៤៨ រៀងៗខ្លួន។ បន្ថែមលើសពីនេះ សហព្រះរាជអាជ្ញាវិញ បានដាក់បណ្ដឹងសាទុក្ខដោយកម្រិតត្រឹមតែស្វែងរកដំណោះស្រាយដែលប្រកាសដោយអង្គជំនុំជម្រះតុលាការកំពូលទាក់ទងនឹងភាពអាចអនុវត្តបាននូវទម្រង់ពង្រីកបន្ថែមនៃសហឧក្រិដ្ឋកម្មរួម ដែលហៅថា “សហឧក្រិដ្ឋកម្មរួមទម្រង់ទី III” (JCE) នៅចំពោះមុខ អ.វ.ត.ក ៕
