ខេត្តស្វាយរៀង៖ នគរបាលព្រហ្មទណ្ឌខេត្តស្វាយរៀងបានឈានដល់ការចាប់ខ្លួនជនសង្ស័យម្នាក់យកមកសាកសួរ ហើយនៅវេលាម៉ោង៨និង៣០នាទីយប់ថ្ងៃទី៧ ខែកក្កដា ឆ្នាំ២០១៥ ជនសង្ស័យបានសារភាពថា រូបគេពិតជាបានយកកាំបិតខ្វែវកាប់ពីក្រោយ២កាំបិតបណ្តាលឲ្យស្លាប់បុរសជាគូទំនាស់នោះពិតប្រាកដមែន។ សេចក្តីរាយការណ៍ពីខេត្តស្វាយរៀងបានបញ្ជាក់ថា បុរសសង្ស័យឈ្មោះ សៀន ម៉ា អាយុ៤៧ឆ្នាំ រស់នៅភូមិរមាំងទ្រេត ឃុំសំបួរ ស្រុករមាសហែក ខេត្តស្វាយរៀងបានសារភាពថា ពិតជាបានសម្លាប់បុរសឈ្មោះ សូរ ពុធ អាយុ៤៦ឆ្នាំ មុខរបរកសិករ រស់នៅភូមិ ឃុំកើតហេតុជាមួយគ្នា ដោយសារឈ្មោះនេះ ផឹកស្រាស្រវឹងនិយាយដៀមឌាមដាក់ខ្លួនខ្លាំងពេក។ ប្រភពបានរាយការណ៍ថា កាលពីពេលកន្លងមក រវាងជនសង្ស័យនឹងជនរងគ្រោះធ្លាប់បានប្តឹងផ្តល់គ្នាឡើងដល់តុលាការ ។ លុះនៅថ្ងៃកើតហេតុ ជនរងគ្រោះបានផឹកស៊ីស្រវឹង ហើយនិយាយដៀបឌាមរឿងអតីតកាលដាក់បុរសសង្ស័យ ពេលនោះធ្វើឲ្យជនសង្ស័យទប់កំហឹងមិនបាន ក៏យកកាំបិតខ្វែវមកកាប់ពីក្រោយ២កាំបិតស្លាប់នៅនឹងកន្លែងតែម្តង។ ក្រោយពីសារភាព ជនសង្ស័យត្រូវបញ្ជូនទៅកាន់ការិយាល័យនគរបាលព្រហ្មទណ្ឌកម្រិតធ្ងន់នៃស្នងការខេត្តស្វាយរៀងដើម្បីបន្តនីតិវិធី ៕ យឹម សុថាន
