ខេត្តបាត់ដំបង៖ សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា (CPP) និងជា ប្រធានក្រុមការងារចុះជួយខេត្តបាត់ដំបង បានថ្លែងថា គណបក្សប្រជាជនកម្ពុជាមានសមត្ថភាព គ្រប់គ្រាន់ក្នុងការថែរក្សាការពារសុខសន្តិភាពជូនជាតិមាតុភូមិ ប្រជាពលរដ្ឋ ព្រមទាំងអាចដឹកនាំ ប្រទេស និងអភិវឌ្ឍន៍ប្រទេសឲ្យកាន់តែរីកចម្រើន។
ក្នុងពិធីសំណេះសំណាលជាមួយសមាជិក សមាជិកាគណបក្សប្រជាជនកម្ពុជា ប្រមាណ ជិត ១០០០០នាក់ ក្នុងស្រុកចំនួន៥ នៅខេត្តបាត់ដំបង គឺស្រុកសំពៅលូន ស្រុកភ្នំព្រឹក ស្រុក កំរៀង ស្រុកបវេល និងស្រុកថ្មគោល នៅថ្ងៃទី១២ ខែកក្កដា ឆ្នាំ២០១៨ សម្ដេចក្រឡាហោម បាន មានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំរបស់គណបក្សប្រជាជនកម្ពុជា អភិវឌ្ឍន៍ ប្រទេសឲ្យមានផ្លូវស្អាត ដោយបានចាក់កៅស៊ូ ចាក់បេតុង គ្រួសក្រហម ហើយជាក់ស្ដែងផ្លូវតាម ឃុំ ក្នុងខេត្តបាត់ដំបងប្រមាណជាង ៣០០ឃុំ ត្រូវបានចាក់ក្រាលកៅស៊ូ ដោយនៅសល់តែ ៤ឃុំ ទៀតប៉ុណ្ណោះ ព្រោះឃុំខ្លះជាឃុំនៅជាប់បឹងទន្លេសាប ហើយប្រើប្រាស់តែផ្លូវទឹក។
សម្ដេចក្រឡហោម ស ខេង បានបន្ថែមថា កម្ពុជាក្នុងរបរប៉ុន្មានចុងក្រោយនេះ បានដឹក នាំប្រទេសត្រឹមរយៈពេលខ្លី ហើយដណ្ដើមអំណាចគ្នាតាមរយៈរដ្ឋប្រហារ ឬដោយចុងកាំភ្លើង ទាំងសម័យរដ្ឋកម្ពុជា ព្រោះក្នុងកាលៈទេសៈនោះ គឺចាំបាច់ត្រូវតែប្រើប្រាស់អាវុធ តែក្រោយកិច្ច ព្រមព្រៀងទីក្រុងបារីស កម្ពុជាចាប់យករបរលទ្ធិប្រជាធិបតេយ្យ សេរីពហុបក្ស មានការរៀបចំ បោះឆ្នោតជាបន្តបន្ទាប់ រាល់៥ឆ្នាំម្ដង និងបានសមាហរណកម្មកងកម្លាំងទាំងអស់ កាលពីថ្ងៃទី២០ ខែធ្នូ ឆ្នាំ១៩៩៨ ក្រោមគោលនយោបាយឈ្នះ ឈ្នះ របស់សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា បានជាប់ឆ្នោតដឹកនាំប្រទេស ឲ្យមានការរីកចម្រើន ដូចសព្វថ្ងៃនេះ ។
ក្នុងឱកាសនោះ សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា បាន បន្តអំពាវនាវដល់ប្រជាពលរដ្ឋកម្ពុជា ដែលមានឈ្មោះបោះឆ្នោតទាំងអស់ នៅថ្ងៃទី២៩ ខែកក្កដា ឆ្នាំ២០១៨ខាងមុខ សូមទៅបោះឆ្នោតគ្រប់គ្នា ព្រោះជាសិទ្ធិរបស់ពលរដ្ឋ ដែលការបោះឆ្នោត នេះហើយវាកាន់តែធ្វើឲ្យលទ្ធិប្រជាធិបតេយ្យ នៅក្នុងប្រទេសកម្ពុជាកាន់តែរីកចម្រើន យូរអង្វែង ប្រទេសជាតិមានសុខសន្តិភាព ៕
