ខេត្តក្រចេះ ៖ នៅមន្ទីរពេទ្យបង្អែកស្រុកស្នួលនាក្បាលព្រលប់ថ្ងៃទី១៣កក្កដា គេសង្កេតឃើញមានប្រជាពលរដ្ឋប្រមាណជាង៣០នាក់ ត្រូវ បានក្រុមគ្រួសារដឹកនាំមកសង្គ្រោះអាយុជីវិត ក្នុងនោះ២នាក់បានស្លាប់ ដែលអាការ:ដំបូងផ្តើមថប់ដង្ហើម ស្រវាំងភ្នែក ស្ងួតបំពង់ក ក្អួតរាគ និងហេវហត់អស់កម្លាំងខ្លាំង សង្ស័យថាបានពុល ស្រាសក្រោយពេលហូបកំដរក្នុងពិធីបុណ្យសពអ្នកភូមិ។
ករណីនេះកើតឡើងនៅវេលាល្ងាចថ្ងៃទី១៣ ខែកក្កដា ឆ្នាំ២០១៨ នៅក្នុងពិអីបុណ្យសពអ្នកភូមិមួយ នៅភូមិស្នួលវត្តកើត ឃុំស្នួល ស្រុកស្នួល ខេត្តក្រចេះ។
មកដល់ពេលនេះនៅមិនទាន់មានមន្ត្រីជំនាញអាចបញ្ជាក់ឲ្យដឹងអំពីអការៈ អ្នកជំងឺទាំង៣០នាក់នេះឡើយ ។
សូមរំឭកថា នៅក្នុងខេត្តក្រចេះនេះដែរ កាលពីថ្ងៃទី៥ ខែឧសភា ឆ្នាំ២០១៨ នៅភូមិស្រែនន និងភូមិអាលច ក្នុងឃុំកន្ទួត ស្រុកចិត្របុរី ខេត្តក្រចេះ ដោយប្រជាពលរដ្ឋមានរោគសញ្ញា ឈឺពោះ ក្អួតចង្អោរ ឈឺក អស់កម្លាំង ទន់ដៃទន់ជើង វិលមុខ និងថប់ដង្ហើម ហើយឈានដល់ព្រឹកថ្ងៃទី០៧ ខែឧសភា បានបណ្តាលឲ្យមនុស្សចំនួន១៣នាក់បានស្លាប និងមនុស្សជាង២០០នាក់ផ្សេងទៀត ត្រូវបានដឹកបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តក្រចេះ និងមន្ទីរពេទ្យកាល់ម៉ែត រាជធានីភ្នំពេញ ដែលក្នុងករណីនេះ ត្រូវមន្ត្រីសុខាភិបាលចាត់ទុកថា ដោយសារពុលស្រា៕
