ខេត្ដតាកែវ៖ បុរសស្ដ្រី២នាក់ប្ដី ប្រពន្ធដែលបានបញ្ជាឱ្យកូនៗជះទឹក អាស៊ីតបណ្ដាលឱ្យស្ដ្រីម្នាក់រងរបួសធ្ងន់និងកុមារីអាយុ២ឆ្នាំម្នាក់រងរបួសស្រាលត្រូវបានកម្លាំងនគរបាលនៃស្នងការដ្ឋាននគរបាលខេត្ដតាកែវចាប់បានហើយ កាលពីថ្ងៃទី១៧ ខែវិច្ឆិកា ឆ្នាំ២០១៥ ។
ប្រភពពីសមត្ថកិច្ចបានឱ្យដឹងថា ប្ដី ប្រពន្ធដែលសមត្ថកិច្ចចាប់បាននោះប្ដី ឈ្មោះញ៉ែ ដេង អាយុ៥៦ឆ្នាំ និងប្រពន្ធ ឈ្មោះ សេង គឹមលេង ហៅស្រី អាយុ ៥៥ឆ្នាំ ដែលត្រូវជាឪពុកម្ដាយរបស់នារី ដៃដល់កំពុងរត់គេចខ្លួន មានទីលំនៅក្នុង ភូមិកំពង់ ឃុំព្រះបាទជាន់ជុំ ស្រុកគិរីវង់។
គួរបញ្ជាក់ថា កាលពីថ្ងៃទី១៩ ខែ វិច្ឆិកា ឆ្នាំ២០១៤ មានករណីជះទឹក អាស៊ីតមួយបានកើតឡើងនៅផ្សារទន្លាប់ ស្រុកគីរីវង់ ខេត្ដតាកែវ បង្កឡើងដោយ ជនដៃដល់៤នាក់ឪពុកម្ដាយនិងកូន២នាក់ បណ្ដាលឱ្យស្ដ្រីមានផ្ទៃពោះ២ខែម្នាក់រង របួសធ្ងន់និងកូនស្រីរបស់គាត់អាយុ២ ឆ្នាំម្នាក់ទៀតក៏រងរបួសដែរ ។ បន្ទាប់ ពីកើតហេតុជនដៃដល់២នាក់បងប្អូនបាន រត់គេចខ្លួនហើយតុលាការបានកោះហៅឪពុកម្ដាយជាអ្នកបញ្ជាឱ្យកូនជាអ្នកជះ ទឹកអាស៊ីតចូលបំភ្លឺ ។ ប៉ុន្ដែក្រោយមក អ្នកទាំង២ត្រូវបានលោកព្រះរាជអាជ្ញារង ទិន សុចិត្រា ដោះលែងឱ្យមានសេរីភាព ឡើងវិញ ។
លោក លុយ សុវណ្ណារ័ត្ន ប្ដីស្ដ្រីរង គ្រោះបាននិយាយកាលពីល្ងាចថ្ងៃទី១៧ ខែ វិច្ឆិកា ឆ្នាំ២០១៥ថា នគរបាលខេត្ដ តាកែវបានចាប់ខ្លួនឪពុកម្ដាយ២នាក់ នេះហើយ ។ បច្ចុប្បន្នពួកគេកំពុងឃុំខ្លួន ក្នុងស្នងការដ្ឋាននគរបាលខេត្ដតាកែវ។ លោក លុយ សុវណ្ណារ័ត្ន មានការព្រួយ បារម្ភខ្លាចមានការដោះលែងដូចលើក មុនទៀត ។
លោក អ៊ុក សំណាង ស្នងការខេត្ដ តាកែវបាននិយាយតាមទូរស័ព្ទថា លោក ក៏ទទួលបានដំណឹងពីការចាប់ខ្លួននេះដែរ តែដូចមិនទាន់ច្បាស់ ។ ដូច្នេះលោក ពុំ ទាន់អត្ថាធិប្បាយឱ្យលម្អិតនោះទេ ។
លោក ទិន សុចិត្រា ព្រះរាជអាជ្ញារង អមសាលាដំបូងខេត្ដតាកែវធ្លាប់បាន និយាយថា លោកបានសម្រេចចោទ ប្រកាន់ជាផ្លូវការទៅលើជនល្មើស២នាក់ជាបងប្អូនបង្កើតនឹងគ្នាករណីជះទឹកអាស៊ីត នៅផ្សារទន្លាប់ ខេត្ដតាកែវដែលបណ្ដាល ឱ្យស្ដ្រីម្នាក់រងរបួសយ៉ាងធ្ងន់ធ្ងរនិងកូន ស្រីអាយុ២ឆ្នាំរងរបួសស្រាល ។ ជនល្មើស ទាំង២នាក់បានរត់គេចខ្លួន ខណៈបច្ចុប្បន្ន សំណុំរឿងនេះកំពុងស្ថិតក្នុងចំណាត់ការ របស់ចៅក្រមស៊ើបសួរលោកស្រី អ៊ិន ម៉ានិត្យ ជាអ្នកចាត់ការបន្ដតាមនីតិវិធី តាមរូបភាពជនត្រូវចោទនៅក្រៅឃុំ ។
លោក ទិន សុចិត្រា បានបញ្ជាក់ថា ជនត្រូវចោទឈ្មោះ ដេង លក្ខិណា ត្រូវ បានចោទប្រកាន់១បទល្មើសតាមមាត្រា ២០នៃច្បាប់ស្ដីពីការគ្រប់គ្រងទឹកអាស៊ីត ខ្លាំង ។ ចំណែកជនត្រូវចោទឈ្មោះ ដេង មាស ត្រូវបានចោទប្រកាន់ចំនួន២បទ ល្មើសតាមមាត្រា២០នៃច្បាប់ស្ដីពីការ គ្រប់គ្រងទឹកអាស៊ីតខ្លាំងនិងបទហិង្សា ដោយចេតនាមានស្ថានទម្ងន់ទោសតាម មាត្រា២១៨ នៃក្រមព្រហ្មទណ្ឌ ។
ស្ដ្រីរងគ្រោះឈ្មោះ មួង ស្រីមុំ បាន និយាយទាំងទឹកភ្នែកថា គាត់មានការឈឺ ចាប់ដោយសារមុខរបួសខ្លាំងណាស់ចង់តែឱ្យគ្រូពេទ្យចាក់ថ្នាំឱ្យស្លាប់តែម្ដងទៅ។ ប៉ុន្ដែដោយសារអាណិតកូនតូចចេះតែទ្រាំ រស់ទាំងឈឺចាប់ស្ទើរស្លាប់ស្ទើររស់ ។
អាចនិយាយបានថា ជាការអបអរ សាទរមួយចំពោះនគរបាលខេត្ដតាកែវ ដែលបានចាប់ខ្លួនជនសង្ស័យទាំង២នាក់ប្ដីប្រពន្ធ ។ ប៉ុន្ដែជនដៃដល់២នាក់បង ប្អូនដែលកំពុងរត់គេចខ្លួនគួរតែសមត្ថ កិច្ចពន្លឿនការចាប់ខ្លួនបន្ថែមទៀត ៕
ដោយ៖ ហេង នរិន្ទ្រ
