ភ្នំពេញ៖ យុវជនម្នាក់បានរងរបួសចំ ក ត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យភ្លាមៗ ដោយសារតែត្រូវជនសង្ស័យមួយក្រុមមានគ្នា៣នាក់ ធ្វើសកម្មភាពចាក់ដោយកាំបិតចុងស្រូចប្លន់យកម៉ូតូ ខណៈដែលជនរងគ្រោះបានជិះម៉ូតូយកត្រីទៅឱ្យមិត្តភក្តិរបស់ខ្លួន ។
ហេតុការណ៍នេះបានកើតឡើងកាលពី វេលាម៉ោង៧និង១០នាទីយប់ថ្ងៃទី១៨ ខែវិច្ឆិកា ឆ្នាំ២០១៥ តាមបណ្តោយផ្លូវបេតុង ស្ថិតក្នុងសង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ ។ ជនរងគ្រោះមានឈ្មោះ សៅ បូរឹន អាយុ២៨ឆ្នាំ ស្កាក់នៅសង្កាត់ឃ្មួញ ខណ្ឌសែនសុខ រាជធានីភ្នំពេញ ។
បើតាមសម្តីរៀបរាប់ពីជនរងគ្រោះបានប្រាប់ឱ្យដឹងថា នៅមុនពេលកើតហេតុរូបគេបានជិះម៉ូតូឃ្លីចតែម្នាក់ឯង ពណ៍ក្រហម គ្មានស្លាកលេខ ដោយជិះទៅយកត្រីមួយចំនួនទៅឱ្យមិត្តភក្ត្ររបស់ខ្លួនដើម្បីធ្វើម្ហូបហូប នៅកន្លែងកើតហេតុ ពេលជិះម៉ូតូចេញមកវិញស្រាប់តែលេចមុខជនសង្ស័យ៣នាក់ បានមកស្ទាក់នៅពីមុខម៉ូតូដោយនិយាយសំឡុតឱ្យគេជូនទៅផ្លូវខាងមុខ តែគេមិនព្រមពេលនោះពួកគេ ក៏បានវាយបំណងយកម៉ូតូ ។ ប្រភពបន្តថា ដោយសារតែគេមិនព្រមពួកគេក៏បានប្រតាយប្រតប់គ្នា ហើយជនសង្ស័យម្នាក់ក៏បានយកកាំបិតចុងស្រួចចាក់ចំកខ្លួនតែម្តង រួចគេស្រួចឆោឡោរឡើងបង្កការ ភ្ញាក់ផ្អើលដល់សមត្ថកិច្ចដែលនៅក្បែរនោះ ហើយសមត្ថកិច្ចក៏បានចេញមកអន្តរាគមន៍ទើបពួកគេគេច ខ្លួនបាត់អស់តែម្តង ។
បន្ទាប់ពីកើតហេតុសមត្ថកិច្ចក៏បានចុះមកអន្តរាគមន៍ដល់កន្លែងកើតហេតុ ហើយជនរងគ្រោះត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យ តែគេរងរបួសស្រាលប៉ុណ្ណោះ រួចសមត្ថកិច្ចនាំជនរងគ្រោះទៅដាក់ពាក្យបណ្តឹង នៅបុស្តិ៍នគរបាលរដ្ឋបាលស្វាយប៉ាក ដើម្បីកំណត់មុខសញ្ញាតាមចាប់ក្រុមជនសង្ស័យ ។
សូមបញ្ជាក់ថា ក្រោយកើតហេតុបន្តិចសមត្ថកិច្ចបានឃាត់ខ្លួនជនសង្ស័យម្នាក់ ប៉ុន្តែជនរងគ្រោះបាននិយាយថា មិនមែនជាគេនោះទេ គឺគេបានឃើញជនសង្ស័យម្នាក់នោះ គ្រាន់តែឈរក្បែរកន្លែងកើតហេតុតែប៉ុណ្ណោះ ៕
ដោយ៖ ព្រែកជ័យ
