ខេត្ដកំពង់ស្ពឺ៖ បុរសវ័យចំណាស់ ម្នាក់ស្លាប់ភ្លាមៗនៅកន្លែងកើតហេតុ ខណៈជិះម៉ូតូសង់កូរ៉េម្នាក់ឯងហើយត្រូវ បានគោយន្ដកែច្នៃបើកលឿនបុកពេញ ទំហឹង។
ហេតុការណ៍នេះបានកើតឡើងកាល ពីវេលាម៉ោង៧និង៣០នាទីយប់ ថ្ងៃទី១៨ ខែវិច្ឆិកា ឆ្នាំ២០១៥ នៅតាមបណ្ដោយ ផ្លូវលំ ឋិតនៅភូមិតាសាល ឃុំខ្ទុំក្រាំង ស្រុកសំរោងទង ខេត្ដកំពង់ស្ពឺ។
នគរបាលស្រុកសំរោងទងបានឱ្យដឹង ថា បុរសវ័យចំណាស់រងគ្រោះឈ្មោះ ភិន រ៉ា អាយុ៦៤ឆ្នាំ ជាកសិកររស់នៅ ក្នុងភូមិស្យា ឃុំយាអង្គ ស្រុកថ្ពង ខេត្ដ កំពង់ស្ពឺ ជិះម៉ូតូម៉ាកសង់កូរ៉េពណ៌ក្រហម ពាក់ស្លាកលេខភ្នំពេញ១K-៦០៥៥។
ចំណែកអ្នកបើកបរគោយន្ដបង្កហេតុ ឈ្មោះ វ៉ន ធូរ ភេទប្រុស អាយុ១៨ឆ្នាំ ជាកសិករនៅក្នុងភូមិឡានឆេះ ឃុំព្រៃ ក្រសាំង ស្រុកឧដុង្គ ខេត្ដកំពង់ស្ពឺ។
នគរបាលនិយាយឱ្យដឹងថា នៅមុន ពេលកើតហេតុ គេឃើញបុរសវ័យ ចំណាស់រងគ្រោះខាងលើជិះម៉ូតូម្នាក់ឯង តាមបណ្ដោយផ្លូវលំក្នុងទិសដៅពីជើង ទៅត្បូង ។ លុះមកដល់ចំណុចកើតហេតុ ក៏ស្រាប់តែមានគោយន្ដកែច្នៃ១គ្រឿង បើកលឿនបញ្ច្រាសទិសក៏បុកចំពីមុខ ពេញទំហឹងបណ្ដាលឱ្យបុរសវ័យចំណាស់ ស្លាប់ភ្លាមៗនៅកន្លែងកើតហេតុ។ ភ្លាម នោះអ្នកបើកគោយន្ដបានឈប់រួចក៏រត់ គេចខ្លួនបាត់ស្រមោលតែត្រូវបានគេ ស្គាល់ឈ្មោះ។
ក្រោយកើតហេតុក៏មានការភ្ញាក់ ផ្អើលដល់ប្រជាពលរដ្ឋហើយក៏រាយការណ៍ ទៅនគរបាលជំនាញចុះទៅវាស់វែងនិង យកគោយន្ដបង្កនិងម៉ូតូជនរងគ្រោះទៅ រក្សាទុកនៅអធិការដ្ឋាននគរបាលស្រុក សំរោងទងរង់ចាំដោះស្រាយជាក្រោយ។ រីឯសាកសពនគរបាលប្រគល់ឱ្យសាច់ ញាតិយកទៅរៀបចំធ្វើបុណ្យតាមប្រពៃណី ៕
ដោយ៖ សេនាស័ក្ដិ
