ខេត្ដកំពង់ចាម៖ យោងតាមរបាយ ការណ៍របស់មន្ទីរកសិកម្មខេត្ដបានឱ្យដឹងថា គិតមកត្រឹមសបា្ដហ៍ទី២ ខែវិច្ឆិកា ឆ្នាំ២០១៥នេះកសិករនៅទូទាំងខេត្ដកំពង់ចាមទើបសម្រេចអនុវត្ដធ្វើស្រែប្រាំង បានប្រមាណតែជាង១៩ភាគរយនៃផែនការដែលមានការយឺតជាងឆ្នាំមុនរហូត ដល់ជាង១៧ភាគរយគិតក្នុងអំឡុងពេល ដូចគ្នា ។
លោក គឹម សាវឿន ប្រធានមន្ទីរកសិ កម្មខេត្ដកំពង់ចាមបានឱ្យដឹងថា មកដល់ ត្រឹមថ្ងៃទី១៤ ខែវិច្ឆិកា ឆ្នាំ២០១៥នេះ កសិករនៅក្នុងខេត្ដកំពង់ចាមទើបអនុវត្ដធ្វើស្រែប្រាំងបានប្រមាណ៨៣០០ហិកតា ប៉ុណ្ណោះគឺទើបតែបានប្រមាណ១៩ភាគ រយនៃផែនការដែលបានគ្រោងទុកចំនួន ៤២០០០ហិកតាដែលក្នុងនោះមានស្រូវ ពង្រោះអនុវត្ដបានជាង៧៩០០ហិកតានិងស្រូវសន្ទូងបានជាង៤០០ហិកតា។ លទ្ធ ផលនេះបើប្រៀបធៀបរយៈពេលដូចគ្នា នឹងឆ្នាំកន្លងទៅគឺទាបជាងរហូតដល់ជាង៧០០០ហិកតា ។
លោកប្រធានមន្ទីរកសិកម្មខេត្ដបានបញ្ជាក់ទៀតថា ស្ថានភាពទឹកទន្លេឆ្នាំនេះ ឡើងមានកម្រិតទាបជាហេតុធ្វើឱ្យកសិ ករយើងប្រឈមមុខនឹងការធ្វើស្រែយឺត។ ដោយផ្ទៃបឹងផ្ទៃដីស្រែប្រាំងមួយផ្នែកធំទឹកមិនបានជន់លិច ហើយផ្ទៃដីមួយភាគមាន ទឹកជន់លិចតែស្រកទៅវិញលឿន។ ដូច្នេះ កសិករប្រឈមនឹងកង្វះខាតទឹកសម្រាប់ ធ្វើនិងទឹកសម្រាប់ចិញ្ចឹមស្រូវសន្ទូងដែល ធ្វើបានហើយនេះដែរ ។
លោកគឹម សាវឿន បានលើកឡើងថា ឆ្លើយតបតាមអនុសាសន៏របស់សម្ដេច ហ៊ុន សែន នាយករដ្ឋមន្ដ្រីឱ្យគិតគូរខ្ពស់ ចំពោះការប្រឈមរបស់ប្រជាកសិករក្នុងកង្វះខាតទឹកធ្វើស្រែក៏ដូចជាទឹកក្នុងការ ចិញ្ចឹមសន្ទូងដែលធ្វើបាននោះ អាជ្ញាធរ ខេត្ដបានយកចិត្ដទុកដាក់ខ្ពស់ក្នុងការដោះស្រាយទឹកជូនដល់កសិករដោយជំរុញ ដល់មន្ទីរពាក់ព័ន្ធចុះជួយដល់ប្រជាពល រដ្ឋដោយធ្វើអន្ដរាគមន៍បូមទឹកដាក់អាងស្ដុកជូនដល់កសិករនិងអន្ដរាគមន៍បូម ទឹកជួយសង្គ្រោះសន្ទូងដែលរងគ្រោះខ្វះ ខាតទឹកបានជាច្រើនហិកតាជូនដល់ប្រជាកសិករ ។
ចំពោះស្រូវរដូវវស្សាវិញខេត្ដកំពង់ ចាមសម្រេចធ្វើការប្រមូលផលបានលើផ្ទៃដីប្រមាណជាង៥០០០០ហិកតាហើយដោយទទួលទិន្នផលជាមធ្យម៣,៤០០ តោនក្នុងមួយហិកតា ៕
ដោយ៖ សហការី
