ភ្នំពេញ៖ កាកបាទក្រហមកម្ពុជា បានសហការ ជាមួយក្រុមហ៊ុនអេហ្សិត និងមានការចូលរួមពីគណៈកម្មាធិការជាតិសុវត្ថិភាពចរាចរណ៍ផ្លូវគោក ក្រុមហ៊ុនកូកាកូឡា អាជ្ញាធរខ័ណ្ឌពោធិ៍សែនជ័យគ្រូបង្រៀន និងសិស្សានុសិស្ស ប្រមាណជាង ១០០០ នាក់ ធ្វើយុទ្ធនាការរួមគ្នាអប់រំអំពីសុវត្ថិភាពចរាចរណ៍ ខណៈដែលថ្ងៃសម្រាកសម្រាប់ព្រះរាជពិធីបុណ្យអុំទូកកំពុងខិតជិតមកដល់ ។
យុទ្ធនាការនេះ បានប្រព្រឹត្តទៅ នៅទីកន្លែងពីរផ្សេងគ្នា គឺនៅវិទ្យាល័យជម្ពូវ័ន្ត និងនៅបញ្ជរបង់ប្រាក់កំបូល ដែលស្ថិតនៅតាមដងផ្លូវជាតិលេខ ៤ ក្នុងខ័ណ្ឌពោធិ៍សែនជ័យ រាជធានីភ្នំពេញ ។
នៅក្នុងឱកាសនេះដែរបុគ្គលិក និងតំណាងមកពីស្ថាប័ននីមួយៗបានចែកកូនសៀវភៅសម្រង់ច្បាប់ស្ដីពីចរាចរណ៍ផ្លូវគោក ភេសជ្ជៈកូកាកូឡា និងសន្លឹកស្ទីកគ័រ ដែលមានសរសេរសារ “ពិសារគ្រឿងស្រវឹងកុំបើកបរ” និងខិត្តប័ណ្ណអប់រំផ្សេងៗជូនដល់សិស្សានុសិស្ស និងអ្នកធ្វើដំណើរឆ្លងកាត់បញ្ជរកំបូល ។
ក្នុងនោះសៀវភៅសម្រង់ “ទោសបញ្ញត្តិនៃច្បាប់ស្ដីពីចរាចរណ៍ផ្លូវគោក និងអនុក្រឹតស្ដីពីការពិន័យអន្តរការណ៍” ចំនួន ១៥០០០ ក្បាល និងស្ទីកគ័រចំនួន ២ ម៉ឺនសន្លឹក ដែលត្រូវចែកចាយ ត្រូវបានឧបត្ថម្ភបោះពុម្ពដោយក្រុមហ៊ុនអេហ្សិត ។
យុទ្ធនាការនេះ បានធ្វើឡើង នៅមុនពេលថ្ងៃសម្រាកព្រះរាជពិធីបុណ្យអុំទូកចូលមកដល់ ជាពេលវេលាដែលប្រជាពលរដ្ឋនឹងធ្វើដំណើរច្រើនទៅកាន់ស្រុកកំណើត ឬរមណីយដ្ឋានផ្សេងៗហើយដែលអត្រាគ្រោះថ្នាក់ចរាចរណ៍ ក៏កើតមានច្រើនផងដែរ ។
លោក ជួន វ៉ាន់ឌន នាយកកិច្ចការធុរកិច្ច នៃក្រុមហ៊ុន អេហ្សិតអ៊ិនវេសមេន បានថ្លែងថា៖ “បញ្ហាគ្រោះថ្នាក់ចរាចរណ៍ជាកង្វល់មួយដ៏ធំនាពេលបច្ចុប្បន្ន និងជាបញ្ហារួម សម្រាប់មនុស្សទាំងអស់គ្នា ។ យើងមានការប្ដេជ្ញាយ៉ាងមុតមាំក្នុងការជួយលើកកម្ពស់សុវត្ថិភាពចរាចរណ៍នៅតាមគ្រប់ដងផ្លូវទាំងអស់ មិនថានៅតាមដងផ្លូវជាតិលេខ៤ ដែលក្រុមហ៊ុនយើងកំពុងដំណើរការ ជួសជុល ថែទាំ នេះទេ” ។
លោក បានថ្លែងបន្តថា៖ “ក្រុមហ៊ុននឹងបន្តយុទ្ធនាការអប់រំបែបនេះតទៅមុខទៀត នៅក្នុងពិធីបុណ្យជាតិធំៗ។ ខ្ញុំសង្ឃឹមថា សិស្សានុសិស្ស និងអ្នកធ្វើដំណើរដែលបានចូលរួមក្នុងយុទ្ធនាការនេះ នឹងជួយចែករំលែក និងផ្សព្វផ្សាយបន្តនូវសារសុវត្ថិភាពចរាចរណ៍ទាំងអស់នេះ ឧទាហរណ៍តាមរយៈបណ្ដាញសង្គម Facebook” ។
ខ្លឹមសារសំខាន់ដែលបានផ្សព្វផ្សាយនៅក្នុងយុទ្ធនាការអប់រំពីច្បាប់ និងសុវត្ថភាពចរាចរណ៍នោះ គឺ “សុវត្ថិភាពផ្ដើមចេញពីអ្នក” និង “ពិសារគ្រឿងស្រវឹងកុំបើកបរ” ។
យោងតាមការស្រាវជ្រាវបានឲ្យដឹងថា ការបើកបរហួសល្បឿនកំណត់ និងការបើកបរដោយមានជាតិស្រវឹងគឺជាមូលហេតុចម្បងធំបំផុត ដែលនាំឲ្យមានគ្រោះថ្នាក់ចរាចរណ៍នៅក្នុងប្រទេសកម្ពុជា ដែលជាមធ្យម គ្រោះថ្នាក់ចរាចរណ៍បានឆក់យកជីវិតមនុស្ស ៦នាក់ក្នុងមួយថ្ងៃ ។ ក្នុងមួយឆ្នាំៗ គ្រោះថ្នាក់ចរាចរណ៍ក៏បានធ្វើឲ្យកម្ពុជាខាតបង់ទឹកប្រាក់រាប់រយលានដុល្លារថែមទៀតផង ។
លោក ប៉ាត ប៊ុនផាជាប្រធានយុវជន សាខាកាកបាទក្រហម រាជធានីភ្នំពេញ បានថ្លែងថា៖ “ការសហការគ្នាអប់រំពីសុវត្ថិភាពចរាចរណ៍ ជាកត្តាចាំបាច់ ដែលយើងត្រូវធ្វើជាប្រចាំ ដើម្បីចូលរួមចំណែកកាត់បន្ថយដល់អត្រាគ្រោះថ្នាក់ចរាចរណ៍ ដែលកំពុងតែបង្កគ្រោះភ័យខ្លាំងដល់ប្រជាពលរដ្ឋយើង” ។ហើយគាត់ក៏បានលើកឡើងបន្ថែមទៀតថាយើងទាំងអស់គ្នាមិនថាអ្នកបើកបរឬអ្នករួមដំណើរនោះទេត្រូវចង់ចាំនូវសារបីសំខាន់គឺការពារជីវិតអ្នក សូមពាក់មួកសុវត្ថិភាពឱ្យបានត្រឹមត្រូវ! ការពារជីវិតអ្នកសូមកុំបើកបរក្រោមឥទ្ធិពលគ្រឿងស្រវឹង!
មួកសុវត្ថិភាពមួយជួយបានតែមនុស្សម្នាក់ប៉ុណ្ណោះ!
កាកបាទក្រហមកម្ពុជា គណៈកម្មាធិការជាតិសុវត្ថិភាពចរាចរណ៍ផ្លូវគោក អាជ្ញាធរ រួមជាមួយក្រុមហ៊ុន ក៏ដូចជាអង្គការ ដៃគូពាក់ព័ន្ធសង្ឃឹមថា យុទ្ធនាការនេះនឹងចូលរួមកាត់បន្ថយគ្រោះថ្នាក់ចរាចរណ៍ ជាពិសេសនៅក្នុងថ្ងៃប្រារព្ធព្រះរាជពិធីបុណ្យអុំទូកខាងមុខនេះ ។
«រួមគ្នាគោរពច្បាប់ចរាចរណ៍ ដើម្បីសុវត្ថិភាពទាំងអស់គ្នា» ៕
