ខេត្ដត្បូងឃ្មុំ៖ តំណាងប្រជាពលរដ្ឋ នៅឃុំត្រញំងព្រីង ស្រុកតំបែរ ខេត្ដត្បូង ឃ្មុំដាក់ពាក្យប្ដឹងទៅអាជ្ញាធរឃុំ ដោយ ស្នើឱ្យជួយធ្វើអន្ដរាគមន៍ដោះស្រាយ បញ្ហាដីធ្លីដែលត្រូវក្រុមហ៊ុនចិនរំលោភយក ។ តំណាងពលរដ្ឋបញ្ជាក់ថាដីសហ គមន៍ភូមិជីទ្រុនទំហំជាង២០ហិកតាត្រូវបានក្រុមហ៊ុនចិនឈូសឆាយកាលពី ឆ្នាំ២០១៤កន្លងទៅហើយរហូតមកដល់ ពេលនេះនៅមិនទាន់មានដំណោះស្រាយនៅឡើយ ។
តំណាងពលរដ្ឋអះអាងថា ការបាត់ បង់ដីសហគមន៍នៅក្នុងភូមិ គឺបណ្ដាល ឱ្យប៉ះពាល់ដល់ជីវភាពរស់នៅរបស់ពួកគាត់ ផលប៉ះពាល់នោះមានដូចជាបាត់ បង់ព្រៃលិចទឹកនៅក្នុងភូមិដែលជាជម្រក ត្រីពងកូន បាត់បង់កន្លែងរកត្រី សាច់ រកអុស ឬវល្លិ ជ័រផ្ដៅជាដើម ។
តំណាងពលរដ្ឋមួយរូបនៅភូមិជីទ្រុនម្នាក់ថ្លែងថា គោលបំណងដែលពួកគាត់ ដាក់ពាក្យប្ដឹងទៅអាជ្ញាធរឃុំអមដោយស្នាមមេដៃប្រជាពលរដ្ឋ១២៤នាក់ផង នោះគឺដើម្បីឱ្យអាជ្ញាធរចាត់វិធានការ លើករណីឈូសឆាយដីព្រៃសហគមន៍នៅតំបន់ជាប់មាត់ព្រែកត្បូងរមាស២៥ ហិកតាពីសំណាក់ក្រុមហ៊ុនចិនឈ្មោះ ហាមិនីវ៉េនអ៊ិនវេសមេន (Haminiven Investment)ដើម្បីយកមកទុកជាសម្បត្ដិរួមវិញ ។
តំណាងពលរដ្ឋយល់ថា ការឈូសឆាយ ដីសហគមន៍ពីសំណាក់ក្រុមហ៊ុនចិនកាលពីពេលកន្លងទៅអាជ្ញាធរមូលដ្ឋានអាច ជាអ្នកឃុបឃិតតែម្ដង ។
មេឃុំត្រញំងព្រីង លោក មុំ សាប៊ុន បានមានប្រសាសន៍ថាខាងលោកបាន ទទួលពាក្យបណ្ដឹងរបស់ពលរដ្ឋទាំងនោះ ហើយប៉ុន្ដែលោកថា អាជ្ញាធរមិនបាន ដឹងថាក្រុមហ៊ុនឈូសឆាយចូលដីសហ គមន៍នោះទេ ។ លោកបញ្ជាក់ថា ករណី នេះគឺហួសពីដែនសមត្ថកិច្ចរបស់ឃុំទើប លោកបានបញ្ជូនពាក្យបណ្ដឹងនោះទៅ ថ្នាក់ស្រុកបន្ដទៀត ។ លោកទទួលស្គាល់ថា ក្រុមហ៊ុនចិនពិតជាបានឈូសឆាយចូលតំបន់ដីសហគមន៍លើសពីចំនួនដីដែលពួកគេបានទិញពីប្រជាពលរដ្ឋកាលពីឆ្នាំ២០១១កន្លងទៅប្រាកដមែន ។
តំណាងពលរដ្ឋម្នាក់ទៀតនិយាយថា ក្រោយពេលទៅជួបអាជ្ញាធរឃុំពលរដ្ឋក៏បានទៅជួបជាមួយអាជ្ញាធរស្រុកបន្ដទៀត ប៉ុន្ដែនៅពេលទៅជួបអាជ្ញាធរស្រុកត្រូវ គេរុញមកឱ្យជួបជាមួយឃុំវិញដែលបញ្ហានេះធ្វើឱ្យតំណាងអ្នកភូមិយល់ថា ជាការ ដោះសារៀងៗខ្លួន ៕
ដោយ៖ ហេង នរិន្ទ្រ
