ភ្នំពេញ៖ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីនារីស្បែរសម្នាក់ ត្រូវបានគេប្រទះឃើញដើរជើងទទេនិយាយរវើរវាយកណ្ដាលផ្លូវ ពីម្ដុំវត្តភ្នំ ខណ្ឌដូនពេញ រហូតដល់ផ្លូវច្រាំងបាក់ ខណ្ឌច្បារអំពៅ បណ្ដាលឲ្យដាច់រលាតស្បែកបាតជើងចេញឈាម បង្កការភ្ញាក់ផ្អើលដល់ពលរដ្ឋនិងសមត្ចកិច្ច ចុះទៅដឹកនារីរងគ្រោះទៅនាយកដ្ឋានអន្តោប្រវេសន៍ ដើម្បីស្វែងរកអត្តសញ្ញាណរបស់គាត់ ។
ហេតុការណ៍ខាងលើនេះ បង្កការភ្ញាក់ផ្អើលកាលពីវេលាម៉ោង៣ទៀបភ្លឺថ្ងៃអង្គារ ៣កើត ខែស្រាពណ៍ ឆ្នាំច សំរឹទ្ធិស័ក ព.ស២៥៦២ ត្រូវនឹង ថ្ងៃទី១៤ ខែសីហា ឆ្នាំ២០១៨ ពីម្ដុំវត្តភ្នំ ខណ្ឌដូនពេញ រហូតដល់មុខផ្សារច្បារអំពៅ សង្កាត់ច្បារអំពៅ២ ខណ្ឌច្បារអំពៅ ។
យោងតាមប្រភពពីពលរដ្ឋដែលឃើញហេតុការណ៍នេះ បានឲ្យដឹងថា មុនពេលកើតហេតុ គេឃើញនារីបរទេសស្បែរសវ័យក្មេងម្នាក់ សង្ស័យបែកថ្នាំ បានដើរជើងទទេរវើរវាយនិយាយម្នាក់ឯងកណ្ដាលផ្លូវ តាំងពីម្ដុំវត្តភ្នំ ខណ្ឌដូនពេញ រួចបត់តាមបណ្ដោយផ្លូវព្រះមុនីវង្ស រហូតដល់ព្រំប្រទល់ខណ្ឌ៧មករា បណ្ដាលឲ្យដាច់រលាតស្បែកបាតជើងចេញឈាម ។ ឃើញដូចនោះពួកគាត់ ក៏រាយការណ៍ប្រាប់សមត្ថកិច្ច ខណៈពេលសមត្ថកិច្ចចុះមកដល់ គាត់មិនអាចជួយអ្វីបាន ក្រៅពីជិះម៉ូតូតាមមើលនាងដើររហូតដល់ស្ពានអាកាសក្បាលថ្នល់ រួចក៏សំដៅឡើងទៅលើស្ពានព្រះមុនីវង្ស(ស្ពានច្បារអំពៅថ្មី)។ ពេលនោះក្រុមអ្នកសារព័ត៌មាន និងប្រជាពលរដ្ឋ ក៏បានចូលទៅលួងនាង ហើយបានទិញទឹកឲ្យផឹក តែនាងមិនព្រមផឹក រួចក៏បន្តរត់ទៅមុខផ្សារច្បារអំពៅ បង្កឲ្យមានការភ្ញាក់ផ្អើលដល់ក្រុមអាជីវករឈរមើលនាង ហើយនាងកាន់តែរត់ទៅទៀត រហូតជិតដល់ច្រាំងប្រាក់ សង្កាត់ច្បារអំពៅ២ ខណ្ឌច្បារអំពៅ ត្រូវបានក្រុមអ្នកសារព័ត៌មានព្យាយាមលួងលោមនាងម្ដងទៀត តែនាងមិនស្តាប់ ពេលនោះក៏មានសមត្ថកិច្ចម្នាក់ មកដល់ ទើបក្រុមអ្នកសារព័ត៌មានសម្រេចសុំឲ្យសមត្ថកិច្ចដេញចាប់នាង ហើយយកខ្សែចងជើងសិន ព្រោះទៅមុខទៀតមានតែចុះទឹកទន្លេ តែនាងស្រែកឲ្យស្រាយខ្សែចេញ ហើយក៏អង្គុយមើលមុខគ្នា ទាំងអ្នកជួយចាប់ ទាំងក្រុមអ្នកសារព័ត៌មាន និងនារីបរទេសនោះ ដោយសារតែហត់រៀងៗខ្លួន ។
ក្រោយកើតហេតុ សមត្ថកិច្ចមូលដ្ឋានសហការជាមួយមន្រ្តីសាលាសង្កាត់ច្បារអំពៅ២ បានហៅរ៉ឺម៉កម៉ូតូមកឲ្យដឹកនារីរងគ្រោះទៅនាយកដ្ឋានអន្តោប្រវេសន៍ ដើម្បីជួយដោះស្រាយបន្តតាមនីតិវិធី ៕ស តារា
