ភ្នំពេញ៖ មន្ត្រីរាជការ ប្រជាពលរដ្ឋ គ្រួសារជនរងគ្រោះ សិស្ស និស្សិត បាននិមន្ដព្រះសង្ឃចំនួន១០៨អង្គ រាប់បាត្រ បង្សុកូល ដើម្បីឧទ្ទិសកុសល ជូនវិញ្ញាណក្ខន្ធ ជូនដល់ជន រងគ្រោះដែលស្លាប់ ក្នុងឧបទ្ទវហេតុរត់ជាន់គ្នាលើអតីតស្ពានកោះពេជ្រ  កាលពីយប់ថ្ងៃទី២២ ខែវិច្ឆិកា ឆ្នាំ២០១០ ។

ពិធីនោះ លោក ប៉ា សុជាតិវង្ស អភិបាលរាជធានីភ្នំពេញ បាន រាប់បាត្រ និងប្រគេនទេយ្យវត្ថុដល់ព្រះសង្ឃចំនួន ១០៨អង្គ នៅពីមុខស្តូបក្បែរស្ពាននាគ ដើម្បីឧទ្ទិសកុសលផលបុណ្យជូនដល់ជនរងគ្រោះ ដែលបានបាត់បង់អាយុជីវិត ក្នុងហេតុការណ៍ នៅយប់ថ្ងៃទី២២ ខែវិច្ឆិកា ឆ្នាំ២០១០ នោះ ។

លោកបន្ដថា៖ ជារៀងរាល់ឆ្នាំ អាជា្ញធរគ្រប់ជាន់ថ្នាក់ តែងតែប្រារព្ធធ្វើពិធីនេះ ដើម្បីបង្ហាញពីការយកចិត្ដទុកដាក់ និងគិតគូរថ្នាក់ដឹកនាំ នៃរាជរដ្ឋាភិបាលកម្ពុជាចំពោះសុខទុក្ខ នៃក្រុមគ្រួសារ ជនរងគ្រោះ ដែលបានស្លាប់ក្នុងឧបទ្ទវហេតុរត់ជាន់គ្នានៅលើស្ពានកោះពេជ្រនេះ ។

សូមបញ្ជាក់ថា៖ ឧបទ្ទវហេតុរត់ជាន់គ្នានៅលើស្ពានកោះពេជ្រ បានកើតឡើងនាឱកាសព្រះរាជ​ពិធីបុណ្យ​អុំទូក បណ្ដែត​ប្រទីប អក​អំបុក និង​សំពះ​ព្រះខែ ថ្ងៃចុងក្រោយ​យប់ថ្ងៃទី​២២ ខែ​វិច្ឆិកា ឆ្នាំ២០១០ ដែល​យ៉ាង​ហោចណាស់​មានមនុស្ស​ប្រុសស្រី ក្មេងចាស់​ជាង ​៣០០នាក់​ស្លាប់ និង​ជាង​៧០០នាក់​ទៀតបាន​រងរបួស ៕

ដោយ៖ សំរិត