ខេត្តពោធិ៍សាត់៖ បុរសធ្វើដំណើរដោយម៉ូតូមួយគ្រឿងម្នាក់បានរងរបួសធ្ងន់ ដោយសារគ្រោះថ្នាក់ចរាចរណ៍រថយន្ថមួយគ្រឿងម៉ាកទូយូតាកាមរីបាឡែនបុក ។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២ថ្ងៃត្រង់ ថ្ងៃទី២២ ខែវិច្ឆិកា ឆ្នាំ២០១៥ នៅលើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ១៧៣-១៧៤ ស្ថិតក្នុងភូមិតាកែវលើ ឃុំត្នោតជុំ ស្រុកក្រគរ ខេត្តពោធិ៍សាត់ ។

ប្រភពពីនគរបាលចរាចរណ៍ខេត្តបានឲ្យដឹងថា គេឃើញរថយន្ថមួយគ្រឿងម៉ាកទូយូតាកាមរីបាឡែន ពណ៍ស្ក ពាក់ស្លាកលេខ ភ្នំពេញ 2m 7757 ធ្វើដំណើរក្នុងទិសដៅពីលិចទៅកើត លុះមកដល់ចំណុចខាងលើ ក៏បានបុកជាមួយម៉ូតូមួយគ្រឿងពេញទំហឹង បណ្ដាលឲភាគ្គីខាងម្ចាស់ម៉ូតូដួលផ្ទប់លើផ្លូវជាតិសន្លប់ស្តូកស្ដឹងអ្នកបើកបររថយន្តឃើញសភាពបែបនេះ ក៏បើកទ្វាររត់គេចខ្នួនបាត់ស្រមោល ។

ប្រភពបន្តថា ម្ចាស់ម៉ូតូម៉ាកហុងដាវ៉េវ ពណ៌ក្រហម ពាក់ស្លាកលេខ ក្រចេះ 1f 9723 ត្រូវបានគេស្គាល់ឈ្មោះ ម៉ៅ មួន ភេទប្រុស អាយុ៤៥ឆ្នាំ មានទីលំនៅភូមិ.ឃុំកើតហេតុ ធ្វើដំណើរក្នុងទិសដៅពីកើតទៅលិច ។

ប្រភពដដែលបន្តទៀតថា ជនរងគ្រោះត្រូវបានជួយដឹកទៅសង្គ្រោះនៅមន្ទីរពេទ្យបង្អែកខេត្ត ចំណែកវត្ថុតាងម៉ូតូ និងរថយន្ថត្រូវបានយកទៅរក្សាទុករង់ចាំដោះស្រាយគ្នានៅការិយាល័យនគរបាលចរាចរណ៍នៃស្នងការដ្ឋាននគរបាលខេត្តពោធិ៍សាត់ ៕

ដោយ៖ ប៉ឹម ពិន