ភ្នំពេញ ៖លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា (កក្រក) កាលពី រសៀលថ្ងៃអង្គារ ១០កើត ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២១ ខែសីហា ឆ្នាំ២០១៨ម្សិលមិញនេះ បាននាំយកស្បៀង សម្ភារ និងថវិកាមួយចំនួន ក្នុងពេលចុះសួរសុខទុក្ខ លោកព្រឹន្ទបាលទោ ផាន់ ភូមិន្ទ អាយុ២៣ឆ្នាំ មន្ត្រីនគរបាលសង្កាត់ប៉ុស្តិ៍ចោមចៅទី៣ ដែលបានរងគ្រោះថ្នាក់ចរាចរណ៍បណ្តាលឱ្យបាក់ឆ្អឹងដងកាំបិតខាងស្តាំ នៅពេលលោកកំពុងប្រតិបត្តិការបង្ក្រាបបទល្មើសចោរឆក់ កាលពីយប់ថ្ងៃទី ១៩ ខែសីហា ឆ្នាំ២០១៨ ក្នុងភូមិសាស្ត្រខណ្ឌពោធិ៍សែនជ័យ រាជធានីភ្នំពេញ។
ក្នុងឱកាសនោះលោកស្រីបាននាំប្រសាសន៍សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តាំផ្ញើសួរសុខទុក្ខចំពោះលោក ផាន់ ភូមិន្ទ ដែលបានរងគ្រោះថ្នាក់នៅក្នុងឧបទ្ទវហេតុខាងលើនេះ និងសូមផ្តាំផ្ញើឲ្យថែទាំសុខភាព ព្យាបាលមុខរបួសឱ្យបានល្អ ឆាប់បានជាសះស្បើយវិលត្រឡប់ទៅបំពេញការងារបម្រើប្រជាពលរដ្ឋវិញ ។
លោកព្រឹន្ទបាលទោ ផាន់ ភូមិន្ទ បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែយកចិត្តទុកដាក់ គិតគូរ និងលើកទឹកចិត្តដល់ជនរងគ្រោះគ្រប់ប្រភេទដោយគ្មានការរើសអើងអ្វីឡើយ ៕ NKD
