ពេលស្រួលរកគ្នា ដល់ពិបាកបោះគ្នាចោល!! ទារកទើបនឹងកើត ម្តាយយកទៅបោះចោលនៅដីចំការត្រូវ ពលរដ្ឋរើសយកមកចិញ្ចឹម

ចែករំលែក៖

ភ្នំពេញ ៖ ហេតុការណ៍​ភ្ញាក់ផ្អើលមួយបន្ទាប់ពីប្រជាពលរដ្ឋបានប្រទះឃើញទារកទើបនឹងកើតថ្មីៗ នៅលើដីចំការក្រោយ ភូមិក្រាំងដូនទៃ សង្កាត់ចោមចៅ២ ខណ្ឌពោធិសែនជ័យ មិនដឹងថា ម្តាយ ឬឪពុក រូបណាចិត្តអប្រិយ បោះ បង់ចោលកូនរបស់ខ្លួន ដូចសត្វធាតុ តែសំណាងល្អ ទារកនៅមានជីវិតនៅឡើយ ហើយត្រូវបានប្រជាពលរដ្ឋឮសូរសម្លេងយំ រកមើលទើបឃើញរើសយកទៅរក្សាបីបាច់ថែទាំសុខភាព កាលពីវេលាម៉ិង៣និង៥០នាទី រសៀល ថ្ងៃទី០៨ ខែកញ្ញា ឆ្នាំ២០១៨ ។
តាមយុវជនឈ្មោះ សេង សុីថា អាយុ២៧ ឆ្នាំ មុខរបរ លក់ដូរ មានទីលំនៅ ក្នុងភូមិខាងលើ ក្បែរកន្លែងប្រទះឃើញក្មេង បានឲ្យដឹងថា មុនប្រទះឃើញទារកខាងលើ មានអ៊ុំប្រុសម្នាក់ ឮសូរសម្លេង ក្មេងយំ នៅ លើដីចំការក្រោយភូមិ ក្រោយផ្ទះប្រជាពលរដ្ឋ ហើយប្រាប់គាត់ឲ្យទៅរកមើល ឆ្ងល់ដែរ អ្នកណាបណ្តោយឲ្យក្មេងយំបែបនេះ ម្យ៉ាងមេឃរកកល់នឹងភ្លៀងផង លុះទៅតាមរកមើល ស្រាប់តែប្រទះឃើញ ក្មេងប្រុស (ទារកទើបកើតថ្មីៗ ) ត្រូវបានជនមិនស្គាល់មុខយកទៅដក់ផ្ទាល់នឹងដី រកអាណាព្យាបាលមិនឃើញ ណាមួយអាណិតក្មេង កើតមកបំណាច់តែបានឃើញពន្លឺព្រះអាទិត្យហើយ ម្តេចឡើយ ឪពុក ម្តាយ មានចិត្តទោម្នេញអ្វីជាមួយគ្នាដែលទើបនឹងកើតបែបនេះ សូម្បីតែផ្ចិតក៏មិនទាន់ចងផង តាមការស្និដ្ឋាន កើតភ្លាមយកមកបោះ ផ្លុងទុកចោលភ្លាម ដោយមិនបានឆ្លងកាត់គ្រូពេទ្យ ក៏រើសបីយកមកផ្ទះតែម្តង រួចរាយការណ៍ប្រាប់អាជ្ញាធរ អ្នកភូមិឲ្យជួយដឹងឮ ។
តាមស្រ្តីឈ្មោះ លន់ សំណាង អាយុ៣៥ឆ្នាំ ត្រូវជាបងថ្លៃបុរសខាងលើ មានទីលំនៅជាមួយគ្នា បានឲ្យដឹងថា បន្ទាប់ពីប្អូនប្រុសរបស់គាត់ ប្រទះឃើញទារក ហើយយកមកចូលផ្ទះ គាត់សែនអាណិតខ្លោចចិត្ត ឪពុក ពិសេសម្តាយទារកផ្ទាល់ កូនរបស់ខ្លួន កើតចេញពីផ្ទៃខ្លួនឯងហើយ ហេតុអ្វីក៏ចិត្តដាច់ម្លេះ ក្នុងករណី បុគ្គលខ្លួនឯងជាម្តាយ ជ្រុលជ្រួស បណ្តោយខ្លួន រហូតដល់មានកូនក្នុងផ្ទៃបែបណាក្តី ក៏ជាកូនកើតពីឈាមជ័រខ្លួនឯង មិនគួរណាបោះបង់គ្នាចោល តាមស្មៅ តាមព្រៃ  គ្មានព្រហ្មវិហារធម៌បែបនេះ ។
តែទោះជាយ៉ាងណាក្តី ទារកខាងលើ បន្ទាប់ពី យកចូលដល់ផ្ទះ បានរាយការណ៍ជាបឋមជូនទៅអាជ្ញាធរ ហើយសំខាន់ សង្រ្គោះអាយុជីវិតក្មេងជាមុនសិន ខណៈដែល ស្រមោចរោម បង្កឲ្យស្លាកស្នាមពេញខ្លួន ហើយផ្ចិត មិនទាន់ចង រាងកាយមិនទាន់ជូតលាង ទើបសម្រេចយកទៅពិនិត្យ សុខភាព នៅមន្ទីរពេទ្យបង្អែកពោធិចិនតុង ដើម្បីតាមដានសុខភាពទារកខាងលើបន្ត ៕ សុខាសែនជ័យ


ចែករំលែក៖
ពាណិជ្ជកម្ម៖
ads2 ads3 ambel-meas ads6 scanpeople ads7 fk Print