ភ្នំពេញ៖ ជនសង្ស័យម្នាក់ត្រូវបានកម្លាំងសមត្ថកិច្ចប៉ុស្តិ៍នគរបាលផ្សារដើមថ្កូវ ធ្វើការឃាត់ខ្លួនរួមទាំងវត្ថុតាង ក្នុងករណីជួញដូរនិងប្រើប្រាស់នូវសារធាតុញៀនដោយខុសច្បាប់ ។

ការឃាត់ខ្លួនជនសង្ស័យរូបនេះបានធ្វើឡើងកាលពីវេលាម៉ោង២២ និង៣០នាទីយប់ ថ្ងៃទី២៤ ខែវិឆ្ឆិកា ឆ្នាំ២០១៥ នៅចំណុចផ្ទះគ្មានលេខ ច្រកចូលផ្លូវឌឿងហែលកែងផ្លូវព្រះមុន្នីវង្ស ស្ថិតក្នុងសង្កាត់ផ្សារដើមថ្កូវ ខណ្ឌចំការមន ។

ជនសង្ស័យមានឈ្មោះចាន់ ដែន ភេទប្រុស អាយុ៣៥ឆ្នាំ មុខរបរដើររើសអេតចាយ ស្នាក់នៅក្បែរផ្លូវព្រះមុន្នីវង្ស ក្រុម៣២ ភូមិ៥ សង្កាត់ផ្សារដើមថ្កូវ ខណ្ឌចំការមន ។ រីឯវត្ថុតាងដែលកហូតបានពីជនសង្ស័យរួមមាន៖ ម្ស៉ៅក្រាមសថ្លា ចំនួន២កញ្ចប់តូច, ដាវសាំម៉ូរៃ ចំនួន១, កូនថង់ផ្លាស់ស្ទិចសម្រាប់ច្រកថ្នាំញៀនមួយចំនួន, ឧបករណ៍សំរាប់ចូកថ្នាំចំនួន១, កញ្ចប់បារីម៉ាកហ្វីន១ នៅក្នុងហោប៉ៅខោខាងស្ដាំរបស់ជនសង្ស័យផងដែរ ។

បើតាមប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនពេលឃាត់ខ្លួនជនសង្ស័យខាងលើ គឺនៅវេលាម៉ោង២២ និង៣០នាទីយប់នៅថ្ងៃទី២៤ ខែវិឆ្ឆិកា ឆ្នាំ២០១៥ កម្លាំងរបស់សមត្ថកិច្ចបានជិះល្បាតក្នុងភូមិសាស្ត្ររបស់ខ្លួន បានជិះដល់ចំណុចកើតហេតុខាងលើក៏បានជួបប្រទះជនសង្ស័យខាងលើ ដោយមានការសង្ស័យកម្លាំងសមត្ថកិច្ចក៏ឃាត់ខ្លួននិងសុំធ្វើការត្រួតពិនិត្យលើដងខ្លួនជនសង្ស័យក៏ប្រទះឃើញវត្ថុតាងនៅលើដងខ្លួនជនសង្ស័យដែលរៀបរាប់ដូចខាងលើ ។

បច្ចុប្បន្នជនសង្ស័យកំពុងធ្វើការសាកនាំ និងកសាងសាណុំរឿងបញ្ចូនទៅអធិការដ្ឋាននគរបាលខណ្ឌចំការមន រងចាំដោះស្រាយតាមនីតិវិធីច្បាប់៕

ដោយ៖ ភារ៉ា ដង្កោ