ខេត្តរតនគិរី៖ រថយន្តក្រុមហ៊ុនចំការកៅស៊ូហង្សអាញ់លំផាត បើកបរដោយជនជាតិវៀតណាម ដែលស្រវឹងស្រាជោកជាំ បង្កគ្រោះថ្នាក់ដល់អ្នកដទៃ ទៅបុកម៉ូតូដែលកំពុងបើកបរនៅលើផ្លូវអាទិភាពរបស់ខ្លួនបណ្តាលឲ្យស្លាប់៣នាក់ឪពុក ម្តាយ និងកូនប្រុសយ៉ាងអាណោចអាធ័មនៅនឹងកន្លែងកើតហេតុ ។
ហេតុការណ៍នេះបានកើតឡើងកាលពីវេលាម៉ោង២និង៣០នាទីរសៀល ថ្ងៃទី២៥ ខែវិច្ឆិកា ឆ្នាំ២០១៥ ស្ថិតនៅតាមបណ្តោយផ្លូវជាតិលេខ៧៦ ភូមិព្រួក ឃុំប៉ាតាង ស្រុកលំផាត់ ខេត្តរតនគិរី ។
អ្នករាយការណ៍ព័ត៌មានគេហទំព័រនគរវត្តប្រចាំនៅខេត្តរតនគិរី លោក អ៊ុច សាវុទ្ធ បានបញ្ជាក់ថា ក្នុងហេតុការណ៍គ្រោះថ្នាក់រវាងរថយន្ត នឹងម៉ូតូនេះបានបណ្តាលឲ្យស្លាប់មនុស្ស៣នាក់យ៉ាងអាណោចអាធ័ម ។ ចំណែកខាងអ្នកបើកបររថយន្តបង្ករបស់ក្រុមហ៊ុនចំការកៅស៊ូលំផាតដែលសុទ្ធតែស្រវឹងស្រា និងជាជនជាតិវៀតណាមនោះបានរងរបួសធ្ងន់ត្រូវបញ្ជូនទៅកាន់មន្ទីរពេទ្យ ។ ជាមួយគ្នានេះដែរ ក្រុមជនបង្កនេះបានហាមអ្នកកាសែតមិនឲ្យថតរូបពួកគេដែលស្ថិតនៅក្នុងមន្ទីរពេទ្យនោះទៀតផង ។
នគរបាលចរាចរណ៍មូលដ្ឋានដែលចុះពិនិត្យដល់កន្លែងកើតហេតុបានបញ្ជាក់ថា មុនពេលកើតហេតុ រថយន្តបង្កម៉ាក CRITON ពាក់ស្លាកលេខ រតនគិរី 2A- 0380 ពណ៌កណ្តុរល្មែះ ចរាចរណ៍ក្នុងទិសដៅពីជើងទៅត្បូង ក្នុងស្ថានភាពអ្នកបើកបរស្រវឹងស្រា
លុះមកដល់ចំណុចកើតហេតុ ក៏រេចង្កូតចូលទៅផ្លូវអាទិភាពរបស់ម៉ូតូជិះឌុបគ្នា៣នាក់ ក្នុងទិសដៅពីត្បូងមកជើងនោះ បណ្តាលឲ្យស្លាប់ទាំង៣នាក់តែម្តង ។
ប្រភពបានបន្តថា ជនរងគ្រោះទាំង៣នាក់ដែលស្លាប់មានឈ្មោះ ១.ចាន់ លាភ ភេទស្រី អាយុ២០ឆ្នាំ ទីលំនៅភូមិព្រួក ឃុំប៉ាតាង ស្រុកលំផាត់ ខេត្តរតនគិរី, ២.ឈ្មោះ មុន សារឿន ភេទប្រុស អាយុ២០ឆ្នាំ ត្រូវជាប្តី ស្ត្រីឈ្មោះចាន់ លាភ ជាអ្នកបើកបរម៉ូតូ និង៣.ឈ្មោះ វិត សុវណ្ណរាជ ភេទប្រុស អាយុ១០ឆ្នាំ ត្រូវជាកូនចិញ្ចឹម ។
ក្រោយវាស់វែងកន្លែងកើតហេតុ សមត្ថកិច្ចនាំយករថយន្តបង្កទៅរក្សាទុកដើម្បីដោះស្រាយជាក្រោយ ។ រីឯសាកសពជនរងគ្រោះទាំង៣នាក់ សមត្ថកិច្ចប្រគល់ទៅឲ្យក្រុមគ្រួសារដើម្បីធ្វើបុណ្យតាមប្រពៃណី ៕
ដោយ៖ អ៊ុច សាវុទ្ធ
