ក្រសួងមហាផ្ទៃទុយណេស៊ីបានប្រកាសព័ត៌មានឲ្យដឹងថា មនុស្សយ៉ាងតិច១១នាក់បានបាត់បង់ជីវិត និង១៧នាក់ផ្សេងទៀតបានរងរបួស បន្ទាប់ពីរថយន្តដឹកកងអង្គរក្សរក្សាសន្តិសុខរបស់ប្រធានាធិបតីទុយណេស៊ីត្រូវបំផ្ទុះស្ថិតនៅក្នុងទីប្រជុំជនទុយណេស៊ីកាលពីថ្ងៃទី២៤ ខែវិច្ឆិកា ឆ្នាំ២០១៥ ។
លោក Walid Wkini អ្នកនាំពាក្យក្រសួងមហាផ្ទៃទុយណេស៊ីបានបញ្ជាក់ថា ហេតុការណ៍បំផ្ទុះរថយន្តខាងលើនេះបណ្តាលឲ្យស្លាប់កងអង្គរក្សាសន្តិសុខប្រធានាធិបតី១១នាក់ ។ ហេតុផលនៅពីក្រោយការវាយប្រហារដោយបំផ្ទុះគ្រាប់បែកក្នុងរថយន្តខាងលើនេះនៅមិនទាន់ដឹងនៅឡើយ ហើយក៏មិនទាន់មានក្រុមណាមួយចេញមុខទទួលស្គាល់ការវាយប្រហារនៅឡើយទេ ។
ការវាយប្រហារដោយបំផ្ទុះគ្រាប់បែកខាងលើនេះបានកើតឡើង ក្រោយរយៈពេលមិនដល់១០ថ្ងៃផងដែលអាជ្ញាធរទុយណេស៊ី បានដាក់ពង្រាយកម្លាំងដើម្បីរក្សាសន្តិសុខបន្ថែមទៀតនៅក្នុងរដ្ឋធានី កុំឲ្យមានអំពើហិង្សាកើតឡើង ។
ប្រទេសទុយណេស៊ីបានវក់វីដោយអំពើហិង្សាបង្កឡើងដោយក្រុមអិស្លាមជ្រុលនិយម បន្ទាប់ពីអតីតប្រធានាធិបតី Ben Ali ត្រូវបណ្តេញចេញពីអំណាចក្នុងព្រឹត្តិការណ៍បះបោរឆ្នាំ២០១១ ។
កាលពីដើមឆ្នាំ២០១៥ ក្រុមរដ្ឋអិស្លាម IS បានវាយប្រហារ២លើកគោលដៅទៅលើជនបរទេសដែលធ្វើឲ្យប៉ះពាល់យ៉ាងខ្លាំងក្លាដល់វិស័យទេសចរណ៍របស់ប្រទេសទុយណេស៊ីនោះផងដែរ ។
ប្រធានាធិបតីទុយណេស៊ី លោក Beji Caid Essebsi បានប្រកាសដាក់រដ្ឋស្ថិតនៅក្នុងគ្រាអាសន្ន និងចេញបំរាមគោចរនៅក្នុងប្រទេសនេះផងដែរ ក្រោយការវាយប្រហារខាងលើនេះរួចមក ។ ថ្លែងនៅតាមកញ្ចក់ទូរទស្សន៍ លោក Beji Caid Essebsi បានបញ្ជាក់ថា ដោយសារតែការឈឺចាប់ពីព្រឹត្តិការណ៍នេះ ខ្ញុំសូមប្រកាសដាក់រដ្ឋស្ថិតក្នុងគ្រាអាសន្នរយៈពេល៣០ថ្ងៃ ដើម្បីកងកម្លាំងមានសមត្ថកិច្ចអនុវត្តច្បាប់បំរាមគោចរនៅក្នុងប្រទេសទុយណេស៊ីឲ្យកាន់តែល្អប្រសើរចាប់ពីវេលាម៉ោង៩និង៣០នាទីយប់ ម៉ោងនៅក្នុងតំបន់ រហូតដល់ម៉ោង៥ទៀបភ្លឺ រៀងរាលថ្ងៃ ។
លោកប្រធានាធិបតី Beji Caid Essebsi បានហៅការវាយប្រហារបំផ្ទុះរថយន្តដឹកកងកម្លាំងរក្សាសន្តិសុខនោះថា ជាទង្វើភេរវកម្ម ដែលបណ្តាលឲ្យស្លាប់១២នាក់ និង១៧នាក់ផ្សេងទៀតរងរបួសនោះ ៕
ប្រែសម្រួល៖ ថាច់ យ៉ាត
