ភ្នំពេញ៖នៅថ្ងៃអង្គារ ទី២៥ ខែកញ្ញា ឆ្នាំ២០១៨ នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យមន្ត្រីក្រោមឱវាទ ចុះសួរសុខទុក្ខនិងនាំយកអំណោយមនុស្សធម៌ផ្តល់ជូនលោក មាស សាឯមវិរី មន្ត្រីនគរបាលប៉ុស្តិ៍អូឡាំពិក១ ដែលត្រូវបានរថយន្តបុកពេលកំពុងល្បាតបទល្មើសកាលពីយប់ថ្ងៃទី ២២ ខែកញ្ញា បណ្តាលឱ្យរងរបួលក្បាលធ្ងន់ធ្ងរ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ក្នុងឱកាសចុះសួរសុខទុក្ខនោះ លោក ឌួង អេលីត នាយកពិធីការ បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ និងក្តីអាណិតអាសូរចំពោះ លោក មាស សាឯមវិរី ដែលបានជួបគ្រោះថ្នាក់នេះ និងជូនពរឆាប់បានជាសះស្បើយពីរបួស ឆាប់ត្រឡប់ទៅជួបជុំគ្រួសារ និងបំពេញការងារដើម្បីប្រជាពលរដ្ឋវិញ។
ម្តាយជនរងគ្រោះ មានក្តីរំភើបស្រក់ទឹកភ្នែក ដោយបាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន យកចិត្តទុកដាក់ គិតគូរ និងលើកទឹកចិត្តដល់ប្រជាជនរងគ្រោះដោយគ្មានការរើសអើងអ្វីឡើយ។
អំណោយដែលបានប្រគល់ជូនរួមមាន ៖ ផ្លែឈើ ១កន្ត្រក ទឹកត្រចៀកកម្ម ១កន្ត្រក ទឹកដោះគោEnsure ២កេស មី២កេស ទឹកក្រូច ២កេស ទឹកសុទ្ធ ២កេស មុង១ ភួយ១ សារុង១ ក្រមា១ និងថវិកាមួយចំនួន។ ដោយឡែក អ្នកជំងឺ ២នាក់ ដែលកំពុងសម្រាកព្យាបាលក្បែរនោះ ក៏ទទួលបាន មុង១ ភួយ១ សារុង ១ ក្រមា១ និងថវិកាមួយចំនួនដែរ៕
ដោយ៖ ចេស្តា
