ខេត្តស្វាយរៀង៖ លោកយាយកម្សត់ ព្រមទាំងចៅប្រុសពិការម្នាក់បានស្រែកហៅ អ្នកភូមិឲ្យជួយពន្លត់ភ្លើង ខណៈបង្កាត់ភ្លើងដាក់ស្ងោរដំឡូង រួចទៅជញ្ជត់ត្រីក្រឹមនៅឯស្រះកាលពីវេលាម៉ោង១១ព្រឹក ថ្ងៃទី២៥ ខែវិច្ឆិកា ឆ្នាំ២០១៥ ស្ថិតក្នុងភូមិកក់ ឃុំស្វាយរំពារ ស្រុកស្វាយទាប ខេត្តស្វាយរៀង ។
មន្ត្រីកងរាជអាវុធហត្ថស្រុកស្វាយទាបបានឲ្យដឹងថា ផ្ទះដែលត្រូវភ្លើងឆេះមានទំហំប្រមាណ៣ម៉ែត្រកន្លះ គុណនឹង៦ម៉ែត្រ សង់ពីឈើប្រក់ស្លឹក។ ម្ចាស់ផ្ទះរងគ្រោះដោយភ្លើងឆេះផ្ទះឈ្មោះ វង សាគុត ភេទស្រី អាយុ៧៧ឆ្នាំ មានចៅប្រុសពិការម្នាក់ក្នុងបន្ទុក ។
លោកយាយឲ្យដឹងថា មុនកើតពេលហេតុគាត់ដាក់បង្កាត់ភ្លើងស្ងោរដំឡូងទូកចោលហើយបាននាំចៅប្រុសទៅជញ្ចាត់ត្រីនៅក្នុងស្រះក្បែរផ្ទះភ្លេចខ្លួនបណ្តាលឲ្យឆេះផ្ទះគ្មានសល់តែម្តង ។ លោកយាយបានបន្តថា នៅក្នុងអគ្គិភ័យនេះភ្លើងបានឆេះសម្ភារមួយចំនួនដូចជា កង់១មួយគ្រឿង លុយ៥សែនរៀល ដែលគាត់ខំសន្សំជាយូរមកហើយទុកសម្រាប់ដោះស្រាយជីវភាព និងមើលថែចៅប្រុសពិការ ។
ដោយមើលឃើញពីទុក្ខលំបាករបស់លោកយាយ វង សាគុត ត្រូវភ្លើងឆេះផ្ទះ និងទ្រព្យសម្បត្តិបន្តិចបន្តួចនេះ កាលពីព្រឹកថ្ងៃទី២៦ ខែវិច្ឆិកា ឆ្នាំ២០១៥ មេបញ្ជាការកងរាជអាវុធហត្ថខេត្តស្វាយរៀងលោកសែ វុទ្ធី ក៏បានដឹកនាំកម្លាំងក្រោមឱវាទចុះសាកសួរសុខទុក្ខ ព្រមទាំងបាននាំយកអំណោយគ្រឿងឧបភោគបរិភោគមានដូចជាអង្ករ១០០គីឡូក្រាមមីយើង៥កេសត្រីខ២យួរធុងទឹក១ទឹកត្រី១យួរទឹកស៊ីអីវ១យួរឆ្នាំងខ្ទះ១វែកបាយ១ស្លាបព្រា១ឡូរចាន១ឡូរព្រមទាំងថវិកាចំនួន១០០ដុល្លារ ៕
ដោយ៖ យឹម សុថាន
