ខេត្តពោធិ៍សាត់ ៖ យុវជនម្នាក់ បានស្លាប់ភ្លាមៗនៅនឹងកើតហេតុ ខណៈកំពុងជិះសុខៗ ត្រូវរថយន្តម៉ាក Toyota vigo មួយគ្រឿង បោលបុកទាំងកំរោល កាលពីវេលាម៉ោង៦៖៣០នាទីយប់ នៅថ្ងៃអង្គារ ៨រោច ខែភទ្របទ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី២ ខែតុលា ឆ្នាំ២០១៨ នៅលើផ្លូវជាតិលេខ៥ ចន្លោះបង្គោលគីឡូម៉ែត្រលេខ១៨៩-១៩០ នៅខាងលិចទីស្នាក់ការគយខេត្តពោធិសាត់ ប្រហែល១៥០ម៉ែត្រ ស្ថិតនៅភូមិត្នោតទ្រេត សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញមានរថយន្ត១គ្រឿង ម៉ាក Toyota vigo ពណ៌ខ្មៅ ពាក់ស្លាកលេខ ភ្នំពេញ 2R-7599 បើកបរពីទិសខាងកើតទៅលិច (មិនប្រកាន់ស្ដាំ) ក្នុងល្បឿនលឿន ក៏ជ្រុលចង្កូតទៅបុកម៉ូតូមួយគ្រឿង ម៉ាក Honda wave ពណ៌ខៀវ ពាក់ស្លាកលេខ ពោធិ៍សាត់ 1A-5246 ពីទិសខាងលិចទៅកើត បើកបរដោយឈ្មោះ ញឹម ដាវីន ភេទប្រុស អាយុ២១ឆ្នាំ ជនជាតិខ្មែរ មុខរបរ កសិករ រស់នៅភូមិគក សង្កាត់ផ្ទះព្រៃ ក្រុងពោធិសាត់ ខេត្តពោធិសាត់ ស្លាប់នៅហ្នឹងកន្លែងកើតហេតុ។ ចំណែកអ្នកបើកបររថយន្ត បានរត់គេចខ្លួនបាត់។

បច្ចុប្បន្ន សពជនរងគ្រោះ ត្រូវបានប្រគល់ជូនក្រុមគ្រួសាររួចរាល់ហើយ ចំណែកវត្ថុតាងទាំង២គ្រឿង សមត្ថកិច្ចយកមករក្សាទុកនៅអធិការដ្ឋានក្រុងពោធិសាត់ ដើម្បីបន្តនីតិវិធីច្បាប់៕ ដោយ បឹុម ពិន