ខេត្តកណ្តាល៖ បុរសម្នាក់ព្រោះតែខឹងសម្បាទៅលើស្ត្រីជាប្រពន្ធប្តឹងសមត្ថកិច្ចនគរបាលមូលដ្ឋានឲ្យកោះហៅសាកសួរជុំវិញករណីប្រើអំពើហិង្សាក្នុងគ្រួសារ ក៏បានយកញញួរវាយក្បាលប្រពន្ធដេកសន្លប់ក្នុងថ្លុកឈាម បន្ទាប់ពីធ្វើសកម្មភាពរួចជនដៃដល់ជាប្តីបានយកកាំបិតចុងស្រួចចាក់ប្រហារខ្លួនឯងបណ្តាលឲ្យរងរបួសដេកសន្លប់ក្នុងថ្លុកឈាមផងដែរ ។ ក្រោយពីមានហេតុការណ៍កើតឡើងជនដៃដល់ជាប្តីនិងស្ត្រីរងគ្រោះជាប្រពន្ធ ត្រូវបានក្រុមគ្រួសារដឹកបញ្ជូនទៅសង្រ្គោះនៅមន្ទីរពេទ្យ ។
ករណីហិង្សានៅក្នុងគ្រួសារនេះបានកើតឡើងកាលពីវេលាម៉ោង១៩ និង ៣០នាទី ថ្ងៃទី២៦ ខែវិច្ឆិកា ឆ្នាំ២០១៥ ស្ថិតក្នុងភូមិព្រែករុន ឃុំព្រែកគយ ស្រុកស្អាង ។
ជនដៃដល់ជាប្តីឈ្មោះ សុន សុង ភេទប្រុស អាយុ៤៩ឆ្នាំ ជនជាតិខ្មែរ មុខរបរ ជាសន្តិសុខក្រុមហ៊ុនឯកជន (រងរបួសលើកញ្ចឹង.ក១កន្លែង) រីស្ត្រីរងគ្រោះជាប្រពន្ធឈ្មោះ គ្រី តិចអ៊ីម ភេទស្រី អាយុ៤៧ឆ្នាំ ជនជាតិខ្មែរ មុខរបរ ជាអ្នកលក់-ដូរ (រងរបួសក្បាល ,ភ្នែក និងកញ្ចឹង.ក) ។ ជនដៃដល់និងស្ត្រីរងគ្រោះបានចាប់ដៃគ្នាជាប្តី-ប្រពន្ធអស់រយៈពេលជាច្រើនឆ្នាំមកហើយ បច្ចុប្បន្នមានកូន២នាក់រស់នៅក្នុងភូមិព្រែករុន ឃុំព្រែកគយ ស្រុកស្អាង ។
មន្ត្រីនគរបាលស្រុកស្អាងបានឲ្យដឹងថា នៅវេលាល្ងាចថ្ងៃទី២៤ ខែវិច្ឆិកា ឆ្នាំ២០១៥ ជនដៃដល់ជាប្តីមានសភាពស្រវឹងស្រាបានស្រែកឡូឡាជេរប្រមាថទៅលើស្ត្រីជាប្រពន្ធ ព្រមទាំងបានធ្វើសកម្មភាពវាយបំផ្លិចបំផ្លាញទ្រព្យសម្បត្តិនៅក្នុងផ្ទះបែកខ្ទេចខ្ទីគ្មានសល់ ។ ដោយខ្លាចបុរសជាប្តីធ្វើសកម្មភាពបែបនេះបន្តទៀតស្ត្រីជាប្រពន្ធ ក៏បានទៅដាក់ពាក្យបណ្តឹងចូលសមត្ថកិច្ចនគរបាលប៉ុស្តិ៍រដ្ឋបាលព្រែកគយនៅថ្ងៃទី២៥ ខែឆ្នាំដដែល ដើម្បីឲ្យសមត្ថកិច្ចជួយអន្តរាគមន៍ហៅប្តីរបស់ខ្លួនទៅធ្វើការអប់រំណែនាំបញ្ឈប់សកម្មភាពបន្តទៀត ។
ប្រភពដដែលបានបន្តថា បន្ទាប់ពីទទួលបានពាក្យបណ្តឹងពីស្ត្រីជាប្រពន្ធរួចមក នៅថ្ងៃទី២៦ ខែវិច្ឆិកា ឆ្នាំ២០១៥ សមត្ថកិច្ចនគរបាលប៉ុស្តិ៍បានចេញលិខិតកោះហៅជនសង្ស័យជាប្តីឈ្មោះ សុន សុង ឲ្យចូលខ្លួនទៅកាន់ប៉ុស្តិ៍នគរបាលរដ្ឋបាលដើម្បីសាកសួរ ។ ក្រោយពីទទួលបានលិខិតកោះហៅរបស់សមត្ថកិច្ច ជនសង្ស័យបានផ្ទុះកំហឹងយ៉ាងខ្លាំងស្រែកជែរប្រមាថនិងចាប់ស្ត្រីជាប្រពន្ធវាយក្បាលដោយញញួរបណ្តាលឲ្យរងរបួសក្បាល ។ មិនតែប៉ុណ្ណោះជនដៃដល់ជាប្តីបានយកកាំបិតចុងស្រួចចាក់ប្រហារទៅកញ្ចឹង.កស្ត្រីជាប្រពន្ធមួយកាំបិតទៀត រហូតសន្លប់ដេកដួលក្នុងថ្លុកឈាម ។
ក្រោយពីធ្វើសកម្មភាពវាយ និងចាក់ប្រហារទៅលើស្ត្រីជាប្រពន្ធរួចមក ជនដៃដល់ជាប្តីបានយកកាំបិតចុងស្រួចដែលចាក់ទៅលើប្រពន្ធនោះ ចាក់ប្រហារទៅលើកញ្ចឹង.កខ្លួនឯង បណ្តាលឲ្យរងរបួសដេកសន្លប់ក្នុងថ្លុកឈាមផងដែរ បន្ទាប់ពីមានហេតុការណ៍កើតឡើងជនដៃដល់ជាប្តី និងស្ត្រីរងគ្រោះជាប្រពន្ធ ត្រូវបានក្រុមគ្រួសារដឹកបញ្ជូនទៅសង្រ្គោះនៅមន្ទីរពេទ្យប្រតិបត្តិស្រុកស្អាង តែដោយសារស្ថានភាពរបួសធ្ងន់ធ្ងរពេកក្រុមគ្រូពេទ្យប្រតិបត្តិស្រុកស្អាងបានសម្រេច បញ្ជូនបន្តទៅសង្រ្គោះនៅមន្ទីរពេទ្យក្នុងរាជធានីភ្នំពេញ ។
អធិការនគរបាលស្រុកស្អាងលោកវរសេនីយ៍ទោ សេង សុជាតិ បានបញ្ជាក់ថា ករណីហិង្សាក្នុងគ្រួសារខាងលើនេះ សមត្ថកិច្ចនគរបាលនៅពុំទាន់ទទួលបានពាក្យបណ្តឹងពីក្រុមគ្រួសារស្ត្រីរងគ្រោះនោះទេ តែទោះបីជាបែបណាក្តីលោកបានបញ្ជាឲ្យកម្លាំងនគរបាលជំនាញយុត្តិធម៌ចុះធ្វើការស្រាវជ្រាវជុំវិញករណីនេះរាយការណ៍ជូនលោកព្រះរាជអាជ្ញាអមសាលាដំបូងខេត្ត ។ ចំណាត់ការយ៉ាងណានោះលោកនៅពុំទាន់ដឹងនៅឡើយ ព្រោះទុកឲ្យលោកព្រះរាជអាជ្ញាជាអ្នកសម្រេច ខណៈដែលជនដៃដល់និងស្ត្រីរងគ្រោះកំពុងសង្រ្គោះនៅមន្ទីរពេទ្យជាមួយគ្នា ៕
ដោយ៖ ស្អាងជ័យ
