ខេត្តកណ្ដាល ៖ ស្ពានទី៣ នៃផ្លូវសំពោង ក្នុងឃុំទឹកឃ្លាំង ស្រុកល្វាឯម ខេត្តកណ្ដាល បានបាក់ស្រុត កាលពីល្ងាចថ្ងៃ អង្គារ ៧ កើត ខែ អស្សុជ ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី១៦ខែតុលា ឆ្នាំ២០១៨ ដោយសារទឹកច្រោះនិងទឹកហូរឆ្លងកាត់ ធ្វើឲ្យប្រជាពលរដ្ឋ អាក់ ខានធ្វើដំណើរឆ្លងកាត់ ដោយមិនដឹងថាពេលថាស្ថាបនាបានឡើងវិញនោះទេ ។
ប្រជាពលរដ្ឋឃុំ ទឹកឃ្លាំង បានឲ្យដឹងថា ដោយសារតែ កត្តាគ្រឹៈ មិនសូវរឹងមាំ និងមានការកេង ចំណេញ ផ្នែកបច្ចេកទេស បណ្ដាលឲ្យ ទឹកហូរច្រោះ បាក់ស្ពានទី៣ នៃផ្លូវសំពោង ក្នុងឃុំទឹកឃ្លាំង ស្រុកល្វាឯម ខេត្តកណ្ដាល បាន កាលពីល្ងាច ថ្ងៃទី១៦ខែតុលា ឆ្នាំ២០១៨។
ចំណែកអាជ្ញាធរស្រុកល្វាឯម បានឲ្យដឹងថា មូលហេតុ ដែលបណ្ដាលឲ្យ ស្ពានបាក់បែបនេះ គឺមកពីគ្រឹៈ មិនរឹងមាំ គួបផ្សំនិង ទឹកហូរច្រោះ ហើយស្ពាន ផ្លូវសំពោងនេះ មានប្រែងទទឹង៨ម៉ែត្រ បណ្តោយជាង២០ម៉ែត្រ សាងសង់ដោយ កងវិស្វកម្ម កាលពីឆ្នាំ២០១២ ហើយមកដល់ឆ្នាំ២០១៨ ក៏បាក់ស្រុត តែម្ដង។
សម្រាប់ផ្លូវនេះ កាលអំឡុងទឹក កំពុងឡើង បានហូរដាច់ ជាច្រើនម៉ែត្រ ហើយរាល់ ការធ្វើដំណើរ គឺឆ្លងទូកដរ រហូតដល់បច្ចុប្បន្ន។ លុះដល់ ល្ងាចថ្ងៃទី១៦ ស្រាប់តែក្បាលស្ពាន នៅចំណុចខាងលើ បានស្រុត បាក់ស្ពានទាំងស្រុង ធ្វើឲ្យប្រជាពលរដ្ឋលែងមានស្ពានចម្លងពីភូមិមួយទៅភូមិមួយបានទៀតឡើយ ។
ប្រជាពលរដ្ឋបានសំណូមពរដល់អាជ្ញាធរមូលដ្ឋាន ឬ មន្ទីរសាធារណការនិងដឹកជញ្ជូនខេត្តកណ្តាល មេត្តារួសរាន់ធ្វើស្ពាននេះឡើងវិញផង ព្រោះស្ពាននេះជាស្ពានមានសារសំខាន់ចម្លងការធ្វើដំណើរ ឬការដឹកជញ្ជូនកសិផលប្រជាពលរដ្ឋទៅលក់នៅទីផ្សារបង្កើនសេដ្ឋកិច្ច គ្រួសារផងដែរ ៕
