ភ្នំពេញ៖ សមត្ថកិច្ចនគរបាលប៉ុស្តិ៍រដ្ឋបាលអូរបែកក្អម បានឃាត់ខ្លួនជនសង្ស័យម្នាក់ ករណីអំពើលួច(លួចយកដំណរស្ពានម៉ាស៊ីត្រជាក់) នៅចំណុចឃ្លាំងការដ្ឋានសំណង់មួយកន្លែង កាលពីម៉ោង១៩និង៣០នាទី ថ្ងៃទី១៨ខែតុលាឆ្នាំ២០១៨ តាមបណ្តោយផ្លូវបេតុង ភូមិទ្រុងមាន់ សង្កាត់អូរបែកក្អម ខណ្ឌសែនសុខ។

សមត្ថកិច្ច បានអោយដឹងថាជនសង្ស័យមានឈ្មោះ សែ សាត អាយុ១៨ឆ្នាំ ជនជាតិខ្មែរ មុខរបរកម្មករសំណង់ ស្នាក់នៅក្នុងការដ្ឋានសំណង់ ។ចំនែកជនរងគ្រោះឈ្មោះ លីម មួយលី ភេទស្រី អាយុ២៣ឆ្នាំ ជនជាតិខ្មែរ មុខរបរប្រធានផ្នែកក្រុមហ៊ុនGREE ស្នាក់នៅផ្ទះលេខ៥២០ ផ្លូវលេខ៦ ភូមិស្បាន់ខ្ពស់ សង្កាត់គីឡូតិ៍ម៉ែត្រលេខ៦ ខណ្ឌឬស្សីកែវ ។សម្ភារៈបាត់បង់ ៖ ដំណស្ពានម៉ាស៊ីនត្រជាក់មួយចំនួន ។

សមត្ថកិច្ចបានឲ្យដឹងថា មុនពេលកើតហេតុ ក្នុងវេលាយប់ថ្ងៃទី១៣តុលាដែលកន្លងទៅនេះ ជនសង្ស័យជាកម្មករសំណង់នៅចំណុចកើតហេតុ បានដើរមកដល់ឃ្លាំងដាក់សម្ភារៈគ្រឿងម៉ាស៊ីនត្រជាក់របស់ក្រុមហ៊ុន GREE ដោយមានសភាពស្ងាត់ ជនសង្ស័យបានឡើងតាមជញ្ជាំងឃ្លាំងចូលតាមដំបូល លួចយកបានដំណស្ពានម៉ាស៊ីនត្រជាក់មួយចំនួន រួចយកទៅលក់នៅកន្លែងអេតចាយ បានទឹកប្រាក់ចំនួន៧០,០០០រៀល។

លុះដល់ថ្ងៃទី១៥តុលា២០១៨ ជនសង្ស័យបានធ្វើសកម្មភាពចូលលួចសម្ភារៈខាងលើម្តងទៀត រួចយកទៅលក់នៅកន្លែងអេតចាយ បានលុយចំនួន៧០,០០០ រៀល។ ស្រាប់តែនៅថ្ងៃទី១៨តុលា២០១៨ម្សិលម៉ិញនេះ ជនរងគ្រោះបានទៅមើលឃ្លាំង ឃើញបាត់សម្ភារៈរបស់ក្រុមហ៊ុន ហើយបានទៅប្រាប់សន្តិសុខអោយយាមកាមអោយបានតឹងរឹងព្រោះមានការបាត់របស់ទ្រព្យក្រុមហ៊ុន។ លុះយប់ឡើង ឃើញជនសង្ស័យកំពុងឈរនៅក្បែរឃ្លាំងកើតហេតុ ដោយមានការសង្ស័យ សន្តិសុខបានឃាត់ជនសង្ស័យមកសួរនាំ ក្រោយការសួរនាំ ជនសង្ស័យបានសារភាពថាខ្លួនពិតជាបានចូលលួចយកសម្ភារៈខាងលើពិតប្រាកដមែន បន្ទាប់មកជនរងគ្រោះបាននាំខ្លួនជនសង្ស័យប្រគល់ឲ្យសមត្ថកិច្ចប៉ុស្តិ៍រដ្ឋបាលអូឬបែកក្អមធ្វើការសាកសួរ និងបានដាក់ពាក្យបណ្តឹងចោទប្រកាន់ជនសង្ស័យតែម្តង។

ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តបន្តតាមនីតិវិធី៕ជ្រោយពេជ្រ