ស្រ្ដីម្នាក់បានស្លាប់បន្ទាប់ពីសម្រាលកូនមន្ទីរពេទ្យមិត្ដភាពកម្ពុជា-គុយវែត

ចែករំលែក៖

ខេត្តកណ្ដាលៈ ស្រ្ដីវ័យ២៦ឆ្នាំម្នាក់បានស្លាប់បាត់បង់ជីវិតយ៉ាងអណោចអធ័ម បន្ទាប់ពីស្រ្ដីរួបនេះសម្រាលកូនទី៣នៅមន្ទីរពេទ្យមិត្ដភាពកម្ពុជា-គុយវែត ស្ថិតនៅភូមិលើ ឃុំព្រែកអញ្ចាញ ស្រុកមុខកំពូល កាលពីថ្ងៃអាទិត្យ ទី២១ ខែតុលា ឆ្នាំ២០១៨ ។

ស្រ្ដីរងគ្រោះស្លាប់បាត់បង់ជីវិតបន្ទាប់ពីសម្រាលកូននោះឈ្មោះ ញ៉ី ស៊ីយាត អាយុ២៦ឆ្នាំ មានស្រុកកំណើតនៅភូមិបាយសី សង្កាត់ស្ទឹងត្រង់ ខណ្ឌសាលាក្រៅ ខេត្ដប៉ៃលិន ។
បច្ចុប្បន្នស្នាក់នៅទីតាំងសិប្បកម្មឡឥដ្ឋសញ្ញាពន្លឺព្រះអាទិត្យ២ ស្ថិតក្នុងភូមិឈើទាល ឃុំព្រែកអញ្ចាញ ស្រុកមុខកំពូល ខេត្តកណ្តាល ។

សាច់ញាតិស្រ្ដីរងគ្រោះបានឲ្យដឹងថា នៅវេលាម៉ោង៥ព្រឹក ថ្ងៃទី២១ ខែតុលា ឆ្នាំ២០១៨ ស្រ្ដីរងគ្រោះមានអក្ការៈឈឺពោះរៀបចំសម្រាលកូនទី៣ ទើបបុរសជាប្ដីដឹកតាមម៉ូតូយកទៅសម្រាករងចាំសម្រាលកូននៅមន្ទីរពេទ្យមិត្ដភាពកម្ពុជា-គុយវែត ដែលជាពេទ្យមានជំនួយក្រៅពីអង្កការក្រៅរាជរដ្ឋាភិបាល ។ ពេលទៅដល់ស្រ្ដីរងគ្រោះត្រូវបានក្រុមគ្រូពេទ្យ២នាក់ជាអ្នកសម្រាលកូនឲ្យ ។ ក្រោយពីសម្រាលកូនបានប្រមាណកន្លះម៉ោង ស្រ្ដីរងគ្រោះមានអក្ការៈខុសប្លែកពីធម្មតា ពោលគឺបានធ្លាក់ឈាមតាមទ្វាមាសយ៉ាងច្រើន រហូតធ្វើឲ្យក្រុមគ្រូពេទ្យអស់លទ្ធភាពក៏សម្រេចបញ្ជូនស្រ្ដីរងគ្រោះបន្ដទៅកាន់មន្ទីរពេទ្យលោកសង្ឃ ក្នុងរាជធានីភ្នំពេញ ។

សាច់ញាតិបានបន្ដថា ពេលទៅដល់មន្ទីរពេទ្យ ក្រុមគ្រូពេទ្យប្រចាំនៅទីនោះបានព្យាយាមជួយសង្រ្គោះស្រ្ដីរងគ្រោះដែរ តែពុំអាចជួយបានទើបធ្វើឲ្យស្រ្ដីរងគ្រោះស្លាប់បាត់បង់ជីវិត ។ ក្រោយពីមានហេតុការណ៍កើតឡើង ប្ដីស្រ្ដីរងគ្រោះបានដឹកសពស្រ្ដីជាប្រពន្ធយកទៅតម្កល់ធ្វើបុណ្យតាមប្រពៃណីនៅវត្ដពោធិ៍មង្គល ស្ថិតក្នុងភូមិជ្រោយមេត្រីក្រោម ឃុំឬស្សីជ្រោយ ស្រុកមុខកំពូល ។

អធិការនគរបាលស្រុកមុខកំពូលលោក ព្រុំ សំណាង បានឲ្យដឹងថា ក្រោយពីមានហេតុការណ៍កើតឡើង លោកបានបញ្ជាឲ្យមន្រ្ដីជំនាញចុះទៅធ្វើកំណត់ហេតុសាកសួរក្រុមគ្រូពេទ្យនិងសាច់ញាតិជនរងគ្រោះ ។ គ្រូពេទ្យ២នាក់ដែលទទួលសម្រាលកូនឲ្យស្រ្ដីរងគ្រោះនោះទី១-ឈ្មោះ ចាន់ ថុន ភេទស្រី អាយុ៤៨ឆ្នាំ ជនជាតិខ្មែរ ជាពេទ្យឆ្មប មានទីលំនៅផ្ទះលេខ៥៥ ក្រុមទី៦ ភូមិកណ្ដាលទី១ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ។ ទី២-ឈ្មោះ វណ្ណ វិរៈ ភេទប្រុស អាយុ៣១ឆ្នាំ ជនជាតិខ្មែរ មានទីលំនៅភូមិពោធិ៍កិល ឃុំសួង ស្រុកត្បូងឃ្មុំ ខេត្ដត្បូងឃ្មុំ ។

លោក ព្រុំ សំណាង បានបញ្ជាក់ថា រហូតមកដល់ព្រឹកថ្ងៃទី២២ ខែតុលា ឆ្នាំ២០១៨ សមត្ថកិច្ចនគរបាលពុំទាន់ដឹងពីមូលហេតុដែលបណ្ដាលឲ្យស្រ្ដីរងគ្រោះស្លាប់បាត់បង់ជីវិតនោះទេ ពោលគឺរងចាំក្រុមគ្រូពេទ្យជំនាញខេត្ដ ចុះទៅពិនិត្យបន្ថែម ទើបដឹងមូលហេតុច្បាស់លាស់ ។ លោកអធិការបានបញ្ជាក់ថា មន្ទីរពេទ្យមិត្ដភាពកម្ពុជា-គុយវែត ជាមន្ទីរពេទ្យឯកជនតែមានជំនួយពីអង្កការក្រៅរដ្ឋាភិបាល ។ រហូតមកដល់ថ្ងៃទី២២ សមត្ថកិច្ចពុំទាន់ទទួលពាក្យបណ្ដឹងពីសាច់ញាតិស្រ្ដីរងគ្រោះនោះទេ ៕ស្អាងជ័យ


ចែករំលែក៖
ពាណិជ្ជកម្ម៖ Naza Wedding Planner ads2 ads3 ambel-meas ads5 ads6 scanpeople ads7 fk Print