ភ្នំពេញ ៖ សំណង់ផ្សារច្បាអំពៅដែលរងគ្រោះដោយអគ្គីភ័យឆាបឆេះកាលពីពាក់កណ្តាលខែមីនា ឆ្នាំ២០១៨ កន្លងទៅ ឥឡូវនេះបានសាងសង់ជិតរួចរាល់ហើយ  បើតាមការវាយតម្លៃក្រៅផ្លូវការបានប្រហែលជា៦០ទៅ ៧០ភាគរយ នេះបើយោងតាមការប៉ាន់ស្មានរបស់លោកគួច ចំណាន  ប្រធានគណៈកម្មការផ្សាច្បារអំពៅ  ដោយឡែកចំពោះភាពយឺតយ៉ាវនៃការសាងសង់លោកមិនបានបញ្ជាក់ប្រាប់នោះឡើយ  គ្រាន់តែប្រាប់ថានេះជាការងារបច្ចេកទេសខាងក្រុមហ៊ុនម៉ៅការសំណង់ ។

ពាក់ព័ន្ធការងារសាងសង់នេះដែរ លោកលោកគួច ចំណាន  ប្រធានគណៈកម្មការផ្សាច្បារអំពៅ បានបញ្ជាក់បន្ថែមថា  តាមការប៉ាន់ស្មានក្រៅផ្លូវការមកដល់ថ្ងៃនេះការដ្ឋានសាងសង់ផ្សារច្បារអំពៅបានប្រមាណជា៧០ភាគរយហើយ  នៅសល់តែការប្រក់ដំបូល  ចាក់សាបខាងក្រោម  និងរៀបចំប្រព័ន្ធលូ  ចំពោះតូបដែលរងគ្រោះដោយអគ្គីភ័យឆាបឆេះ  ខាងម្ចាស់តូបជាអ្នកចំណាយក្នុងការសាងសង់សាជាថ្មី  ដោយឡែកគ្រោងឆ្អឹងផ្សារ  ដំបូលផ្សារ  ប្រព័ន្ធលូ  និងការរៀបចំខ្សែបណ្តាញចរន្តអគ្គិសនីនៅក្នុងផ្សារខាងសាលារាជធានីភ្នំពេញជាអ្នកចំណាយ ។

លោកប្រធានផ្សារបានរំលឹកថា  ហេតុការគ្រោះអគ្គីភ័យដែលឆេះផ្សានេះកើតឡើងនៅយប់ថ្ងៃទី១៥ ខែមីនា ឆ្នាំ២០១៨  បណ្តាលអោយឆេះតូបរបស់អជីវករចំនួនជាង៥០០តូប ក្នុងចំណោមតូបជាង១៤០០តូប  ខូចខាតទ្រព្យសម្បត្តិអស់រាប់ម៉ឺងដុល្លារ  ។  បន្ទាប់ពីជួបគ្រោះអគ្គីភ័យឯកឧត្តមអភិបាលរាជធានីភ្នំពេញបានចុះមកដល់ទីតាំងកើតហេតុដើម្បីពិនិត្យពីទំហ៊ំនៃការខូចខាត និងទទួលយកសំណូមពរមកធ្វើការពិចារណាដើម្បីដោះស្រាយជូនអាជីវករ ។

បន្ទាប់ពីទទួលបានសំណូមពររបស់អាជីវករ  រដ្ឋបាលរាជធានីភ្នំពេញបានចាប់ផ្តើមធ្វើពិធីក្រុងពលីដើម្បីសាងសង់ផ្សារនិងតូបលក់នៅពាក់កណ្តាលខែមេសា ឆ្នាំ២០១៨  គិតមកដល់ពេលនេះមានរយៈពេល៧ខែហើយ  ។ ចំពោះការយឺតយ៉ាវក្នងការស្ថាបនាលោកប្រធានផ្សារមិនបានប្រាប់នោះទេ ។

ដោយឡែកលោកថេង សុថុល អភិបាលរងខណ្ឌច្បារអំពៅបានប្រាប់ថា  តាមការកុងត្រារបស់ក្រុមហ៊ុននិងធ្វើការសាងសង់អោយរួចរាល់ក្នុងរយៈពេល៣ខែ  តែឥឡូវនេះវាហួសកុងត្រា  ចំពោះមូលហេតុនៃការយឺតយ៉ាវលោកមិនដឹងថា   មកពីមូលហេតុអ្វីទេ….ដោយសារខាងក្រុមហ៊ុនដែលទទួលបានសិទ្ធសាងសង់មានហេតុផលផ្សេងៗ ។

លោកអភិបាលរងខណ្ឌបានបន្តថា  ផ្តើមចេញពីការសាងសង់មានភាពយឺតយ៉ាវនេះរដ្ឋបាលខណ្ឌបានធ្វើរបាយការណ៍ជូនទៅសាលារាជធានីភ្នំពេញហើយ  ដើម្បីសុំការគោលការណ៍ ។  ពេលនេះរដ្ឋបាលរាជធានីភ្នំពេញណែនាំនិងជំរុញអោយក្រុមហ៊ុនដែលកំពុងសាងសង់ផ្សារច្បារអំពៅត្រូវពន្លឿនការសាងសង់អោយបានឆាប់ដើម្បីបង្កលក្ខណៈងាយស្រួលអោយអាជីវករដែលជាម្ចាស់តូបរងគ្រោះដោយអគ្គីភ័យបានរកស៉ីឡើងវិញ  ៕ សណ្តោស