សម្តេច​តេជោ​ ៖​ ឱសថក្លែងក្លាយបង្កគ្រោះថ្នាក់យ៉ាងធ្ងន់ធ្ងរ ចំពោះអ្នកប្រើប្រាស់ ,​ សម្តេច​ផ្តល់​អនុសាសន៍​៦ចំណុច​ ទប់ស្កាត់​បញ្ហា​នេះ​ !

ចែករំលែក៖

ភ្នំពេញ​ ៖​ សម្តេច​តេជោ​ហ៊ុន​ សែន​ នាយករដ្ឋមន្ត្រី​នៃ​កម្ពុជា​ មាន​ប្រសាសន៍​ថា​ ឱសថក្លែងក្លាយពិតជាបង្កគ្រោះថ្នាក់យ៉ាងធ្ងន់ធ្ងរ ចំពោះអ្នកប្រើប្រាស់ ជាពិសេសនាពេលបច្ចុប្បន្ននេះមានឱសថដែលលក់តាម Online ជាច្រើន ដែលអាចបង្កគ្រោះថ្នាក់ដល់អ្នកប្រើប្រាស់ ពីព្រោះ​មិនមានប្រភពច្បាស់លាស់ ហើយធ្វើឱ្យអាជ្ញាធរពិបាក ក្នុងការគ្រប់គ្រង។

ប្រសាសន៍​សម្ដេច​តេជោ​ហ៊ុន​ សែន​ ធ្វើ​ឡើង​នៅ​ថ្ងៃទី​៥​ ខែ​វិច្ឆិកា​ ឆ្នាំ​២០១៨​ នេះ​ ក្នុង​ពេល​សម្តេច​តេជោ​អញ្ជើញជាអធិបតីបើកសន្និសីទអន្តរជាតិស្តីពី “ការប្រយុទ្ធប្រឆាំងឱសថក្លែងក្លាយ និង​ អន់គុណភាព”​នៅសណ្ឋាគារសូហ្វីតែលភ្នំពេញភូគីត្រា​ រាជធានី​ភ្នំពេញ​ ។

សន្និសីទអន្តរជាតិថ្នាក់តំបន់ជាលើកដំបូងស្តីពី “ការប្រយុទ្ធប្រឆាំងឱសថក្លែងក្លាយ និងអន់គុណភាព”នេះត្រូវបានបង្កើតឡើងបន្ទាប់ពីមានការផ្តួចផ្តើមគំនិតរវាង សម្តេចតេជោ ហ៊ុន សែន និងលោក ហ្សង់ ដេវិត ឡឺវីត ប្រធានក្រុមប្រឹក្សាភិបាល នៃវិទ្យាស្ថានស្រាវជ្រាវប្រឆាំងឱសថក្លែងក្លាយ កាលពីពេលកន្លងទៅ។

សន្និសីទនេះគឺធ្វើឡើងរយៈពេល២ថ្ងៃ ចាប់ពីថ្ងៃទី០៥-០៦ ខែវិច្ឆិកា ឆ្នាំ​២០១៨​ ដោយមានការអញ្ជើញចូលរួមពី មន្ត្រីពាក់ព័ន្ធនៃប្រទេសបារាំង ប្រទេសតំបន់ទន្លេមេគង្គរួមមាន កម្ពុជា, ឡាវ, មីយ៉ាន់ម៉ា​ , ថៃ និងវៀត ណាម រួមទាំងប្រទេសចិន ព្រមទាំងមកពីក្រសួងស្ថាប័នពាក់ព័ន្ធរបស់ រាជរដ្ឋាភិបាលកម្ពុជា អង្គភាព នានា តាមបណ្តាលរាជធានី ខេត្ត ភ្ញៀវជាតិ អន្តរជាតិ និងតំណាងវិស័យឯកជនមួយចំនួនចូលរួម ប្រមាណសរុប៤៥០នាក់។

សម្តេច​តេជោ​ នៅក្នុងសន្និសីទតំបន់ស្តីពីការប្រយុទ្ធប្រឆាំងឱសថក្លែងក្លាយនិងអន់គុណភាព​ នេះ បានផ្ដល់អនុសាសន៍សំខាន់ៗ ៦ចំណុចដូចខាងក្រោម៖

១)រៀបចំនិងចាត់វិធានការកែទម្រង់ច្បាប់និងបទដ្ឋានគតិយុត្តនានាតាមការចាំបាច់របស់ប្រទេសរៀងៗខ្លួន ដើម្បីធានាអោយបាននូវក្របខ័ណ្ឌច្បាប់ដែលអនុលោមជាមួយន្តការអន្តរជាតិ។

២)អនុវត្តវិធានការប្រយុទ្ធប្រឆាំងបទល្មើសឱសថក្លែងក្លាយនិងអន់គុណភាព ជាពិសេសត្រូវផ្ដន្ទារ ទោសយ៉ាងតឹងរឹងចំពោះជនល្មើស និងជនទាំងឡាយណាដែលមានការពាក់ព័ន្ធ។

៣)ប្រទេសនីមួយៗគួរបង្កើតក្រុមជំនាញពាក់ព័ន្ធការងារប្រយុទ្ធប្រឆាំងនឹងបទល្មើសឱសថក្លែងក្លាយនិងអន់គុណភាពក្នុងគោលដៅសម្របសម្រួលបញ្ជូនពត៌មាន និងផ្សព្វផ្សាយអំពីហានិភ័យ និងគ្រោះ ថ្នាក់ផ្សេងៗដល់សាធារណៈជននិងកិច្ចសហប្រតិបត្តិការខ្ពស់ក្នុងតំបន់ដើម្បីប្រយុទ្ធប្រឆាំងនិងទប់ស្កាត់ការផលិតការចរាចរណ៍ឱសថក្លែងក្លាយនិងអន់គុណភាពឲ្យមានប្រសិទ្ធភាពនិងទាន់ពេលវេលា។

៤)អាជ្ញាធរគ្រប់លំដាប់ថ្នាក់នៅតាមព្រំដែននៃប្រទេសនីមួយៗត្រូវផ្តល់កិច្ចសហប្រតិបត្តិការជិតស្និទ្ធជាមួយគ្នាក្នុងការស្វែងរកបទល្មើសពាក់ព័ន្ធនឹងឱសថក្លែងក្លាយនិងអន់គុណភាពហើយត្រូវបង្កើតកម្មវិធីផ្លាស់ប្ដូរព័ត៌មានដើម្បីស៊ើបអង្កេតរកប្រភពសង្វាក់ផលិត ការចែកចាយ និងអត្តសញ្ញាណឧក្រិដ្ឋជន ទាំងនោះ។

៥)បង្កើនកិច្ចសហប្រតិបត្តិការរវាងស្ថាប័នរដ្ឋនិងឯកជនជាពិសេសម្ចាស់ក្រុមហ៊ុនដែលផលិតឱសថដើម្បីស្រាវជ្រាវរកឱសថក្លែងក្លាយនិងអន់គុណភាពដែលកំពុងចរាចរណ៍លើទីផ្សារហើយត្រូវរាយការណ៍ទៅអាជ្ញាធរមានសមត្ថកិច្ចដើម្បីចាត់វិធានការតាមផ្លូវច្បាប់។

៦)សម្តេចតេជោសូមជំរុញឲ្យសន្និសីទនេះបានក្លាយទៅជាសន្និសីទមួយដែលត្រូវបានពង្រីកក្នុងក្របខណ្ឌប្រទេសនៅក្នុងតំបន់អាស៊ានហើយគួរត្រូវដាក់បញ្ចូលផងដែរក្នុងកិច្ចប្រជុំកំពូលអាស៊ី-អឺរ៉ុប (ASEM-2020) ដែលកម្ពុជាត្រូវរៀបចំធ្វើជាម្ចាស់ផ្ទះនៅក្នុងឆ្នាំ២០២០ខាងមុខ។ សម្តេចតេជោ សូមឲ្យរួមគ្នាដើម្បីប្រែក្លាយយន្តការនេះក្លាយទៅជាយន្តការអន្តរជាតិដែលកើតចេញពីការផ្ដួចផ្ដើមរួមគ្នាដើម្បីទប់ស្កាត់និងបង្ការគ្រោះថ្នាក់ដល់ប្រជាពលរដ្ឋទាំងអស់។

ទន្ទឹមនឹងនេះដែរ សម្តេចតេជោ ហ៊ុន សែន នាយករដ្ឋមន្ត្រីបានថ្លែងអំណរគុណ ចំពោះសាធារណៈ រដ្ឋបារាំង ជាពិសេស វិទ្យាស្ថានស្រាវជ្រាវអន្តរជាតិប្រយុទ្ធប្រឆាំងឱសថក្លែងក្លាយ និងអ្នកជំនាញមក ពីអង្គការសុខភាពពិភពលោក (WHO) ព្រមទាំងស្ថាប័នអន្តរជាតិនានាដែលបានឧបត្ថម្ភថវិកា និងសម្ភារៈបច្ចេកទេស។

មុននឹងបញ្ចប់ សម្តេចតេជោ ហ៊ុន សែន បានជូនពរដល់ភ្ញៀវជាតិ និងអន្តរជាតិ ទាំងអស់ជួបតែសេចក្តីសុខចម្រើននិងទទួលបានជោគជ័យរៀងៗខ្លួន ព្រមទាំងទទួលបាននូវ អនុស្សវរីយ៍ល្អពីសន្និសីទថ្ងៃនេះ៕ ចេស្តា

...

 


ចែករំលែក៖
ពាណិជ្ជកម្ម៖ Naza Wedding Planner ads2 ads3 ambel-meas ads5 ads6 scanpeople ads7 fk Print