ភ្នំពេញ៖លោក ផាត សុផានិត អ្នកនាំពាក្យរងក្រសួងមហាផ្ទៃ ថ្លែងថា លោក William A. Heidt ឯកអគ្គរដ្ឋទូតសហរដ្ឋអាមេរិក ដែលបញ្ចប់អាណត្តិនៅកម្ពុជា បានអះអាងថា ក្នុងនាមផ្ទាល់ខ្លួនលោកបានស្នើឱ្យរដ្ឋាភិបាលសហរដ្ឋ អាមេរិក ពិចារណាក្នុងលុបចោលទណ្ឌកម្មទិដ្ឋាការ (Visa) ពីមន្ដ្រីនៃរាជរដ្ឋាភិបាលកម្ពុជា ដើម្បីបន្ដពង្រឹងនូវកិច្ចសហប្រតិបត្តិការនៃប្រទេសទាំងពីរឡើងវិញ។
ការលើកឡើងរបស់ឯកអគ្គរដ្ឋទូតសហរដ្ឋអា មេរិក លោក William A. Heidt បានធ្វើឡើងក្នុងជំនួបជាមួយសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នៅរសៀលថ្ងៃទី១៤ ខែវិច្ឆិកា ឆ្នាំ២០១៨ នេះ នៅទីស្ដីការក្រសួងមហាផ្ទៃ។
ក្រោយបញ្ចប់ជំនួបនេះ លោក ផាត សុផានិត អ្នកនាំពាក្យរងក្រសួងមហាផ្ទៃ បានប្រាប់ក្រុមអ្នកសារព័ត៌មានយ៉ាងដូច្នេះថា «ក្នុងនាមឯកឧត្តម (William A. Heidt ) ផ្ទាល់ខ្លួនបានស្នើយោបល់ គួរឱ្យសហរដ្ឋអាមេរិក ពិនិត្យលទ្ធភាពសម្រួល ឬដកចេញនូវទណ្ឌកម្ម Visa ដែលបានដាក់មកលើមន្ដ្រីរបស់កម្ពុជាមួយចំនួន”។
លោកផាត សុផានិត បន្តដោយលើកយកសម្តីលោក William A. Heidt ប្រាប់ក្រុមអ្នកសារព័ត៌មាន ថា”ទោះបីជាមកដល់ពេលនេះ ឯកឧត្តមមិនទាន់ទទួលបានការឆ្លើយតបយ៉ាងណា ពីខាងអន្ដោប្រវេសន៍សហរដ្ឋអាមេរិក ប៉ុន្ដែឯកឧត្តម នឹងបន្ដយកបញ្ហានេះទៅជជែកជាមួយសហរដ្ឋអាមេរិកទៀត នៅពេលឯកឧត្តមទៅកាន់សហរដ្ឋអាមេរិកវិញ”។
ជាការឆ្លើយតបសម្ដេចក្រឡាហោម ស ខេង បានសម្ដែងនូវការអរគុណចំពោះ ឯកអគ្គរាជទូត ដែលបានស្នើឱ្យមានពិចារណា ដើម្បីដកការដាក់ទណ្ឌកម្មនេះ ហើយប្រសិនបើអាមេរិកលុបចោលនូវបំរាមនោះបាន សម្ដេចចាត់ទុកថា នេះជាការផ្ដល់កាដូមួយសម្រាប់កម្ពុជា ដើម្បីលើកកម្ពស់នូវទំនាក់ទំនង កិច្ចសហប្រតិបត្តិការរវាងប្រទេសទាំងពីរឡើងវិញ។
សូមបញ្ជាក់ថា កាលពីខែកញ្ញា ឆ្នាំ២០១៧ កន្លងទៅ សហរដ្ឋអាមេរិក បានប្រកាសផ្អាកការផ្តល់ទិដ្ឋាការ (Visa) ប្រភេទ B1 និង B2 (ប្រភេទទេសចរណ៍ និងជំនួញ) ដល់មន្រ្តីក្រសួងការបរទេសកម្ពុជា ចាប់តាំងពីថ្នាក់អគ្គនាយករហូតដល់ថ្នាក់កំពូល។ ជាមួយគ្នានេះ រាជរដ្ឋាភិបាលក៏បានសម្រេចផ្អាកជាបណ្តោះអាសន្ន នូវកិច្ចសហប្រតិបត្តិការរុករកអដ្ឋិធាតុទាហានអាមេរិកនៅកម្ពុជាវិញផងដែរ ដើម្បីឆ្លើយតបនឹងទណ្ឌកម្មនេះ។
ទោះបីជាយ៉ាងនេះក្តី កាលពីខែតុលា ឆ្នាំ២០១៨ កន្លងទៅនេះ ដោយឈរលើគោលការណ៍មនុស្សធម៌ និងធ្វើឡើងតាមសំណើរបស់ សមាជិកព្រឹទ្ ធសភា រដ្ឋវ៉ាស៊ីនតោន សហរដ្ឋអាមេរិក លោក ដុក អេរិកសុន (Doug Ericksen) និងតំណាងរាស្រ្តលោក វីនសុន បាយ្ស (Vicent Buys) ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានយល់ព្រមបើកឡើងវិញនូវប្រតិបត្តិការ រុករកអដ្ឋិធាតុទាហានអាមេរិក នៅក្នុងប្រទេសកម្ពុជាវិញផងដែរ៕ចេស្តា
