ភ្នំពេញ៖ បុរសម្នាក់ទំនងស្រវឹងស្រា ជិះម៉ូតូលឿនមិនប្រយ័ត្ន ហើយគេចម៉ូតូ មួយគ្រឿងទៀតជ្រុលទៅបុកជាមួយរ៉ឺម៉កម៉ូតូរងរបួសស្រាលទាំងម្ចាស់ម៉ូតូនិង ម្ចាស់រ៉ឺម៉ក។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១០និង១០នាទីយប់ ថ្ងៃទី៣០ ខែវិច្ឆិកា ឆ្នាំ២០១៥ នៅចំណុចមុខសណ្ឋាគារ ប៊ូហ្គេនវីលីឃេ តាមបណ្ដោយផ្លូវ ព្រះ ស៊ីសុវត្ដិ ស្ថិតក្នុងសង្កាត់ផ្សារកណ្ដាល ខណ្ឌដូនពេញ។
ប្រភពព័ត៌មានពីប្រជាពលរដ្ឋដែល នៅកន្លែងកើតហេតុបានឱ្យដឹងថា មុន ពេលកើតហេតុគេឃើញមានរ៉ឺម៉កម៉ូតូពណ៌ក្រហមគ្មានស្លាកលេខមួយគ្រឿង បើកបរដោយបុរសម្នាក់ធ្វើដំណើរក្នុង ទិសដៅពីជើងទៅត្បូងតាមបណ្ដោយផ្លូវ ព្រះស៊ីសុវត្ដិក្នុងល្បឿនល្មម។ ខណៈមក ដល់ចំណុចកើតហតុ ស្រាប់តែមាន បុរសម្នាក់ទៀត ជិះម៉ូតូមួយគ្រឿងម៉ាក ហុងដាស្គូពីពណ៌ស ពាក់ស្លាកលេខភ្នំ ពេញ១FH-២០៣១ ក្នុងទិសដៅបញ្ច្រាស គ្នាដោយល្បឿនលឿនខ្វះការប្រុងប្រយ័ត្ន ហើយទំនងជាស្រវឹងស្រាផងនោះបានជិះ គេចពីម៉ូតូមួយគ្រឿងទៀតមិនចាំម៉ាក ដែលជិះស្របគ្នា រួចបានបត់ឆ្វេងជ្រុល ទៅបុករ៉ឺម៉កម៉ូតូចំពីចហៀងពេញទំហឹងបណ្ដាលភាគីទាំងសងខាងរបួសស្រាល។ ចំណែកម៉ូតូនិងរ៉ឺម៉កខូចខាតយ៉ាងដំណំ។
ក្រោយពេលកើតហេតុរួចសមត្ថកិច្ចនគរបាលមូលដ្ឋានបានចុះមកសម្របសម្រួលភាគីទាំងសងខាងដោយភាគីឱ្យ ខាងម៉ូតូហុងដាស្គូពីសងថ្លៃខូចខាតទៅ ភាគីម្ចាស់រ៉ឺម៉ក២០ដុល្លារដើម្បីបញ្ចប់ រឿងនៅកន្លែងកើតហេតុតែម្ដងដោយ មិនរំខានដល់សមត្ថកិច្ចឡើយ ៕
ដោយ៖ ចាន់ ធឿន
