ខេត្តកណ្ដាល៖ បុរសល្មោភកាមម្នាក់ត្រូវសមត្ថកិច្ចនគរបាលឃាត់ខ្លួន បន្ទាប់ពីរូបគេបានធ្វើសកម្មភាពរំលោភម្តាយក្មេកអាយុ៨៤ឆ្នាំនៅលើផ្ទះ តែត្រូវប្រពន្ធមកទាន់ក៏ស្រែកឆោឡោភ្ញាក់ផ្អើលតែម្ដង។
ហេតុការណ៍នេះ បង្កឲ្យមានការភ្ញាក់ផ្អើលនៅវេលាម៉ោង៥ និង២០នាទីល្ងាច ថ្ងៃទី៣០ ខែវិច្ឆិកា ឆ្នាំ២០១៥ នៅចំណុចភូមិចន្លក់ ឃុំគគីរ ស្រុកកៀនស្វាយ ខេត្តកណ្ដាល។
ប្រភពព័ត៌មានបានឲ្យដឹងថា ជនសង្ស័យដែលត្រូវឃាត់ខ្លួនឈ្មោះ ស្រី ដាវី ភេទប្រុស អាយុ៥៤ឆ្នាំ រស់នៅភូមិ-ឃុំកើតហេតុ មានប្រពន្ធឈ្មោះ ឌិន នឹម អាយុ៥១ឆ្នាំ។ ចំណែកម្ដាយក្មេកជាជនរងគ្រោះឈ្មោះ រស់ ញ៉េស ហៅសុខ អាយុ៨៤ឆ្នាំ ជាស្ត្រីមេម៉ាយ រស់នៅម្នាក់ឯង ក្នុងភូមិ-ឃុំជាមួយគ្នា។
ប្រភពដដែលបានបញ្ជាក់ថា មុនពេលកើតហេតុ ខណៈពេលឃើញស្ត្រីជាម្តាយក្មេកអង្គុយនៅក្នុងផ្ទះម្នាក់ឯង កូនប្រសាល្មោភកាមនោះក៏ចាប់គាត់ផ្ដួល រួចធ្វើសកម្មភាពរំលោភតែម្ដង។ ពេលដែលកំពុងតែធ្វើសកម្មភាពមិនទាន់បានសម្រេចផង ចៃដន្យប្រពន្ធរបស់ជនសង្ស័យឡើងមកទាន់ហើយក៏ស្រែកឆោឡោ ធ្វើបុរសល្មោភកាមជាប្តីនោះបានផ្អាកសកម្មភាព ស្ទុះលើកខោស្លៀកដើរចុះមកដីជិះម៉ូតូគេចខ្លួនបាត់។ បន្ទាប់មកស្ត្រីជាប្រពន្ធក៏ទៅដាក់ពាក្យប្តឹងសមត្ថកិច្ចនគរបាលប៉ុស្តិ៍ ឲ្យចុះទៅស្រាវជ្រាវ ដើម្បីចាប់ខ្លួនជនសង្ស័យមកផ្ដាន្ទាទោសតាមច្បាប់។ លុះដល់វេលាម៉ោង៥និង២០ល្ងាច ថ្ងៃខែឆ្នាំដដែល ទើបឃាត់ខ្លួនជនសង្ស័យបានយកមកប៉ុស្តិ៍សួរនាំ។
បន្ទាប់ពីសួរនាំរួច សមត្ថកិច្ចប៉ុស្តិ៍ក៏បានកសាងសំណុំរឿង បញ្ជូនជនសង្ស័យទៅកាន់អធិការដ្ឋាននគរបាលស្រុកកៀនស្វាយ ដើម្បីចាត់ការបន្តតាមនីតិវិធី៕
ដោយ៖ វិបុល
