ភ្នំពេញ៖ព្រឹទ្ធាចារ្យ សិល្បៈភិរម្យវោហារ ប្រាជ្ញ ឈួន ជាអតីតមន្ត្រីបម្រើការងារនៅនាយកដ្ឋានផលិតកម្មវិធីវិទ្យុនៃអគ្គនាយកដ្ឋានវិទ្យុជាតិកម្ពុជា តាំងពីឆ្នាំ១៩៧៩ រហូតដល់ឆ្នាំ២០០២ បានទទួលមរណភាព កាលពីវេលាម៉ោង១៖៣០នាទី រំលងអាធ្រាត្រឈានចូលថ្ងៃទី១៧ ខែវិច្ឆិកា ឆ្នាំ២០១៨ ក្នុងជន្មាយុ៨៣ឆ្នាំ ដោយរោគាពាធ ។
សេចក្តីជូនដំណឹងរបស់អគ្គនាយកដ្ឋានវិទ្យុជាតិកម្ពុជា នៅថ្ងៃទី១៧ ខែវិច្ឆិកា ឆ្នាំ២០១៨ នេះ បង្ហាញថា សពឧបាសក ព្រឹទ្ធាចារ្យ សិល្បៈភិរម្យវោហារ ប្រាជ្ញ ឈួន បានតម្កល់ធ្វើបុណ្យទក្ខិណានុប្បទាន តាមប្រពៃណី ព្រះពុទ្ធសាសនា នៅសាលាធម្មសភាវត្តបុទុមវត្តី សង្កាត់ចតុមុខ ខណ្ឌដូនពេញ រាជធានីភ្នំពេញ ។
សូមរំលឹកថា កាលពីឆ្នាំមុន នៅថ្ងៃទី២៩ ខែកញ្ញា ឆ្នាំ២០១៧ ក្នុងឱកាសដែលសម្តេចតេជោ ហ៊ុន សែន អញ្ជើញសំណេះសំណាល និងបំពាក់គ្រឿងឥស្សរិយយស ជូនព្រឹទ្ធាចារ្យកោសល្យវោហារ គង់ ណៃ នោះ លោកតាប្រាជ្ញ ឈួន បានបង្ហើបសំនៀងយ៉ាង ក្រអួនក្រអៅជាសាធារណៈដ៏កម្រ បន្ទាប់ពីលោកតាបានឈប់ច្រៀងចាប៉ីអស់ជាច្រើនឆ្នាំដោយសារតែបញ្ហាសុខភាព។
នៅក្នុងកម្មវិធីនោះ សម្តេចតេជោ ហ៊ុន សែន ក៏បានបំពាក់មេដាយកិត្តិយស «មុនីសារភ័ណ្ឌ ថ្នាក់មហាសេរីវឌ្ឍន៍» និងផ្តល់ឋានៈ ស្មើនឹងថ្នាក់ អគ្គនាយក ជូនលោកតា ដែលទទួលបានប្រាក់ខែពីរាជរដ្ឋាភិបាល ដើម្បីជាការតបស្នង ចំពោះស្នាដៃរបស់លោក ជាមរតកមនុស្សរស់ដែលបានប្រឹងប្រែងលើកស្ទួយសិល្បៈចាប៉ីដងវែងរបស់កម្ពុជា។
លោកព្រឹទ្ធាចារ្យសិល្ប:ភិរម្យវោហារ ប្រាជ្ញ ឈួន ត្រូវបានក្រសួងវប្បធ៌មនិងវិចិត្រសិល្បៈ ចាត់ចូលជា សម្បត្តិបេតិកភណ្ឌមនុស្សរបស់កម្ពុជានិងអង្គការយូណេស្កូ ដោយសារទេពកោសល្យប៉ុនប្រសព្វក្នុងការប្រើប្រាស់ពាក្យពេជ្រ និងកេរ្ត៍ឈ្មោះ ល្បីល្បាញតាមរយៈចម្រៀងចាប៉ីដងវែងជាច្រើនទសវត្សមកហើយនៅព្រះរាជាណាចក្រកម្ពុជា។
បច្ចុប្បន្នលោកតា ស្នាក់នៅផ្ទះថ្មីរបស់លោកតាជាមួយគ្រួសារ ក្នុងភូមិស្រម៉ក្រោម ឃុំខ្វាវ ស្រុកទ្រាំង ខេត្តតាកែវ ក្បែរនឹងវត្ត សមរវត្តី ដែលផ្ទះថ្មីនេះ ជាអំណោយផ្ទាល់ពីលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោកស្រី ដែលប្រគល់ជូន លោកតាកាលពីឆ្នាំមុន៕ ចេស្តា
