ខេត្ដប៉ៃលិន៖ គេរាយការណ៍ថា មាន ការលបលួចបើកច្រករបៀងខុសច្បាប់មួយកន្លែងមានទីតាំងនៅខាងជើងចម្ងាយប្រមាណ១រយម៉ែត្រពីច្រកទ្វារអន្ដរជាតិព្រំ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅដែលជាប់ព្រំដែនថៃ តែអាជ្ញាធរហាក់ដូចជាពុំមានវិធានការទប់ស្កាត់ឡើយ ។ ការមិនទប់ស្កាត់បែប នេះព្រោះតែផលប្រយោជន៍ ។
តាមសេចក្ដីរាយការណ៍ឱ្យដឹងថា នៅ ច្រកឆ្លងព្រំដែនលួចលាក់នោះគេប្រើ ស្ពានឈើទទឹងជិតមួយម៉ែត្របណ្ដោយ ប្រហែល៥០ម៉ែត្រ ដើម្បីឆ្លងអូរព្រំដែន ដែលគេបើកឱ្យប្រជាពលរដ្ឋយកទំនិញ ចេញចូលដោយសេរីមិនចាំបាច់មាន លិខិតស្នាមអ្វីឡើយ ដោយគ្រាន់តែជិះ រថយន្ដពីទឹកដីថៃមកឈប់នៅទីនោះ ហើយដើរឆ្លងតាមស្ពានមកដល់ដីខ្មែរ និងមានឡានកាស៊ីណូរង់ចាំទទួល ដើម្បី ដឹកទៅកាន់កន្លែងលេងយ៉ាងរលូនដោយមានសន្ដិសុខចាំការពារទៀតផង ។
សេចក្ដីរាយការណ៍ក៍បានបន្ថែមថា ច្រកមួយនេះក៍សំបូរបទល្មើសផ្សេងៗ ឆ្លងកាត់ផងដែរក្នុងនោះមានដូចជា ចរាចរណ៍គ្រឿងញៀន និងការនាំមនុស្ស ឆ្លងដែនខុសច្បាប់ជាដើម ។ ប៉ុន្ដែអ្វីដែល សំខាន់នោះគឺការបាត់បង់ចំណូលថវិកា រដ្ឋដ៏ក្រាស់ក្រែល ។
លោក ធីម សារឿន អនុប្រធាននគរ បាលអន្ដោប្រវេសន៍ប្រចាំច្រកទ្វារព្រំ ដែនផ្សារព្រំបានថ្លែងទទួលស្គាល់ថា ពិតជាមានមែន ហើយខាងលោកជាអ្នក គ្រប់គ្រង តែខាងខេត្ដគេអ្នកបើកគឺតាំង តែពីអំឡុងលោក អ៊ី ឈាន ជាអភិបាល ខេត្ដមកម្ល៉េះ ។ លោកបន្ដថា ខាងលោក បានរាយការណ៍ជូនថ្នាក់លើដែរ ហើយ ខាងក្រសួងក៏កំពុងមានវិធានការក្នុង រឿងនេះដែរ ។
ចំណែកលោក ហែម រិទ្ធី នាយករដ្ឋ បាលសាលាខេត្ដប៉ៃលិន ក៏បានឱ្យដឹង ដែរថា លោកអភិបាលខេត្ដបានបញ្ជា ឱ្យបិទហើយ បើនៅតែបន្ដបើកទៀត លោកថា នឹងចាំចុះទៅត្រួតពិនិត្យដោយ ផ្ទាល់ ។
បើទោះជាយ៉ាងណាក្ដីរហូតមកដល់ ពេលច្រករបៀងនោះនៅតែដំណើរការ ដដែលរហូតថ្ងៃរសៀលម្សិលមិញ ។ បើ បិទច្រករបៀងនេះអាជ្ញាធរនិងស្ថាប័ន ជំនាញនៅទីនោះហាក់ដូចជាវ៉ៃឆ្នាំង បាយខ្លួនឯងដូច្នេះដែរ ៕
ដោយ៖ ហេង សូរិយា
