គ្រោះថ្នាក់ចរាចរណ៍ផ្លូវទឹក ស្លាប់ជនបរទេសម្នាក់នៅកោះរុងសន្លឹម

ចែករំលែក៖

ខេត្តព្រះសីហនុ ៖ នៅក្នុងអំឡុងក្រសួងធនធានទឹកចេញសេចក្ដីជូនដំណឹងបញ្ជាក់អំពីអាកាសធាតុនិងអំពាវនាវគួរផ្អាកសកម្មភាពធ្វើដំណើរតាមសមុទ្រ ខណៈកម្ពុជាទទួលរងព្យុះទី២៩នោះ ឃើញថាទូកទេសចរណ៍២គ្រឿង បុកគ្នានៅសមុទ្រកោះរ៉ុងសន្លឹមបណ្តាលអោយជនបរទេសម្នាក់ស្លាប់ ។

សមត្ថកិច្ចអោយដឹងថា ហេតុការណ៍នេះកើតឡើង នៅវេលាម៉ោង១៨និង៣០នាទីព្រលប់ថ្ងៃទី២៧ វិច្ឆិកា២០១៨ នៅចំណុចមុខបឹងកាឡូ ទ្រីហាវ ស្ថិតនៅភូមិកោះតូចសង្កាត់កោះរ៉ុងសន្លឹម ក្រុងព្រះសីហនុ ។

ក្នុងនោះ ទូកទេសចរណ៍មួយគ្រឿង ពណ៌ខៀវ បើកបរដោយឈ្មោះ គង់ គី ភេទប្រុស អាយុ ៤៧ឆ្នាំរួមដំណើរដោយជនបរទេសម្នាក់ បានចេញពីឆ្នេរឡុងសិត ឆ្ពោះទៅផែបូរ៉ា មកដល់ចំណុចកើតហេតុខាងលើ ក៏បានបុកជាមួយទូកកន្ទុយវែងដឹកអ្នកទេសចរណ៍មួយគ្រឿងទៀត បើកបរដោយឈ្មោះ ម៉ម វី ដឹកភ្ញៀវទេសចរណ៍បរទេសចំនួន១៦នាក់ បណ្តាលអោយទូកដឹកអ្នកទេសចរណ៍នោះលិចក្នុងសមុទ្រ ធ្វើអោយជនបរទេសម្នាក់បានស្លាប់ ចំណែក មនុស្សផ្សេងទៀតក្នុងទូកត្រូវបានជួយស្រង់ឡើងលើទូកធំ ។