ខេត្តព្រះវិហារ ៖ លោក មាស ស៊ីដា នគរបាលក្រុងព្រះវិហារ ត្រូវបានគេសង្ស័យថា បាននឹងកំពុងប្រើប្រាស់ស្ថាប័នរដ្ឋ ដោយយកអំណាចតួនាទីរបស់ខ្លួន ពិសេសយកអំណាចបងប្អូនជាប់សាច់ឈាមនឹងលោកធំក្នុងខេត្តព្រះវិហារ ដើរគៀបសង្កត់យកលុយពីបទល្មើសរថយន្តដឹកឈើរហូតមានសិទ្ធិដល់ទៅ៨ក្រុង-ស្រុកឯណោះ ។
ជាក់ស្តែងកន្លងទៅថ្មីៗនេះនៅស្រុកជាំក្សាន្ត នគរបាលក្រុងព្រះវិហារ គឺលោក មាស ស៊ីដា បានទៅចាប់រថយន្តដឹកឈើផ្ទះចាស់ ដោយបង្គាប់អោយបង់លុយ៣លានរៀល រួចបញ្ជាទាំងបញ្ច្រាសទិសទៅមេព្រៃអោយដោះលែង រថយន្តដឹកឈើនេះវិញ ។ ប៉ុន្តែករណីនេះត្រូវបានគេដឹងថា ដោយសារមេព្រៃខឹងអត់បានចំណែក ណាមួយអាចខឹងលោក មាស ស៊ីដា ដែលឧស្សាហ៍ព្យាយាមស៊ីដាច់លុយញឹកញយពេក ក៏អត់អោយរថយន្តនេះចេញ ។
លោក មាស ស៊ីដា ត្រូវបានប្រភពព័ត៌មានទម្លាយទៀតថា កាលពីថ្ងៃទី២៣ ខែវិច្ឆិកា ឆ្នាំ២០១៨ ដែលជាថ្ងៃបុណ្យអុំទូកវគ្គផ្ដាច់ព្រ័ត ខណៈកម្លាំងសមត្ថកិច្ចទូទាំងប្រទេសមមាញឹកមានភារកិច្ចការពារសន្តិសុខជូនប្រជាពលរដ្ឋមកលេងកម្សាន្ត បែរជាលោកមានវត្តមាន មានសិទ្ធិឃាត់រថយន្តសាំយ៉ុងជំរិតទារប្រាក់ចំនួន៦០ម៉ឺនរៀលទៅវិញ គឺនៅត្រង់ចំណុចទួលរំចេក ។
គេឆ្ងល់ថា លោក មាស ស៊ីដា គាត់ប្រហែលជានគរបាលដៃ១០០ ឬ ចល័ត ទើបសកម្មភាពនេះត្រូវគេលួចខ្សឹបថា មកពីគាត់មានសែខ្នងបង្អែក មានបងប្អូនជាប់សាច់ឈាមនឹងលោកធំក្នុងខេត្តព្រះវិហារ ទើបលោកមន្រ្តីនគរបាលក្រុងវិហាររូបនេះ មានសិទ្ធសេរីភាពដើរយកលុយពីបទល្មើសទូទាំងខេត្ត-ក្រុងងាយស្រួលដូច្នេះ ។
អង្គភាពព័ត៌មាន នគរដ្រេហ្គន នៅព្រឹកថ្ងៃទី៣០ ខែវិច្ឆិកា ឆ្នាំ២០១៨ មិនអាចសុំការពន្យល់ពីលោក មាស ស៊ីដាបានទេ ពាក់ព័ន្ធនឹងការចោទប្រកាន់ខាងលើនេះដោយសារគ្មានលេខទំនាក់ទំនង ៕ អ្នកចាំចម្ការ
