ខេត្តមណ្ឌលគិរី: មានករណីគ្រោះថ្នាក់ចរាចរណ៍ រវាងរថយន្ត ឡង់គ្រីស័រស៊េរីទំនើប បុកម៉ូតូកែច្នៃមួយគ្រឿងខណៈកំពុងធ្វើដំណើរ ក្នុងទិសដៅស្របគ្នា បណ្តាលឲ្យមានបុរសម្នាក់របួសធ្ងន់ត្រូវបានគេដឹកយកទៅសង្រ្គោះនៅមន្ទីរពេទ្យភ្លាមៗ។
ឧបទ្ទវហេតុគ្រោះថ្នាក់ចរាចរណ៍នេះកើតឡើងនៅវេលាម៉ោង១និង៤០នាទីរសៀលថ្ងៃ សុក្រ ៨រោច ខែកត្តិក ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី៣០ ខែវិច្ឆិកា ឆ្នាំ២០១៨ នៅភូមិ ឆ្នែង ឃុំ ស្រែខ្ទុម ស្រុកកែវសីមា ខេត្តមណ្ឌលគិរី។
មន្រ្តីនគរបាលចរាចរ ស្រុកកែវសីមាបានឲ្យដឹងថា ជនរងគ្រោះឈ្មោះ បេ សុះ ភេទ ប្រុស អាយុ២៧ ឆ្នាំ ជនជាតិចាម មានទីលំនៅភូមិ ឆ្នែង ឃុំ ស្រែខ្ទុម ស្រុក កែវសីមា ខេត្ត មណ្ឌលគិរី ជិះម៉ូតូ កែច្នៃ រងរបួសធ្ងន់ ត្រូវបញ្ជូនទៅព្យាបាលនៅប្រទេសវៀតណាម ដោយសារ រថយន្តបង្កម៉ាក ឡង់គ្រីស័រស៊េរីទំនើប ពណ៌ស ពាក់ស្លាកលេខ ភ្នំពេញ 2AX 5188 អ្នកបើកបរឈ្មោះ ហេង សៀង ភេទ ប្រុស អាយុ ២៣ ឆ្នាំ ជនជាតិ ខ្មែរ មុខរបរ ក្រុមហ៊ុន មានទីលំនៅភូមិកណ្តាល សង្កាត់ ច្បារអំពៅ២ ខណ្ឌ ច្បារអំពៅ ភ្នំពេញ បុកពីក្រោយ។
ក្រោយកើតហេតុសមត្ថលិច្ចជំនាញចរាចរណ៍ស្រុកកែវសីមា ចុះទៅដល់វាស់វែង យករថយន្តទាំងពីរគ្រឿងទៅរក្សាទុក រង់ចាំដោះស្រាយតាមច្បាប់ពេលក្រោយ ៕ សហការី
