ខេត្តបាត់ដំបង ៖ បុរសម្នាក់ត្រូវនគរបាលចាប់ឃាត់ខ្លួន បន្ទាប់ពីយកកណ្តៀវធ្វើសកម្មភាពភ្ជង់ប្លន់យកកាបូប លុយ និងទូរស័ព្ទពីស្ត្រីម្នាក់ នៅចំណុចភូមិរំចេក៤ សង្កាត់រតនៈ ក្រុងបាត់ដំបង កាលពីវេលាម៉ោង៤និង៣០នាទី ថ្ងៃទី៣០ ខែវិច្ឆិកា ឆ្នាំ២០១៨ ។

ជនសង្ស័យត្រូវបានចាប់ឃាត់ខ្លួនដោយកម្លាំងនៃអធិការដ្ឋាននគរបាលក្រុងបាត់ដំបង សហការជាមួយកម្លាំង ជំនាញការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្តបាត់ដំបង បន្ទាប់ពីទទួលបានសេចក្ដីរាយ ការណ៍ពីជនរងគ្រោះឈ្មោះ អ៊ុករះ សុភានាថ ភេទស្រី អាយុ២៤ឆ្នាំ រស់នៅភូមិកាប់គោថ្មី សង្កាត់អូរចារ ក្រុងបាត់ដំបង ។ ស្ត្រីរងគ្រោះអះអាងថា កាលពីវេលាម៉ោង៤ល្ងាច ថ្ងៃទី៣០ ខែវិច្ឆិកា ឆ្នាំ២០១៨ នៅ​ចំណុច​ភូមិរំចេក៤ សង្កាត់រតនៈ ក្រុងបាត់ដំបង ដោយមានជនសង្ស័យម្នាក់បានជិះម៉ូតូមួយគ្រឿងមកធ្វើសកម្មភាពដោយ ប្រើអាវុធកណ្តៀវភ្ជង់ប្លន់យកកាបូបលុយ និងទូរស័ព្ទដៃ ។ លុះមកដល់វេលាម៉ោង៥ ថ្ងៃខែដដែល ជននេះត្រូវបានចាប់ ឃាត់ខ្លួន ក្រោយធ្វើសកម្មភាពភ្ជង់ប្លន់ ។

ជនសង្ស័យត្រូវបានឃាត់ខ្លួនឈ្មោះ ស៊ុំ រតនះ ភេទប្រុស អាយុ១៧ឆ្នាំ មានទីលំនៅភូមិអូរចារ សង្កាត់អូរចារ ក្រុង​បាត់ដំបង ។ វត្ថុតាងដែលដកហូតបានរួមមានទូរស័ព្ទដៃ០១គ្រឿង កាបូបស្បែក០១ អត្តសញ្ញាណប័ណ្ណ១​សន្លឹក លិខិតឆ្លងដែន០១ក្បាល និងប្រាក់ដុល្លារ៥០ដុល្លារ ។

ជនសង្ស័យក្រោយពីឃាត់ខ្លួនរហូតដល់ពេលនេះត្រូវបានសមត្ថកិច្ចជំនាញសាកសួរបន្ថែម និងកសាង​សំណុំរឿង​ ដើម្បី​បញ្ជូនទៅកាន់សាលាដំបូង ដើម្បីចាត់ការតាមនីតិវិធី ៕ ជាយក្រុង