ខេត្តព្រៃវែង ៖ កងរាជអាវុធហត្ថខេត្តព្រៃវែងក្រោមការគ្រប់គ្រងដោយលោកឧត្តមសេនីយ៍ត្រី ឈួន គឹមសាន បានចាត់ចែងកម្លាំងចុះបង្ក្រាបបទល្មើសចែកចាយគ្រឿងញៀន នៅចំណុចភូមិស្វាយសាមសិប ឃុំជើងភ្នំ ស្រុកបាភ្នំខេត្តព្រៃវែង ដោយចាប់ឃាត់ខ្លួនជនសង្ស័យចំនួន ០២នាក់ ។
លោកវរសេនីយ៍ត្រី ផាត់ សុជោត ប្រធានមន្ទីរយុត្តិធម៌ កងរាជអាវុធហត្ថស្រុកបាភ្នំ ដែលបានដឹកនាំកម្លាំងចុះបង្ក្រាបឱ្យដឹងថា កិច្ចសហការនេះធ្វើឡើងនៅវេលាម៉ោង ២២ និង ៣០នាទី ថ្ងៃទី០៣ ខែធ្នូ ឆ្នាំ២០១៨ ។
លោកថា ជនសង្ស័យទាំង២នាក់ដែលកម្លាំង លោកចុះចាប់ឃាត់ខ្លួន ១.ឈ្មោះ យូ ស្រស់ ភេទប្រុស អាយុ ៣៥ឆ្នាំ មុខរបរជាងកាត់សក់ រស់នៅភូមិរាំងដេក ឃុំគគីរធំ ស្រុកគៀនស្វាយ ខេត្តកណ្តាល និង២.ឈ្មោះពុត ស៊ីឡុង ភេទប្រុស អាយុ ២៣ឆ្នាំ មុខរបរយោធាកងពលតូចដឹកជញ្ជូន លេខ៩៩ ទីលំនៅបច្ចុប្បន្ន ភូមិកំពង់ចំលង ឃុំព្រែកទន្លាប់ ស្រុកលើកដែក ខេត្តកណ្តាល។
លោកបញ្ជាក់ថា កម្លាំងបានចាប់យកវត្ថុតាង រួមមានម្សៅក្រាមពណ៌សថ្លាចំនួន ០២កញ្ចប់, ទូរស័ព្ទដៃចំនួន ០២គ្រឿង, ម៉ូតូចំនួន ០១គ្រឿង និងសម្ភារសម្រាប់សេពគ្រឿងញៀនមួយចំនួនទៀត។
បច្ចុប្បន្នជនសង្ស័យរួមនិងវត្ថុតាង មន្ត្រីជំនាញកងរាជអាវុធហត្ថខេត្តព្រៃវែងកំពុងបន្តនីតិវិធី ៕
