ខេត្តពោធិ៍សាត់ ៖ លោកតាវ័យ៦១ឆ្នាំម្នាក់ជួបគ្រោះថ្នាក់ចរាចរណ៍ដ៏រន្ធត់មួយ បណ្ដាលឲ្យស្លាប់ភ្លាមៗ ដែលហេតុការណ៍នេះបង្កឡើងដោយអ្នកបើករបររថយន្តម៉ាកហ៊ីណូ បុក គ្រាដែលលោកតាកំពុងដើរលើចិញ្ចើមផ្លូវថ្នល់ ។
ហេតុការណ៍នេះបានកើតឡើងនៅវេលាម៉ោង៦ និង២៥នាទី ល្ងាចថ្ងៃច័ន្ទ ខែមិគសិរ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី១០ ខែធ្នូ ឆ្នាំ២០១៨ នៅលើកំណាត់ផ្លូវជាតិលេខ៥៥ ត្រង់ចំណុចទល់មុខមជ្ឍមមណ្ឌលបណ្តុះបណ្តាលជំនាញមូលដ្ឋានខេត្តពោធិ៍សាត់ ស្ថិតនៅភូមិវត្តលួង សង្កាត់លលកស ក្រុង-ខេត្ត ពោធិ៍សាត់ ។
លោក អនុសេនីយ៍ឯក ឈឿន ឃឿន នាយប៉ុស្ដិ៍នគរបាលរដ្ឋបាលលលកសបានឲ្យដឹងថា លោកតារងគ្រោះ ឈ្មោះ អុក គឹមហ៊ន ភេទ ប្រុស អាយុ៦១ឆ្នាំ រស់នៅភូមិ-សង្កាត់កើតហេតុខាងលើ។ លោកថា នៅមុនកើតហេតុ លោកតាដើរឆ្លងផ្លូវថ្នល់ ពីត្បូងទៅជើង រួចដើរទៅទិសខាងលិចសំដៅតូបលក់ដូរ ស្រាប់តែមានរថយន្ត ១គ្រឿងបុកពីក្រោយទាំងកម្រោល ថែមទាំងកិនស្លាប់យ៉ាងរន្ធត់តែម្ដង អ្នកបើកបររថយន្តបង្ក ឃើញដូច្នេះបើកទ្វារចុះរត់គេចខ្លួនបាត់ស្រមោល បន្សល់ទុកតែរថយន្តនៅកន្លែងកើតហេតុ ។
លោក អនុសេនីយ៍ឯក ឈឿន ឃឿនឲ្យដឹងថា រថយន្តបង្កហេតុម៉ាក ហុីណូ ពណ៏ទឹកប៊ិច ពាក់ស្លាកលេខ ភ្នំពេញ 3D 0571 បានយកមករក្សាទុកជាបណ្ដោះអាសន្ន នៅផ្នែកសណ្ដាប់ធ្នាប់នៃអធិការដ្ឋាននគរបាលក្រុងពោធិ៍សាត់ ។ ចំណែកជនរងគ្រោះ(ស្លាប់)បានធ្វើកំណត់ហេតុ ប្រគល់ជូនក្រុមគ្រួសារសាច់ញាតិទទួលយកទៅចាត់ចែងធ្វើបុណ្យតាមប្រពៃណី ៕ ដោយ បឹុម ពិន
...