ភ្នំពេញ៖ ភាពយន្តកំប្លែង ភ័យរន្ធត់ដែលរៀបរាប់អំពីជំនឿលើការអន្ទងព្រលឹង របស់ផលិតកម្ម LA Film គឺរឿង”ព្រលឹងមនុស្សរស់” នឹងធ្វើការចាក់បញ្ចាំងជាផ្លួវការហើយនៅថ្ងៃទី២៥ខែធ្នូឆ្នាំ២០១៨នេះ។ ភាពយន្តនេះនឹងចូលរួមសម្តែងដោយតារាសម្តែង តារាកំប្លែងប្រុសស្រីល្បីឈ្មោះជាច្រើននៅកម្ពុជា និងត្រូវបាកគេរំពឹងថាជាភាពយន្តលេចធ្លោរមួយនៅចុងឆ្នាំនេះ។
​អបិយជំនឿលើការអន្ទងព្រលឹងមនុស្សដែលបាត់បង់វិញ្ញាណ និងហៅព្រលឹងមនុស្សដែលបានស្លាប់បាត់បង់ជិវិត នៅតែស្ថិតក្នុងអារម្មណ៍ប្រជាជនខ្មែរដែលមានជំនឿលើព្រលឹងនិយម។ ក្រោយសម្រិតសម្រាំងការផលិតអស់ជាច្រើនខែផលិតកម្ម LA Film បានសម្រេចបញ្ចេញស្នាដៃថ្មីចុងក្រោយរបស់ខ្លួនគឺរឿង”ព្រលឹងមនុស្សរស់”ដែលបកស្រាយអំពីជំនឿមួយនេះ។ ភាពយន្តនេះមានការចូលរួមសម្តែងដោយតារាសម្តែង កញ្ញា គៀត សុវណ្ណាឡាង នាយគ្រឿន នាយពែកមី លោក ជា សុវណ្ណនរា លោក ទេព រិនដារ៉ូ នាយ BIG លោក ងួន សុបិនជាដើម។ ភាពយន្តនេះត្រូវបានដឹកនាំសម្តែងដោយផលតករផលិតរឿង”ភូមិអត់មនុស្ស” និងរឿង”ទង់ព្រលឹង” គឺ លោក ឌៀប សុវណ្ណតារា។ ភាពយន្តនេះនឹងត្រូវចាក់បញ្ចាំងនៅគ្រប់រោងភាពយន្តទាំងអស់ ចាប់ពីថ្ងៃទី២៥ខែធ្នូនេះតទៅ។
​តារាសម្តែង គៀត សុវណ្ណាឡាង បានបញ្ជាក់ថា ជាភាពយន្តថ្មីប្លែកសម្រាប់ទស្សនិកជន ដែលផលិតករ និងសិល្បករបានខិតខំរួមគ្នាចូលរួមផលិត និងសម្តែង។ នាងថាមានផលលំបាកជាច្រើនដែលជួបប្រទះទាំងការថតនៅពេលយប់ជ្រៅ និងក្នុងល្អាងជាដើម។ នាងរំពឹងថាភាពយន្តនេះនឹងក្លាយជាចំណីអារម្មណ៍ថ្មីមួយប្លែកបន្ថែមទៀតសម្រាប់ទស្សនិកជន ហើយនាងក៏រំពឹងថានឹងទទួលបានការគាំទ្រស្នាដៃថ្មីនេះនៅពេលចាក់បញ្ចាំងផងដែរ៕វឌ្ឍនា