ក្រោយពេលដែលអាមេរិកបានរិះគន់យន្តហោះទម្លាក់គ្រាប់យុទ្ធសាស្ត្ររបស់រុស្ស៊ី Tu-160 ដែលរុស្ស៊ីបញ្ចូនទៅចូលរួមធ្វើសមយុទ្ធនៅក្នុងប្រទេសវេណេហ្ស៊ូអេឡា ថាជាយន្តហោះសម្រាប់ដាក់តំាងនៅសារមន្ទីប៉ុណ្ណោះ មិនមានប្រសិទ្ធិភាពនៅក្នុងការធ្វើសង្គ្រាមនោះឡើយ ។ នៅពេលនេះប្រធានាធិបតីរុស្ស៊ី លោកពូទីនបានចាត់ទុក មីស៊ីល Tomahawk របស់អាមេរិក មិនមានសម្ថភាពឡើយ នៅក្នុងការវាយប្រហារនៅលើទឹកដីស៊ីរី និងអីរ៉ាក់ដោយសារតែ មីស៊ីលនោះ ខុសគោលដៅដល់ទៅ ៧០ភាគរយ។
ប្រធានាធិបតីពូទីន បាននិយាយនៅក្នុងកិច្ចប្រជុំ ជាមួយមន្ត្រីការពារជាតិកាលពីថ្ងៃទី១៨ខែធ្នូថា«ការពិតមីស៊ីល Tomahawk ដ៏ល្បីល្បាញ់របស់អាមេរិក មួយរយៈពេលកន្លងមក ពេលវាយប្រហារនៅក្នុងប្រទេសអីរ៉ាក់និងស៊ីរី គឺមានប្រសិទ្ធិភាពតែ៣០ភាគរយប៉ុណ្ណោះ។កាំជ្រួចមីស៊ីលទាំងនោះចាំបាច់ត្រូវតែធ្វើការកែប្រែ ឲ្យបានទំនើបជាងនេះ»។
កាលពីខែមេសា សម្ព័ន្ធមិត្តអាមេរិក ដែលមាន អាមេរិក អង់គ្លេស បារាំង បានបើកការវាយប្រហារដោយ មីស៊ីល Tomahawk រហូតដល់ទៅ១០៣ដើម ។ ក្នុងចំណោមនោះ ប្រព័ន្ធការពារមីស៊ីល របស់ស៊ីរី បានបាញ់ទម្លាក់ រហូតដល់ទៅ៧១គ្រាប់ ។
ដោយសារតែ មីស៊ីលខាងលើ មិនមាន ប្រសិទ្ធិភាពខ្ពស់ រុស្ស៊ីបានផលិត មីស៊ីលដែល មានសម្ថភាព ក្នុងការប្រឆំាងនិងមីស៊ីលនោះប្រកបដោយប្រសិទ្ធិភាព ។ នៅក្នុងកិច្ចប្រជុំកាលពីថ្ងៃទី១៨ខែធ្នូនោះដែរលោកពូទីន បានលើកកម្ពស់ មិស៊ីលទំនើបៗបំផុតរបស់រុស្ស៊ី ដែល ធ្វើឲ្យសត្រូវ ត្រូវ ពិចារណាឡើងវិញ ។
លោកពូទីន ក៏បានបញ្ចាក់ទៀតថា នឹងបន្តផលិត មិស៊ីលទំនើបៗជាច្រើនទៀត ក្នុងនោះមាន មីស៊ីលល្បឿនលឿន Avangard និងមីស៊ីល ឆ្លងទ្វីប Sarmat ដែលអាចវាយប្រហារទៅលើគោលដៅប្រកបដោយជោគច័យ ។ ជាមួយគ្នា នេះ មីស៊ីល Kinzhal និង ប្រព័ន្ធ អាវុធឡាស៊ែរ យន្តហោះចម្បាំង Peresvet នឹងដាក់ឲ្យប្រើប្រាស់ ក្នុងជួរកងទ័ពនាពេល ដ៏ខ្លីខាងមុខ ៕
