រុស្ស៊ីមានគម្រោងសាងសង់ទីតាំងយោធានៅក្រៅប្រទេសដំបូងគេបង្អស់តាំងពី១០ឆ្នាំមុនមកម៉្លេះដោយការសាងសង់ធ្វើឡើងនៅក្នុងប្រទេសវេណេហ្ស៊យអេឡា ។ នៅពេលនេះគម្រោងនោះនឹងត្រូវបានអនុវត្តក្រោយពេលដែល មានការព្រមព្រៀងគ្នាជាមួយរដ្ឋាភិបាលវេណេហ្ស៊យអេឡា ។ សារព័ត៌មាន TASS បានផ្សាយថា កាលពី១០ឆ្នាំមុន ក្រុមអ្នកឯកទេសរុស្ស៊ីបានសម្រេចជ្រើសរើស កោះ La Orchila មានចម្ងាយពីទីក្រុង ការ៉ាកាស់វេណេហ្ស៊យអេឡា ប្រមាណ២០០គីឡូម៉ែត្រ នៅឥ្សសាននៃប្រទេសវេណេហ្ស៊យអេឡា ។ ក្រោយពេលរដ្ឋាភិបាលរបស់ប្រធា នាធិបតីនីកូឡាស ម៉ាឌូរ៉ូ ឯកភាពយន្តហោះទម្លាក់គ្រាប់របស់រុស្ស៊ី ប្រភេទទំនើបបំផុត Tu-160 បានបញ្ចូនទៅកាន់កោះ La Orchila ដោយបានចុះចតនៅទីនោះអស់រយៈពេល ២ថ្ងៃ។ ចំណែកសារព័ត៌មាន Daily Mail បានផ្សាយថា វេណេហ្ស៊យអេឡា បានអនុញ្ញាត្តិឲ្យរុស្ស៊ីសាងសង់ទីតាំងទ័ពអាកាសនៅលើទឹកដីរបស់ខ្លួន ។ ការបញ្ជូនយន្តហោះទម្លាក់គ្រាប់ទៅកាន់ទីនោះគ្រាន់តែជាការសាកល្បងប៉ុណ្ណោះនៅពេលអនាគតនឹងមានកងទ័ពនិងសព្វាវុធទំនើបៗរបស់រុស្ស៊ីនឹងឈរជើងនៅទីនោះជាមិនខាន។ លោក Gareyev មន្ត្រីយោធាជាន់ខ្ពស់រុស្សីបានលើកឡើងថា «យន្តហោះចម្បាំងរុស្ស៊ីមិនចាំបាច់វិលត្រឡប់ទៅកាន់រុស្ស៊ីវិញឡើយ ក៏ដូចជា មិនចាំបាច់ ចាក់សាំងនៅលើអាកាសទៀតឡើយ នៅពេលបំពេញការងាយាមល្បាតនៅទ្វីបអាមេរិក »។ ព័ត៌មានស្តីពីការកសាងទីតាំងយោធារបស់រុស្ស៊ីនៅលើទឹកដីវេណេហ្ស៊យអេឡាក្រោយពេលដែលយន្តហោះចម្បាំងរុស្ស៊ីពីរគ្រឿង ហោះហើរឆ្លងកាត់ចម្ងាយផ្លូវជាង ១មុឺនគីឡូម៉ែត្រទៅកាន់វេណេហ្ស៊យអេឡា។ វត្តមានយន្តហោះទម្លាក់គ្រាប់របស់រុស្ស៊ីបានធ្វើឲ្យអាមេរិកកាន់តែព្រួយបារម្ភ។ រដ្ឋមន្ត្រីការបរទេសអាមេរិក លោក Pompeo បានសរសេរនៅលើបណ្តាញ Twitter ថា «រដ្ឋាភិបាលរុស្ស៊ីបានបញ្ជូនយន្ដហោះទម្លាក់គ្រាប់ ហោះហើរចម្ងាយផ្លូវពាក់កណ្តាលផែនដីទៅកាន់វេណេហ្ស៊យអេឡាដើម្បីអ្វី ។ ពលរដ្ឋវេណេហ្ស៊យអេឡា គួរតែវាយតម្លៃទៅលើសកម្មភាពទាំងនោះ ៕ សាធី
